އެމްޑީޕީން މުޅި ރާއްޖޭގައި ވޯކްޝޮޕްތަކެއް ކުރިއަށްގެންދަނީ

މި އަހަރުގެ އޭޕްރީލް މަހުގެ ހަތަރު ވަނަ ދުވަހު ބާއްވަ ލޯކަލް ކައުންސިލް އިންތިހާބަށް ތައްޔާރުވުމުގެ ގޮތުން މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން، އެ ޕާޓީގެ މެމްބަރުންނަށް ހާއްސަކޮށްގެން މުޅި ރާއްޖޭގައި ވޯކްޝޮޕްތަކެއް ބާއްވާ ގޮތަށް ހަމަޖައްސައިފިއެވެ.

ކައުންސިލް އިންތިހާބަށް އެމްޑީޕީގެ ކެމްޕޭނު ހަރަކާތްތަށް ފެށީ ތިލަދުންމަތިންނެވެ. ތިލަދުންމަތީ ދަތުރަށްފަހު، ބުރާސްފަތި ދުވަހު އެމްޑީޕީން ވަނީ މުޅި ރާއްޖޭގައި ކެމްޕޭނު ހަރަކާތްތައް ފަށާފައެވެ. އެގޮތުން ޕާޓީގެ މެމްބަރުންނާއި، ގައުމީ މަޖިލީހުގެ މެމްބަރުންގެ އިތުރުން ސަރުކާރުގައި ހިމެނިވަޑައިގަންނަވާ ވަޒީރުން ވަނީ، ހުކުރު ދުވަހު ރަށްރަށަށް ވަޑައިގެންފައެވެ.

ސަރުކާރު މައި ކޯލިޝަން އެމްޑީޕީން ހޮނިހިރު ދުވަހު ހިންގުމަށް ހަމަޖެހިފައިވާ ވޯކްޝޮޕާ ބެހޭ މައުލޫމާތު ރާއްޖެ.އެމްވީ އާ ހިއްސާކުރަައްވަމުން އެމްޑީޕީގެ ޗެއަރޕަސަަން ހަސަން ލަތީފް ވިދާޅުވީ، ވޯކްޝޮޕްގައި މައިގަނޑު ގޮތެއްގައި މަޝްވަރާކުރާނީ ''އެޖެންޑާ 19 ރަށަށް'' ސްލޯގަންގެ ދަށުން ބުރާސްފަތި އަދި ހުކުރު ދުވަހު ރަށްރަށުގައި ހަރަކާތްތެރިވާ ޓީމުތަކުން ''ދޮރުން ދޮރަށް'' ގޮސް އެއްކުރާ މައުލޫމާތުތަކުގެ މައްޗަށް ކަމަށެވެ.

އެމްޑީޕީގެ ވޯކްޝޮޕް ކުރިޔަށްދާނީ ހޮނިހިރު ދުވަހު ދިހަޔަކުން ފަހަކަށެވެ. ޖުމްލަ 18 ރަށެއްގައި ހިންގާ މި ވޯކްޝޮޕްގެ ތެރެއިން މާލޭގައި ބާއްވާ ވޯކްޝޮޕް އޮންނާނީ ދަރުބާރުގޭގައެވެ.

ހަސަން ލަތީފް ވިދާޅުވީ، ވޯކްޝޮޕް ހިންގާނީ ގްރޫޕުތަކަށް ބަހާލައިގެން ކަމަށާއި، އެ ބައްދަލުވުމުގައި ކުރިޔަށް އޮތްތަނުގައި ކައުންސިލްތަކަށް ހިންގޭނެ މަޝްރޫއުތަށް ދެނެގަނެވޭނެ ކަމަށެވެ. މާލޭގައި ބާއްވާ ވޯކްޝޮޕް އޮންނާނީ ހެނދުނު 09:45 އަކުން ހަވީރު 15:30 އަށެވެ.

އެމްޑީޕީން ބުނީ، މާލޭގައި ބާއްވާ ވޯކްޝޮޕްގައި މާލެ ދާއިރާއަށް ވާދަކުރާ ކެނޑިޑޭޓުންނާއި، ކައުންސިލަރުންގެ އަދި އެމްޑީޕީގެ ވަޒީރުންގެ އިތުުރުން އާއްމު މެމްބަރުންނަށް ބައިވެރިވެވޭނެ ކަމަށެވެ. ހަސަން ލަތީފް ވިދާޅުވީ ގޮތުގައި ވޯކްޝޮޕްގެ މުހިއްމު ކަމަކީ މާލެއަށް ''ވާންވީ'' ގޮތް ކަރުދާހެއްގެ ސިފައިގައި އެކުލެވުމެެވެ.

ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރުކަންވެސް ކުރައްވާ ހަސަން ލަތީފް ގަބޫލުފުޅު ކުރައްވާ ގޮތުގައި ހޮނިހިރު ދުވަހު އޮންނަ ވޯކްޝޮޕްގައި މާލެއަށް ހާއްސަކޮށްގެން 12 ވަރަކަށް ޕްރޮޖެކްޓްގެ އޮނިގަނޑު އެކުލަވައިލެވޭނެއެވެ.

އޭގެ ތެރޭގައި، މާލެ ރައްޔިތުންގެ ބޯހިޔާވަހިކަމަށް ހައްލުގެންނާނެ ގޮތުގެ ކަރުދާހެއް އެކުލަވައިލެވޭނެ އެވެ. ހަސަން ލަތީފް ވިދާޅުވީ ވޯކްޝޮޕްގައި ރާވާ މަޝްރޫއުތަކުން އެތައް ވަޒީފާތަކެއް އުފެދިގެން އަންނަން ޖެހޭ ކަމަށެވެ. އެމްޑީޕީން ވަނީ އެ ޕާޓީގެ ވީހާވެސް ގިނަ ބަޔަކު ވޯކްޝޮޕްގައި ބައިވެރިވުމަށް ދައުވަތުދީފައެވެެ. ލޯކަލް ކައުންސިލް އިންތިހާބަށް އެމްޑީޕީން ބާއްވާ ޕްރައިމަރީ އޮންނާނީ މި ހިނގާ މަހުގެ 31 ގައެވެ.