ކުޅިވަރު މާކެޓިން އާއި ސްޕޮންސާޝިޕްގެ ހާއްސަ ވޯކްޝޮޕް ނިންމާލައިފި
29 ޖެނުއަރީ 2020 | ބުދަ 06:46މި ވޯކްޝޮޕް ކުރިއަށް ގެންގޮސްފައިވަނީ ދެ ދުވަހުގެ މުއްދަތަކަށް
ކުޅިވަރު މާކެޓިން އާއި ސްޕޮންސާޝިޕްގެ ހާއްސަ ވޯކްޝޮޕްގެ ތެރެއިން
މޯލްޑިވްސް ސްޕޯޓްސް ކޯޕަރޭޝަނުން އިންތިޒާމުކޮށްގެން ބޭއްވި "ސްޕޯޓްސް މާކެޓިންގް އެންޑް ސްޕޮންސާޝިޕް ވޯކްޝޮޕް" ނިންމާލައިފި އެވެ.
ސްޕޯޓްސް ކޯޕަރޭޝަނާއި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގުޅިގެން ދެ ދުވަހުގެ މުއްދަތަކަށް ބޭއްވި މި ވޯކްޝޮޕަކީ ކުޅިވަރުގެ ދާއިރާ އާއި މާކެޓިންގެ ދާއިރާގައި ހަރަކާތްތެރިވާ ބޭފުޅުންނަށް ހާއްސަކޮށްގެން ކުރިއަށް ގެންދިޔަ ވޯކްޝޮޕެކެވެ.
މި ވޯކްޝޮޕްގައި ރާއްޖޭގެ ކްލަބުތަކުގެ ބޭފުޅުންނާއި އެކި ކުންފުނިތަކުގެ ބޭފުޅުންގެ އިތުރުން ނޫސްވެރިންވެސް ވަނީ ބައިވެރިވެފައެވެ. މި ވޯކްޝޮޕްގައި ކިޔަވައިދެއްވީ ބައިނަލްއަގުވާމީގޮތުން މާކެޓިންގެ ދާއިރާއިން ތަޖުރިބާ ލިބިފައިވާ ބޭފުޅެއް ކަމަށްވާ ސިންޓޯ އަޖްރަމްއެވެ. ސިންޓޯ ވަނީ 12 އަހަރު މިދާއިރާގައި މަސައްކަތްކޮށްފައެވެ.
ޖުމްލަ 6 ސެޝަނެއް ކުރިއަށް ގެންދިޔަ މި ވޯކްޝޮޕް ނިންމާލީ އިއްޔެ އެވެ.
ސްޕޯޓްސް ކޯޕަރޭޝަނުގެ މެނޭޖިން ޑިރެކްޓަރު މައުރޫފް އަހުމަދު (މާއްޓޭ) މީގެކުރިން ވިދާޅުވީ މި ވޯކްޝޮޕް ބޭއްވުމުގެ މައިގަނޑު މަގުސަދަކީ ރާއްޖޭގެ ކުޅިވަރުގެ ދާއިރާ އެހެން ހަރުފަތަކަށް ގެންދިޔުން ކަމަށެވެ.
އެފްއޭއެމްގެ ރައީސް ބައްސާމް ވިދާޅުވީ މިވަގުތު ރާއްޖޭގެ ކްލަބުތަކަށް ދިމާވެފައިވާ އެންމެ ބޮޑު މައްސަލައަކީ މާލީގޮތުން ކްލަބުތައް ވީރާނާވެފައިވުން ކަމަށާއި މި ވޯކްޝޮޕްގެ ސަބަބުން އެކަމަށް ކޮންމެވެސް ވަރެއްގެ ހައްލެއް ލިބިގެންދާނެ ކަމަށް އުންމީދުކުރާ ކަމަށެވެ.
ސްޕޯޓްސް ކޯޕަރޭޝަނުން އިސްނަގައިގެން ކުޅިވަރު ޕްރޮމޯޓު ކުރުމަށް ހާއްސަ ވޯކްޝޮޕެއް ބޭއްވިއިރު، މިއަހަރުގެ ތެރޭގައި އިތުރު ދެ ވޯކްޝޮޕް ބޭއްވުމަށް މަސައްކަތް ކުރަމުން އަންނަ ކަމަށްވެސް އެ ކޯޕަރޭޝަނުން މައުލޫމާތުދެއެވެ.
