އަންހެނުން ޚިތާނު ކުރުމަކީ ސަރުކާރުން ހިތްވަރުދޭ ކަމެއް ނޫން، ސިޔާސަތެއްވެސް ނޫން: މިނިސްޓަރ
22 ޖެނުއަރީ 2020 | ބުދަ 14:15މިނިސްޓަރ ވަނީ އެ ސިޓީ ބާތިލު ކޮށްދިނުމަށް ދަންނަވާފައި
މިނިސްޓަރ އޮފް ހެލްތު އަބްދުﷲ އަމީން
އަންހެނުން ޚިތާނު ކުރުމަކީ ސަރުކާރުގެ ސިޔާސަތެއްނޫން ކަމަށާއި، އެއީ ސަރުކާރުން ހިތްވަރުދޭ ކަމެއްވެސް ނޫންކަމަށް މިނިސްޓަރ އޮފް ހެލްތު އަބްދުﷲ އަމީން ވިދާޅުވެއްޖެއެވެ.
އަންހެންކުދިން ޚިތާނު ކުރުމާއި ގުޅޭގޮތުން އިސްލާމިކް މިނިސްޓްރީގެ ރައުޔަކަށް އެދި ހެލްތް ޕްރޮޓެކްޝަން އޭޖެންސީން ފޮނުވާފައިވާ ސިޓީ ބާތިލު ކޮށްދިނުމަށް ދަންނަވައި މިނިސްޓަރުގެ ބިއުރޯއިން ފޮނުވި މެމޯއެއްގައި ބުނީ، އަންހެނުން ޚިތާނު ކުރުމަކީ ސަރުކާރުގެ ސިޔާސަތެއްނޫން ކަމަށެވެ. އަދި އެކަމަކީ ސަރުކާރުން ހިތްވަރުދޭ ކަމެއް ނޫންކަމަށް ވިދާޅުވެ މިނިސްޓަރ ވަނީ އެކަމުގައި ލަފައެއް ހޯދަންޖެހޭ ޙާލަތެއް އޮތްކަމަށް ދެކިވަޑައިނުގަންނަވާ ކަމަށް ވިދާޅުވެފައެވެ.
މިނިސްޓަރ އެހެން ވިދާޅުވެފައިވާއިރު، އިސްލާމިކް މިނިސްޓްރީން ވަނީ އިސްލާމީ ފަތުވާދޭ އެންމެ މަތީ މަޖިލީހަށް އެކަމާ ގުޅޭގޮތުން ދީނީ ރައުޔެއް ބަޔާން ކޮށްދިނުމަށް އެދި ހުށައަޅާފައެވެ.
އެކަމާ ގުޅޭގޮތުން ކުރީގެ ރައީސް މައުމޫނު ޢަބްދުލް ޤައްޔޫމުވެސް ވަނީ ހިޔާލު ފާޅުކުރައްވާފައެވެ. އެގޮތުން މައުމޫނު ކުރެއްވި ޓްވީޓެއްގައި ވިދާޅުވީ، އިސްލާމް ދީން ގޮވާލަނީ މީހުންގެ ޖިސްމާނީ، ނަފްސާނީ އަދި ރޫޙާނީ ދުޅަހެއުކަމަށް ކަމަށެވެ. އަދި ދީނުގައި އަންހެން ކުދިން ހިތާނު ކުރަންޖެހޭ އެއްވެސް އަސާސެއް ނެތް ކަމަށް އެމަނިކުފާނު ވިދާޅުވި އެވެ.
