ސަލްމާން އާއި ދިޝާ އެކުގައި މިފަހަރު "ރާދޭ" އިން

ބޮލީވުޑްގެ ސުޕަރ ސްޓަރ ސަލްމާން ޚާނާއެކު އަނެއްކާވެސް ފިލްމެއް ކުޅުމުގެ ފުރުޞަތު ލިބުމުން, އެކަމާއި ވަރަށް ހިތްހަމަޖެހޭ ކަމަށް ދިޝާ ޕަޓާނީ ބުނެފިއެވެ.

ސަލްމާން ޚާންގެ އެންމެ ފަހުން ރިލީޒް ކުރި ފިލްމު "ބާރަތު" ގައި ވެސް ދިޝާ ވަނީ ފެނިގެންގޮސްފައެވެ. ބާރަތުގައި ދިޝާ ފެނިގެންގޮސްފައިވަނީ "ސްލޯ މޯޝަން" މި ލަވައިންނެވެ. ބެލުންތެރިންގެ މެދުގައި މަޤުބޫލުވެގެން ދިޔަ މި ލަވަ ވެގެން ގޮސްފައިވަނީ ހިޓަކަށެވެ. އެލަވައިގައި ސަލްމާނާއި، ދިޝާގެ "ކެމިސްޓްރީ" ވަރަށް ގުޅޭ ކަމަށް އޯޑިއަންސް ޤަބޫލު ކުރެއެވެ.

" ރާދޭ" އާއި ގުޅޭ ގޮތުން ދިޝާ ބުނެފައިވަނީ ސަލްމާން ފަދަ ސްޓާރަކާއި އެކު ފިލްމެއްގައި މަސައްކަތް ކުރުމުގެ ފުރުޞަތު ދެވަނަ ފަހަރަކަށް ލިބޭނެކަމަށް އުންމީދުވެސް ނުކުރާކަމަށެވެ.

އަދި "ބާރަތު" ގައިވެސް ސަލްމާނާއެކު މަސައްކަތް ކުރުމުގެ ފުރުޞަތު ލިބުމުންވެސް ވަރަށް އުފާވި ކަމަށް ދިޝާ ވަނީ ބުނެފައެވެ.

މި ފިލްމުން ފުރުޞަތު ލިބުމުން ކުރެވުނު އިހުސާސް ބުނެދޭންވެސް ނޭނގޭ ކަމަށާއި ފިލްމުގެ ވާހަކަ ވެސް އޭނާއަށް ވަރަށް ކަމުދާ ކަމަށްވެސް ދިޝާ ބުންޏެވެ.

ދިޝާ އެންމެ ފަހުން ކުޅުނު ފިލްމަކީ "މަލަންގް" އެވެ. މި ފިލްމު ރިލީޒް ކުރުމަށް ހަމަޖެހިފައިވަނީ އަންނަ މަހުގެ 7 ގައެވެ. މި ފިލްމުގައި ދިޝާ ފެނިގެންދާނީ އަދިތުޔާ ރޯއީ ކަޕޫރާއި އެކުގައެވެ.