"ސައުތް އޭޝިއާ ރިލިޖަސް ލީޑާރސް ޕްލެޓްފޯމް ފޯ ޗިލްޑްރަން" ގެ ބައްދަލުވުމުގައި ރާއްޖެއިން ބައިވެރިވަނީ

ދެވަނަ ސައުތް އޭޝިއާ ރިލިޖަސް ލީޑާރސް ޕްލެޓްފޯމް ފޯ ޗިލްޑްރަން ގެ ބައްދަލުވުމުގައި ބައިވެރިވުމަށް، މިނިސްޓްރީ އޮފް އިސްލާމިކް އެފެއާރޒްގެ ފަރާތުން ފަސް އިލްމުވެރިއަކު ބޫޓާނަށް ދިއުމަށް ހަމަޖެހިއްޖެ އެވެ.

މި ބައްދަލުވުމަކީ "ކޮންވެންޝަން އޮން ދަ ރައިޓްސް އޮފް ޗައިލްޑް" (ސީ.އާރު.ސީ) ގެ 30 ވަނަ އަހަރީ ދުވަސް ފާހަގަކުރުމުގެ ގޮތުން ކުރިއަށްގެންދާ ބައްދަލުވުމެކެވެ.

Advertisement

ޔުނިސެފްގެ ފަރާތުން ރާވައިގެން ކުރިއަށްގެންދާ މި ބައްދަލުވުމުގައި ސައުތް އޭޝިޔާގެ ކުޑަކުދިންގެ ހައްގުތަކާއި އަދި މި ހައްގުތައް އަދާކޮށްދިނުމުގައި ދީނީ އިލްމުވެރިންގެ ދައުރާއި ބެހޭގޮތުން މަޝްވަރާކުރުމުގެ ފުރުސަތު ލިބިގެންދާނެއެވެ.

ބޫޓާންގެ ވެރިރަށް ތިމްޕޫގެ, ލެ މެރީޑިއަން ރިވަރ ފްރަންޓް ހޮޓަލުގައި މި ޖެނުއަރީ މަހުގެ 28 އިން 29 ވަނަ ދުވަހަށް ބޭއްވުމަށް ހަމަޖެހިފައިވާ ބައްދަލުވުމުގެ ތީމެއްގެ ގޮތުގައި ކަނޑައަޅާފައިވަނީ "ރިލިޖިއަން އެންޑް ޗިލްޑްރަން ރައިޓްސް އިން ސައުތް އޭޝިޔާ" އެވެ.

މި ތީމްގެ ދަށުން މައިގަނޑުގޮތެއްގައި މަޝްވަރާކުރުމަށް ހަމަޖެހިފައިވަނީ 4 މައުޟޫއަކަށެވެ. އެއީ "ވެލިއުސް، ސްޕިރިޗުއަލިޓީ އެންޑް ޕޮލިސީ ފޯ ޗިލްޑްރަން ޑިވެލޮޕްމަންޓް"، ޕްރިވެންޓިން އެގެއިންސްޓް ޗިލްޑްރަން"، އެންކަރޭޖިން މީނިންގްފުލް ޔޫތް އެންޑް ޗިލްޑްރަން ޕާޓީސިޕޭޝަން" އަދި ޕްރިވެންޓިން ޖެންޑަރ އިން އީކުއަލިޓީ އިން އެކްސެސިން ޗިލްޑްރަންސް ރައިޓްސް" އެވެ.

މި ބައްދަލުވުމުގެ މައިގަނޑު މަޤްސަދުތަކުގެ ތެރޭގައި ހިމެނެނީ ސީ.އާރް.ސީ ކުރިއަރުވާފައިވާ މިންވަރާއި، އެކަމަށް ހުރި ގޮންޖެހުންތައް ދެނެގަތުމާއި އަދި ދުނިޔޭގެ ފެންވަރުގައި އާއި ސަރަހައްދީ ފެންވަރުގައި މިކަމުގައި ދީނީ އިލްމުވެރިންގެ ދައުރު ބަޔާންކޮށްދިނުމެވެ.

އޭގެއިތުރުން، ސައުތު އޭޝިޔާގެ 8 ގައުމުގައި ސީ.އާރު.ސީ ކުރިއެރުވުމުގައި އެކި ދީންތަކާއި އަދި ދީނީ ލީޑަރުންގެ ނުފޫޒް އޮތް ދާއިރާތައް ދެނެގަތުން ހިމެނެއެވެ. މީގެ އިތުރުން ދީނީ ލީޑަރުން ސީ.އާރު.ސީ ހަލުވިކަމާއިއެކު ކުރިއަރުވަން އަދާކުރެވިދާނެ ރޯލާއި، އަދި އިސްކަންދޭންޖެހޭ ކަންތައްތައް ދެނެގަތުމާއިއެކު ދީނީ ޖަމިއްޔާތަކާއި ޔުނިސެފަށް މިކަމަށް ބޭނުންވާ އޮޕަރޭޝަނަލް ސްޓްރެޓަޖީއެއް އެކުލަވާލުން ހިމެނެއެވެ.

މިނިސްޓްރީ އޮފް އިސްލާމިކް އެފެއަރޒްގެ ފަރާތުން މި ބައްދަލުވުމުގައި ބައިވެރިވުމަށް ހަމަޖެހިފައިވަނީ މޯލްޑިވްސް އިސްލާމިކް ޔުނިވަރސިޓީގެ ޑެޕިއުޓީ ވައިސްޗާންސެލަރ ޑރ. ސައުދުﷲ އަލީ އާއި މޯލްޑިވްސް ނެޝަނަލް ޔުނިވަރސިޓީގެ ސީނިއަރ ލެކްޗަރަރ ޑރ. އަބްދުއްސައްތާރު އަބްދުއްރަހުމާން އާއި މިނިސްޓްރީ އޮފް އިސްލާމިކް އެފެއަރޒް މުސާއީދު ވާއިޒު އައްޝައިޚް އިއްޒުއްދީން އަދުނާނު އަދި މޯލްޑިވްސް އިސްލާމިކް ޔުނިވަރސިޓީގެ ލެކްޗަރަރ އައްޝައިޚް ނިމާލް މުހައްމަދު އެވެ. މި ބޭފޫޅުން ބޫޓާނަށް ފުރުމަށް ހަމަޖެހިފައިވަނީ މިމަހުގެ 26 ވަނަ ދުވަހު އެވެ.