އިންޑިއާގެ އެހީތެރިކަމާއި އެކު ވުހާންގައި ތިބި ދިވެހިން އިންޑިއާއަށް ގެނެސްފި
2 ފެބުރުއަރީ 2020 | އާދީއްތަ 04:17ވޫހާން ސިޓީގައި ތިބި ދިވެހިން ކަރަންޓިން ކުރާނީ ނިއުދިއްލީގައި
ފޮރިން މިނިސްޓަރ އަބްދުﷲ ޝާހިދު، އިންޑިއާގެ ބޮޑުވަޒީރު ނަރެންދްރަ މޯދީ
ކޮރޯނާވައިރަސް އެންމެ ގަދަޔަށް ފެތުރެމުންދާ ޗައިނާގެ ހޫބޭ ޕްރޮވިންސުގެ ވުހާންގައި ތިބި ދިވެހިން އިންޑިއާއަށް ގެނެސްފިއެވެ.
މިކަމާއި ގުޅިގެން ރާއްޖޭގައި ހުންނަ އިންޑިއާ އެމްބަސީން ބުނީ ވުހާންގައި ދިރިއުޅެމުންދިޔަ 7 ދިވެހިން އެއަރ އިންޑިއާގެ B747 ފްލައިޓުން އިންޑިއާގެ ދިއްލީއަށް ގެނެސްފައިވާ ކަމަށެވެ. މި ފްލައިޓުގައި ވުހާންގައި ދިރުއުޅެމުންދާ އިންޑިއާގެ ރައްޔިތުން ވެސް ގެނެސްފައިވެއެވެ.
އަދި ސަލާމަތާއި ރައްކާތެރިކަން ކަށަވަރު ކުރުމަށް އެމީހުން އިންޑިއާގެ ވެރިރަށް ނިއު ދިއްލީގައި ކަރަންޓީނު ކުރެވޭނެ ކަމަށެވެ. އެމީހުން ކަރަންޓީނު ކުރެވޭނީ ދިއްލީގެ މެނަސޫރުގައި ގާއިމު ކުރެވިފައިވާ ޚާއްސަ ފެސިލިޓީއެއްގައި ކަމަށް ވެސް އެމްބަސީއިން މައުލޫމާތުދެއެވެ.
މީގެއިތުރުން އިންޑިއާ އެމްބަސީއާއި ފޮރިން މިނިސްޓްރީއާއި ވަރަށް ގާތުން މަސައްކަތް ކުރަމުން ކަމަށާއި މިކަމުގައި ބެއިޖިންގްގައި ހުންނަ ރާއްޖޭގެ އެމްބަސީގެވެސް އެއްބާރުލުން ލިބުނު ކަމަށެވެ. އަދި އެމީހުން ވުހާން އިން ނެރުމުގެ މަސައްކަތް ޗައިނާ ސަރުކާރުން ދޭންޖެހޭ ހުއްދަތައް ލިބުމާއި އެކު ފެށުނު ކަމަށް ވެސް ބުނެފައިވެއެވެ. މިކަން ކުރެވުނީ އިންޑިއާގެ ވަރަށް ބޮޑު އެހީތެރިކަމެއް ލިބިގެން ކަމަށާއި ރާއްޖެއާއި އިންޑިއާ އާއި އޮތް ގުޅުމުގެ ވަރުގަދަކަން އެމްބަސީއިން ފާހަގަކޮށްފައިވެއެވެ.
ފޮރިން މިނިސްޓަރ އަބްދުﷲ ޝާހިދު މިކަމާއި ގުޅިގެން ކުރެއްވި ޓުވީޓެއްގައި ވަނީ އިންޑިއާއިން މިކަމުގައި ވީ އެހީތެރިކަން ފާހަގަކޮށް، އިންޑިއާގެ ބޮޑު ވަޒީރު ނަރެންދްރަ މޯދީއަށާއި އިންޑިއާގެ އެކްސްޓަރނަލް އެފެއަރޒް މިނިސްޓަރ ޑރ ސުބްރަމާނިޔަމް ޝަންކަރުގެ އިތުރުން އިންޑިއާގެ ކަމާބެހޭ ފަރާތްތަކަށް ޝުކުރުއަދާ ކުރައްވާފައެވެ. މީގެ އިތުރުން ޗައިނާގެ ހޫބޭ ޕްރޮވިންސް ގެ ކަމާބެހޭ ފަރާތްތަކާއި ޗައިނާ އިން ރާއްޖެއަށް ކަނޑައަޅާފައި ހުންނަ ސަފީރު ޒަންގް ލީ ޖޮންގްގެ އިތުރުން ދިވެހިރާއްޖެއިން ޗައިނާއަށް ކަނޑައަޅާފައި ހުންނަވާ ސަފީރު ޢާއިޝަތު އަޒީމާއަށް ދެއްވި އެއްބާރުލުމަށް މިނިސްޓަރ ވަނީ ޝުކުރުއަދާ ކުރައްވާފައެވެ.
ޗައިނާގެ ހޫބޭ ޕްރޮވިންސްގެ ވޫހާން ސިޓީގައި 9 ދިވެހިން ދިރިއުޅެމުންދާއިރު މީގެކުރިން ޝާހިދު ވިދާޅުވީ، އެ 9 މީހުންގެ ތެރެއިން ރާއްޖެ އަންނަން ބޭނުންވަނީ 7 މީހުން ކަމަށެވެ.
