ކޮރޯނާ ވައިރަސް އާ ގުޅިގެން ރައްކާތެރިކަމުގެ ފިޔަވަޅު ވަނީ އަޅާފައި: ޓުއަރިޒަމް މިނިސްޓްރީ
އާންމުންނާއި ރާއްޖެ އަންނަ ފަތުރުވެރިން، ކްރޯނާ ވައިރަސް އިން ރައްކާތެރިކުރުމަށް ކުރަން ޖެހޭ ހުރިހާ އިންތިޒާމްތަކެއް ހަމަޖައްސާފައިވާނެ
ވެލާނާ އިންޓަރނޭޝަނަލް އެއަރޕޯޓް
ޗައިނާގައި ފެތުރެމުންދާ ކޮރޯނާ ވައިރަސް އާ ގުޅިގެން ރައްކާތެރިވުމުގެ ވަނީ އަޅާފައި ކަމަށް ޓުއަރިޒަމް މިނިސްޓްރީން ބުނެފިއެވެ.
އެ މިނިސްޓްރީން ނެރުނު ނޫސްބަޔާނެއްގައި ބުނެފައިވަނީ ޓުއަރިޒަމް މިނިސްޓްރީއާއި ކަމާބެހޭ ފަރާތްތައް ގުޅިގެން އަޅަންޖެހޭ ހުރިހާ ފިޔަވަޅެއް އަޅާފައިވާ ކަމުގެ ފުރިހަމަ ޔަޤީންކަން ދޭ ކަމަށެވެ. އެގޮތުން ޢާންމުންނާއި ރާއްޖެ އަންނަ ފަތުރުވެރިން، ކޮރޯނާ ވައިރަސް އިން ރައްކާތެރިކުރުމަށް ކުރަން ޖެހޭ ހުރިހާ އިންތިޒާމުތަކެއް ހަމަޖައްސާފައިވާ ކަމަށެވެ.
މީގެ އިތުރުން ވެލާނާ އިންޓަރނޭޝަނަލް އެއަރޕޯޓުން ރާއްޖެ އެތެރެވާ ފަރާތްތައް ސްކޭންކުރުމުގެ މަސައްކަތް މިހާރު ފަށާފައިވާ ކަމަށާއި، މިހާތަނަށް ކޮރޯނާ ވައިރަސްގެ ކޭސްއެއް ފެނިފައިވާ ނުވާކަމަށް ޓުއަރިޒަމް މިނިސްޓްރީގެ ބަޔާނުގައި ވަނީ ބުނެފައެވެ.
މީގެ އިތުރުން ސަރުކާރުގެ އެންމެ ބޮޑު އިސްކަމެއް ދެމުންދާނީ އެންމެންނަށް ރައްކާތެރިކަން ކަށަވަރުކޮށްދިނުން ކަމަށާއި، އަޅަންޖެހޭ ހުރިހާ ފިޔަވަޅުތަކެއް މިކަމުގައި އަޅަމުންދާނެ ކަމަށް ބަޔާނުގައި ބުނެފައިވެއެވެ.
ޗައިނާގެ ހޫބޭ ޕްރޮވިންސްގެ ވުހާން ސިޓީގައި ފެތުރެމުންދިޔަ ނޭވާލާ ނިޒާމަށް އަސަރުކުރުވާ ގޮތްނޭނގޭ ބައްޔަކީ ކޮރޯނާ ވައިރަސް ޢާއިލާގެ އަލަށް ފެނުނު ނޮވެލް ކޮރޯނާ ވައިރަސްއިން ޖެހޭ ބައްޔެއްކަމުގައި ހޯދިފައިވާ ކަމަށެވެ.
ޗައިނާގައި މި އައުޓްބްރޭކްގައި ބަލިވި ގިނަ މީހުންނަކީ ސީފުޑް އާއި ޖަނަވާރު ވިއްކާ މާރުކޭޓެއްގައި މަސައްކަތްކުރަމުންދިޔަ މީހުންނާއި އެތަނަށް އެކި ކަންކަމުގައި ގޮސްފައިވާ މީހުން ކަމަށް އެޗްޕީއޭގެ ބަޔާނުގައި ބުނެފައިވެއެވެ.
