އޮންލައިން ހަތަރު ޚިދުމަތަކާއެކު މާލެ ސިޓީ ކައުންސިލްގެ އައު ވެބްސައިޓް އިފްތިތާޙުކޮށްފިއެވެ.
އަންގާރަ ދުވަހުގެރޭ މާލެ ސިޓީ ކައުންސިލްގެ މާފަންނު އޮފީހުގައި، އައު ވެބްސައިޓް އިފްތިތާޙުކޮއްދެއްވީ މާލޭ ސިޓީގެ މޭޔަރ ޝިފާ މުޙައްމަދެވެ.
މާލޭ ސިޓީ ކައުންސިލްގެ އައު ވެބްސައިޓާ އެކު އޮންލައިން ކުރެވުނު ހަތަރު ޚިދުމަތަކީ މަގުމަތީގައި މަސައްކަތް ކުރުމުގެ ހުއްދައަށް އެދުމާއި، މަގު ބަންދުކުރުމުގެ ހުއްދައަށް އެދުމާއި، ފައްތިޔާ އަދި ފަޅު ހުއްދައަށް އެދުމާއި، މައިޒާންތަކާއި، ޕާކުތަކާއި، ބީޗު ފަދަ ތަންތަން ކުއްޔަށް ހިފުމަށް އެދި ހުށަހެޅުމެވެ.
މާލޭގެ މަގުތަށް ރަނގަޅު ފެންވަރަކަށް ތަރައްޤީކުރުމުގެ މަޝްރޫޢުގެ އެއްބަސްވުމުގައި ސޮއިކުރެއްވުމަށް މިމަހުގެ 26 ވަނަ ދުވަހު ބޭއްވުނު ރަސްމިއްޔާތުގައި ޝިފާ ވިދާޅުވެފައިވާ ފަދައިން މާލޭގެ މަގުތަށް ރަނގަޅު ފެންވަރަކަށް ހެދުމަށް ހިންގާ " މާލެ ސްޓްރީޓްސްކޭޕިންގް ޕްރޮޖެކްޓް " ގެ މަޢުލޫމާތު މި ވެބްސައިޓުގައި ހިމެނިފައިވާނެ ކަަމަށް ސިޓީ ކައުންސިލުން މަޢުލޫމާތުދެއެވެ.
ސިޓީ ކައުންސިލުން ބުނީ، މި މަޝްރޫޢަކީ ރާއްޖޭގެ ކައުންސިލަކުން މިހާތަނަށް ހިންގާ އެންމެ ބޮޑު މަޝްރޫއު ކަމަށެވެ. މުޅި މަޝްރޫއު އަށް 462 މިލިއަން ރުފިޔާ ޚަރަދުވާނެކަމަށް އަންދާޒާކުރެވެއެވެ.
މާލެ ސިޓީ ކައުންސިލުން މަޢުލޫމާތުދޭ ގޮތުގައި ކުރިއަށް އޮތްތާނގައި ސިޓީ ކައުންސިލްގެ އިތުރު ޚިދުމަތްތައް އޮންލައިންކުރެވި ރައްޔިތުންނަށް ފަސޭހަކަމާއެކު ޚިދުމަތް ދިނުމަށް ބޭނުންވާ ކަންކަން ފުރިހަމަކުރަމުން ގެންދެވޭނެއެވެ.
