ކޮރޯނާ ވައިރަސް: ޗައިނާގެ ވުހާން ސިޓީގެ އާންމު ދަތުރުފަތުރު ހުއްޓުމަކަށް

ޗައިނާގައި މިހާރު ފެތުރެމުންދާ ކޮރޯނާ ވައިރަސްގެ ސަބަބުން އެޤައުމުގެ ވުހާން ސީޓިގެ ޢާއްމު ދަތުރުފަތުރުތަކުގެ ޚިދުމަތް ވަގުތީ ގޮތުން މެދުކަނޑާލައިފިއެވެ.

ބައިނަލްއަޤުވާމީ މީޑީއާތަކުން ރިޕޯޓުކުރާގޮތުގައި ޗައިނޭގެ މެދުތެރޭ ހުބެއި ޕްރޮވިންސްގެ ވެރިރަށް ވުހާން ސިޓީގައި ހަލުވިކަމާއެކު ކޮރޯނާ ވައިރަސް ފެތުރެމުންދާތީ އެ ސިޓީގެ އާންމު ރައްޔިތުންނަށް ދަތުރުފަތުރު ނުކުރުމަށް ކަމާއި ބެހޭ ފަރާތްތަކުން ވަނީ އަންގާފައެވެ. ނުވަ މިލިޔަނާއި ގާތް ކުރާ ޢަދަދެއްގެ އާބާދީއެއް އޮންނަ ވުހާން ސިޓީގެ ރައްޔިތުން އެ ސިޓީ ދޫކޮށް އެހެން އަވަށްތަކައް ދަތުރު ނުކުރުމަށާއި، މަޖްބޫރީ ޙާލަތެއްގައި ނުވަތަ ޒަރޫރީ ބޭނުމެއްގައި މެނުވީ ގިނަ މީހުން ހެލިފެލިވެ އުޅޭ ތަންތަނަށާއި އެއްވެއްތަކަށް ނުދިއުމަށް ކަމާއި ބެހޭ ފަރާތްތަކުން ވަނީ އިލްތިމާސްކޮށްފައެވެ.

ހަމަ އެއާއެކު ވުހާން ސިޓީގެ ޢާންމު ދަތުރުފަތުރުތައް ވެސް ވަނީ 23 ވާ ބުރާސްފަތިދުވަހުގެ ހެދުނު ދިހައަކުން ފެށިގެން ވަގުތީ ގޮތުން މެދުކަނޑާލާފައެވެ. އެގޮތުން ވައިގެ ބަނދަރާއި ރޭލްވޭ ބަނދަރުތަކުގެ ތާވަލު ދަތުރުތައް ވަނީ ހުއްޓާލާފައެވެ. ހަމަ އެއާއެކު، އާއްމު ބަސްދަތުރުތަކާއި، ފެރީ ދަތުރުތައް ހުއްޓާލާ ސަބްވޭއިސްތައްވެސް މިހާރުވަނީ ބަންދުކޮށްފައެވެ. ވަކިން ޚާއްޞަކޮށް ދިގު ދަތުރުތަކާއި، އެ ސިޓީން ބޭރަށް ކުރާ ދަތުރުތައް މުއްދަތެއް ނެތްގޮތައްވަނީ ހުއްޓާލާފައެވެ.

އާންމު ދަތުރުފަތުރުތައް ހުއްޓާލާ އާންމު ރައްޔިތުން ސަމާލުވުމަށް އިރުޝާދުދީ އިލްތިމާސް ކުރިނަމަވެސް، އަލުން މިދަތުރުފަތުރުތައް ފަށާނެ ތާރީޚެއް ކަމާއިބެހޭ ފަރާތްތަކުން އަދި އިޢުލާނެއް ނުކުރެއެވެ. ކުރިޔަށް އޮތީ ޗައިނާގެ އާއަރުކަމަށްވެފައި، މި ދުވަސްވަރަކީ ޗައިނާގެ ރައްޔިތުން ގިނައިން އަހަރީ ޗުއްޓީއަށް ދުރާލާ ތައްޔާރުވެެގެން އެހެން ސިޓީތަކާއި ބޭރު ޤައުމުތަކަށް ހިތްހަމަ ޖައްސާލަން ދާ ދުވަސްވަރެވެ. އެހެންނަމަވެސް ކޮރޯނާ ވައިރަސް އައުޓްބްރޭކާއި ގުޅިގެން ކަމާއިބެހޭ ފަރާތްތަކުން ސަލާމަތާއި ރައްކާތެރިކަމަށް އަޅަމުންދާ ފިޔަވަޅުތަކުގެ ސަބަބުން މިކަމަށްވަނީ ބުރޫ އަރާފައެވެ. މުޅި ސިޓީވެސް ސިފަވަނީ މަރުވެފައިވާ އޮންނަ ގޮތަކައް ކަމަށާއި،އަދި އެސިޓީގެ އާންމުންވެސް މާޔޫވެފައިވާކަމަށް ބައެއް މީޑިއާ ރިޕޯޓުތައް ބުނެއެވެ. ވައިރަސް އަރާފާނެ ކަމުގެ ބިރު ހީވެ ގިނަ ބަޔަކު ބިރުވެރިކަމެއްގެ ތެރޭގައި ތިބިކަމަށްވެސް ރިޕޯޓުކޮށްފައިވެއެވެ.

ޗައިނާގައި މިފަހަރު ކޮރޯނާ ވައިރަސް ފެތުރެން ފެށިފަހުން މިހާތަނަށް އެވައިރަސްގައި 17 މީހުން މަރުވެފައިވެއެވެ. އަދި އިތުރު 500 މީހުންނަށް މިވައިރަސް ޖެހިގެން މިހާރުވެސް ފަރުވާހޯދަމުން އަންނަ ކަމަށް ޗައިނާގެ ދައުލަތުގެ މީޑިއާއިން ރިޕޯޓުކޮށްފައިވެއެވެ. ވުހާން ސިޓީގެ އިތުރުން އެސިޓީގެ ވަށައިގެންވާ އެހެނިހެން އަވަށްތަކަށްވެސް ވައިރަސް ފެތުރެން މިހާރު ވަނީ ފަށާފައެެވެ. ޗައިނާގެ ކޮރޯނާ ވައިރަސް ފެތުރެމުން ދިޔަނަމަވެސް އަދި ދުނިޔޭގެ ޞިއްޙަތާއި ބެހޭ ޖަމްޢިއްޔާ (ޑަބްލިއުއެއެޗްއޯ) އިން މިއީ، "ގްލޯބަލް އެމަރޖެންސީ" އެއް ނުވަތަ މުޅި ދުނިޔެ ސަމާލުކަމަށް އަންނަވީ ކަމެއްގެ ގޮތުގައި ކަނޑައަޅާފައެއް ނުވެއެވެ. އެހެންނަމަވެސް މިކަމާއި ގުޅޭ މަޝްވަރާތައް ބުދަދުވަހު އެޖަމާއަތުގެ އެމަރޖެންސީ ކޮމީޓީގައި މަޝްވަރާކޮށްފައިވެއެވެ. ބުދަ ދުވަހުވެސް މިކަމާއި ގުޅޭ މަޝްވަރާ ކުރުމަށް ވަނީ ތާވަލުކޮށްފައެވެ.

ޗައިނާގައި ފެތުރިގެން މިއުޅޭ ކޮރޯނާ ވައިރަސް ގެ ވައްތަރު މިހާރު އެމެރިކާއާއި ތައިލޭންޑާއި ދެކުނު ކޮރެއާއިން ވަނީ ފެނިފައެވެ.

މީގެ ކުރިން 2000 ހުގެ ކުރީކޮޅު ދުނިޔޭގައި ފެތުރުނު ކޮރޯނާ ވައިރަސްގެ ވައްތަރެއްކަމުގައިވާ "ސާރސް" ވައިރަސް ޖެހިގެން މުޅި ދުނިޔެއިން ޖުމުލަ 800 މީހުން މަރުވިއެވެ.