ސިންތެޓިކް ޓްރެކެއް ފުވައްމުލަކުގައި އަޅަނީ!

ކުރިން އައްޑޫ ސިޓީގައި އެޅުމަށް ނިންމި ސިންތެޓިކް ޓްރެކް ފުވައްމުލަކުގައި އަޅަން ނިންމައިފައިވާކަމަށް ކުޅިވަރާއި ބެހޭ ވަޒީރު އަހުމަދު މަހުލޫފް ވިދާޅުވެއްޖެއެވެ.

ރާއްޖެ ޓީވީގެ ކުޅިވަރު ފައިލް ޕްރޮގްރާމްގައި ވާހަކަދައްކަވަމުން މިނިސްޓަރ މަހުލޫފް ވިދާޅުވީ ކުރިން އައްޑޫ ސިޓީގެ ހިތަދޫގައި އެޅުމަށް ނިންމި ނަމަވެސް އަދިވެސް ހިތަދޫގައި ސިންތެޓިކް ޓްރެކް އެޅުމަށް މަސައްކަތް ކުރާނެ ކަމަށެވެ.

ޔޫތް މިނިސްޓްރީއިން ސިންތެޓިކް ޓްރެކް އެޅުމަށް ބޭނުންވާ ބީއޯކިއު ހެދުމުގެ މަސައްކަތް ވަނީ ނިމިދިޔަ ނޮވެމްބަރު މަހު ފަސް ވަނަ ދުވަހު ހެކްޒާ ކޮމްޕެނީއާއި ހަވާލުކޮށްފައެވެ. މިނިސްޓްރީއިން ބުނީ މި ސިންތެޓިކް ޓްރެކް އެޅުމަށް ބޭނުންވާ ބީއޯކިއު ހަދައި ނިމިފައިވާ ކަމަށާއި މިހާރު ކުރެވެމުންދާ މަސައްކަތަކީ މި ޓްރެކްތަކުގެ މަސައްކަތް ބަޔަކާއި ހަވާލުކުރުން ކަމަށެވެ.

މިނިސްޓަރ މަހުލޫފް ވިދާޅުވީ ރާއްޖެތެރޭގައި ރަނގަޅު ފެންވަރުގެ ސިންތެޓިކް ޓްރެކްތައް އެޅުމުން ކުޅިވަރު ތަރައްގީ ކުރުމަށް ކުރަމުންދާ މަސައްކަތުގެ ތެރެއިން ބޮޑެތި ކުރި އެރުންތަކެއް ލިބޭނެ ކަމަށެވެ.

ފުރަތަމަ ސިންތެޓިކް ޓްރެކް އެޅުމަށް ހަމަޖެހިފައިވާ ރަށް ތަކުގެ ގޮތުގައި މިނިސްޓްރީއިން އިއުލާން ކޮށްފައިވާ ރަށްތަކަކީ ސ. ހިތަދޫ، ފުވައްމުލަކު ސިޓީ، ގދ. ތިނަދޫ އަދި ހދ. ކުޅުދުއްފުށި އެވެ.