ޗައިނާގެ ހޫބޭ ޕްރޮވިންސްގެ ވޫހާން ސިޓީގައި ހަލުވިކަމާއެކު ފެތުރެމުންދާ ކްރޯނާ ވައިރަސް ނޭޕާލާއި ފްރާންސް އިން ވެސް ފެނިފައިވާ ކަމަށް އެ 2 ގައުމުން ކަށަވަރުކޮށްދީފިއެވެ.

ނޭޕާލުން ފެނިފައިވަނީ މި ވައިރަސް ޖެހިފައިވާ އެކަކެވެ. ނަމަވެސް ފްރާންސުން ފެނިފައިވަނީ 2 މީހުންނެވެ. ނޭޕާލުން ބުނެފައިވަނީ ޗައިނާގައި ކިޔަވަމުންދާ ނޭޕާލްގެ ދަރިވަރެއްގެ ކްރޯނާއަށް ޕޮޒިޓިވް ވެފައިވާ ކަމަށެވެ. އަދި އޭނާ ފެނިފައިވަނީ ނޭޕާލްގެ ހިމާލެޔާ ސަރަހައްދުންނެވެ.

އެގައުމުން ބުނެފައިވަނީ ޗައިނާގެ ވޫހާން ސިޓީގައި ކިޔަމުން އަންނަ މި ދަރިވަރު ނޭޕާލަށް އައިސްފައިވަނީ ޗުއްޓީއަށެވެ. އަދި އޭނާ މިވަގުތު ހުރީ އައިސޮލޭޓް ކުރެވިފައި ކަމަށާއި މިކަމާއި ގުޅިގެން ބަލަމުންދާ ކަންކަން ނޭޕާލުގެ ކަމާބެހޭ ފަރާތްތަކުން މިހާރު ބަލަމުންދާ ކަމަށެވެ.

މީގެ އިތުރުން އޭނާއާއި ކޮންޓެކްޓް ކުރެވުނު ނުވަތަ އެކުގައި އުޅުނު މީހުންގެ މައުލޫމާތު އެއްކުރަމުންދާ ކަމަށްވެސް ނޭޕާލުގެ ކަމާބެހޭ އިދާރާތަކުން ވަނީ ބުނެފައެވެ.

މީގެ އިތުރުން ފްރާންސުން ވެސް ވަނީ އެގައުމުގައި ކްރޯނާ ވައިރަސް އަށް 2 މީހަކު ޕްޒިޓިވްވެފައިވާ ކަން ހާމަކޮށްފައެވެ. ފްރާންސުން ބުނެފައިވަނީ މި ވައިރަސް ޖެހިފައިވާ އެކަކަށް އެގައުމުގެ ދެކުނު ހުޅަނގު ބޯރޑިއޮކްސް ސިޓީގައި އަދި ދެވަނަ މީހާ ޕެރިސްގައި އެދުމަތިކުރެވިފައިވާ ކަމަށެވެ.

ފްރާންސްގެ ހެލްތް މިނިސްޓަރު ވިދާޅުވެފައިވަނީ ކްރޯނާ ވައިރަސްގެ ދެ ކޭސްއެއް މިހާތަނަށް ފެނިފައިވާ އިރު، އިތުރު ކޭސްތަކެއް ފެނުމަކީ އެކަށީގެންވާ ކަމެއް ކަމަށެވެ.