ރާއްޖެ ބަދަލުކުރަން ބޭނުންވަނީނަމަ، ފުރަތަމަ އިންސާނުންނަށް ބަދަލުވޭ: ރައީސް ނަޝީދު

ރާއްޖެ ބަދަލުކުރަން ބޭނުންވަނީނަމަ، އެންމެ ފުރަތަމަ އިންސާނުންނަށް ވާން އެބަޖެހޭ ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ކ. ގުރައިދޫގައި އިމާރާތްކޮށްފައިވާ އެމްޑީޕީގެ ހަރުގެ ހުޅުވަން ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން، ނަޝީދު މިހެން ވިދާޅުވީ ދެ އަހަރުގެ ތުއްތު ކުއްޖަކު ރޭޕްކުރި މައްސަލައަށް އިޝާރާތްކުރައްވައެވެ.

ނަޝީދު ވިދާޅުވީ މިކަން ކުރަން، މާތް ރަސްކަލާންގެ އަންގަވާފައިވާ ގޮތްތަކުގެ މަތިންނާއި، އިންސާނީ އާންމު އުސޫލުތަކުގައި ދިރިއުޅޭ ބަޔަކަށް ދިވެހިން ވާންޖެހޭ ކަމަށެވެ. އަދި ކުޑަކުދިންގެ ހައްގުތައް ރައްކާތެރިކުރުމަށް މުއައްސަސާތަކުންވެސް ތާއަބަދުމެ ފާރަލާލާ ތިބެންޖެހޭ ކަމަށް ވިދާޅުވިއެވެ.

ފުރަތަމަ ކަށަވަރުކޮށްދޭންވީ ކުޑަކުދިންގެ ހައްގުތައް ކަމަށާއި، އަދި އެންމެ ވޯޓެއް ނުލިބުނު ކަމުގައިވިޔަސް، އެއީ ކުރަންޖެހޭ ކަމެއްކަމަށް ނަޝީދު ވިދާޅުވިއެވެ. އަދި އެއީ އެމްޑީޕީގެ ހަގީގީ މަގުސަދަށް ވާންޖެހޭ ކަމަށް އެ ޕާޓީއަށް ނިސްބަތްވެވަޑައިގަންނަވާ ހުރިހާ ފަރާތްތަކަށް ނަޝީދު ގޮވާލެއްވިއެވެ.

ނަޝީދު ވަނީ ކުޑަކުދިންނަށް ޖިންސީ ގޯނާކުރާ މައްސަލަތަކުގައި އާއިލާ އަދި ގާތްތިމާގެ މީހުން ހަނު ހުންނަ މައްސަލައަށް ފާޑު ވިދާޅުވެ، އެހެން އެކަން ނުކުރުމަށް ގޮވާލާފައެވެ. އަދި ކުދިންނަށް ސަލާމަތްތެރިކަމާއެކުގައި ނޫޅެވޭނެ މާހައުލެއް އޮތުމަކީ އެމްޑީޕީން ސަރުކާރުން ހިންގާނެ ގޮތެއް ނޫންކަމަށެވެ.

ޒަމާންތަކެއް ވަންދެން މިމައްސަލައާ މެދު "ވަރިހަމަ" ވެފައި ތިބެވިއްޖެ ކަމަށާއި، ދެން އެހެން ކަން ވިޔަ ނުދޭނެ ކަމަށް ނަޝީދު ވިދާޅުވިއެވެ. ނަޝީދު ވަނީ މީގެކުރިންވެސް، ކުޑަކުދިންގެ ހައްގުތައް ރައްކާތެރިކޮށް ނުދެވެނީނަމަ، ސިޔާސީ މަސައްކަތުގައި އުޅުމުގެ ބޭނުމެއް ނެތް ކަމަށް ވިދާޅުވެފައެވެ.

ދެކުނުގެ ރަށެއްގައި، އާއިލާގެ ޒިންމާދާރު މަގާމުތަކުގައި ތިބި ބަޔަކު ގުޅިގެން، އެންމެ ދެ އަހަރުގެ ތުއްތު ކުއްޖާ ރޭޕްކުރި މައްސަލައިގައި އާންމުންގެ ގިނަ ބަޔަކު އަންނަނީ ކަނބޮޑުވުން ފާޅުކުރަމުންނެވެ. އަދި މިކަމުގައި ބައިވެރިވި އެންމެންނަށް ހަރުކަށި އަދަބު ދިނުމަށްވެސް އަންނަނީ ގޮވާލަމުންނެވެ.