ހިމަބިއްސަށް ޓެސްޓް ކުރި 79 މީހުންގެ ތެރެއިން، ބަލި ފެނުނީ ހަތަރު މީހެއްގެ ގައިން
22 ޖެނުއަރީ 2020 | ބުދަ 12:04ފާއިތުވި ދެ ދުވަހު އެއްވެސް މީހަކު ޕޮޒިޓިވް ވެފައެއް ނުވޭ
ހެލްތް މިނިސްޓްރީން މީގެކުރިން ބޭއްވި ނޫސްވެރިންގެ ބައްދަލުވުމެއްގެ ތެރެއިން--
ހިމަބިއްސަށް ޝައްކުކުރެވިގެން މިހާތަނަށް ޓެސްޓްކުރި 79 މީހުންގެ ތެރެއިން، 4 މީހަކު ބައްޔަށް ޕޮޒިޓިވް ވެފައިވާކަމަށް ހެލްތް މިނިސްޓްރީން ބުނެފި އެވެ.
ހިމަބިހި ކޮންޓްރޯލްކުރުމަށް ކުރާ މަސައްކަތްތަކާއި ގުޅޭ މަޢުލޫމާތު ހިއްސާކުރެއްވުމަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހެލްތު މިނިސްޓަރ އަބްދުﷲ އަމީން ވިދާޅުވީ، ފާއިތުވި ދެ ދުވަސް ތެރޭގައި އެއްވެސް މީހަކު ހިމަބިއްސަށް ޕޮޒިޓިވް ވެފައި ނުވާކަމަށެވެ.
އަމީން ވިދާޅުވީ، ހިމަބިއްސަށް ޝައްކުކުރެވޭ މީހަކު ފެނިއްޖެނަމަ އެ މީހަކު ވަށައިގެން ދިރިއުޅޭ މީހުންނަށް ވެކްސިން ދީފައިވާ ކަމަށެވެ. އަދި މިހާތަނަށް 3،100 މީހުންނަށް ވެކްސިން ދީފައިވާ ކަމަށް ވެސް އަމީން ވިދާޅުވިއެވެ.
އަމީން ވިދާޅުވީ، ކުރިން ހާމަކޮށްފައިވާ ފަދައިން، ދެ ލައްކަ މީހުންނަށް ވާވަރަށް ވެކްސިން ގެނައުމުގެ މަސައްކަތް ކުރަމުންދާ ކަމަށާއި، އެގޮތުން އިންޑިއާ ސަރުކާރާ އެކު ކުރި މަސައްކަތުގެ ދަށުން 30 ހާސް ވެކްސިން ޑޯޒް ބުރާސްފަތި ދުވަހު ރާއްޖެ ގެނެވޭނެ ކަމަށެވެ.
އެ ވެކްސިންތައް ގެނައުމާއި އެކު މުޅި ރާއްޖެއަށް އަމާޒުކޮށްގެން ވެކްސިން ޖެހުމުގެ ކެމްޕެއިނެއް ކުރިޔަށް ގެންދިއުމަށް ހެލްތް މިނިސްޓްރީން ވަނީ ނިންމާފައެވެ.
ހިމަބިހި އެންމެ ފުރަތަމަ ޖެހުނީ ކުޑަ ކުއްޖަކަށެވެ. އެކުއްޖާއަކީ ވެކްސިން ޑޯޒް ހަމަކޮށްފައި ނުވާ ކުއްޖެކެވެ. އޭގެފަހުން ހަތަރު މީހަކު ހިމަބިއްސަށް ޕޮޒިޓިވް ވެފައި ވެއެވެ.
