ޓައިގާ ޝްރޯފް އާއި އޭނާގެ ބައްޕަ ޖެކީ ޝްރޯފް ފުރަތަމަ ފަހަރަށް އެކުގައި "ބާގީ 3" ގައި ފެނިގެންދާނެ ކަމަށް ރިޕޯޓްތައް ބުނެފިއެވެ.
ރިޕޯޓްތައް ބުނާގޮތުން އަހުމަދު ޚާން ޑައިރެކްޓްކުރާ މި ފިލްމްގައި ޖެކީ ފެނިގެންދާނީ ޓައިގާގެ ބައްޕަގެ ރޯލުންނެވެ.
މުމްބާއީ މިޜޯގައި ރިޕޯޓްކޮށްފައިވާގޮތުން ޖެކީ ވަނީ މި ފިލްމްގެ ޝޫޓިން މި މަހުގެ 20 ގައި މުމްބާއީގައި ފަށާފައެވެ.
ފިލްމްގް ޕްރޮޑިއުސަރ ސާޖިދު ނަދިއަވާލާ ބުނެފައިވަނީ ދެބަފައިން އެކުގައި ފެނިގެންދާނެ ދުވަހަކަށް އެންމެންވެސް ތިބީ އިންތިޒާރުގައި ކަމަށެވެ. ނަމަވެސް ފާއިތުވި ހަ އަހަރުގެ ތެރޭގައި އެއްވެސް މީހަކު އެދެތަރިން އެކުގައި ފިލްމެއް ކުޅުވާފައި ނުވާ ކަމަށެވެ. އަދި އޭނާ އާއި އަހުމަދު އަށް ފިލްމްގެ ވާހަކަ އަށް ބަލާފައި އެރޯލަށް އެންމެ ކަމުދަނީ ޖެކީ ކަމަށް ފެންނާތީ ޖެކީ އަށް އެ މުހިއްމު ރޯލް ދިނުމަށް ނިންމީ ކަމަށް ސާޖިދު ވަނީ ބުނެފައެވެ.
ރިޕޯޓްތައް ބުނާގޮތުން ޖެކީ ގެ ޝޫޓިންތައް ޝެޑިއުލް ކޮށްފައިވަނީ ފަސް ދުވަހަށެވެ. ޖެކީ އަދާކުރާނީ ސިފައިންގެ މީހެއް ގެ ރޯލް ކަމަށާއި އޭނާ އަކީ ޓައިގާ އާއި ރިތޭޝް ދޭޝްމުކްގެ ބައްޕަ ކަމަށް ރިޕޯޓްތައް ބުނެއެވެ.
ޓައިގާ ވަނީ މީގެ ކުރިން އެކްޝަން ސީން އަކަށް ފަރިތަ ކުރާ މަންޒަރު ފެންނަ ވީޑިއޯއެއް ހިއްސާކޮށްފައެވެ.
"ބާގީ 3" ގައި ބަތަލާއިންގެ ރޯލުން ފެނިގެންދާނީ ޝްރައްދާ ކަޕޫރާއި، އަންކީތާ ލޯކާންޑޭ އެވެ. މި ފިލްމް ރިލީޒް ކުރުމަށް ހަމަޖެހިފައިވަނީ މިއަހަރުގެ މާރޗް މަހުއެވެ.
