ފުވައްމުލަކުގައި ބޭއްވި

މި އަހަރު ރާއްޖެ ބޮޑީބޯޑިން އިން އިންތިޒާމުކޮށްގެން މިއަހަރު ބާއްވާ ފުރަތަމަ މުބާރާތް ކަމަށްވާ "އެލައިސް 2019" ގެ ޗެމްޕިއަންކަން މުހައްމަދު ވިއާމް ހޯދައިފިއެވެ.

ދެ ދުވަހުގެ މުއްދަތަށް ފުވައްމުލަކުގައި ކުރިޔަށް ގެންދިޔަ މި މުބާރާތުގެ އެއްވަނަ ވިއާމް ހޯދިއިރު، ދެވަނަ ހޯދީ އަބްދުﷲ ޝިމާލް ޝަމީމް އަދި ތިންވަނަ ހޯދީ ޝިނާޒް މުހައްމަދެވެ.

އަށާރަ އަހަރުން ދަށުގެ ކުދިންނަށް ހާއްސަކޮށްގެން ބޭއްވި މި މުބާރާތުގައި ރާޅާއެޅުމަށް ކުދިންނަށް ތަމްރީން ޕްރޮގްރާމްތައް ވެސް ވަނީ ކުރިޔަށް ގެންގޮސްފައެވެ. އަދި މުބާރާތް ކުރިޔަށްދިޔައީ ވަރަށް ފުރިހަމަކޮށްކަން ފާހަގަކުރަމުން ރާއްޖޭގެ އެއްވަނަ ބޮޑީބޯޑަރ އަލީ ހުޝްރުވާން (ކުޑަ އައްޔަ) ބުނީ، މިއީ ޒުވާން ބޮޑީބޯޑަރުން އުފެއްދުމަށް ރަނގަޅު ފުރުސަތެއް ކަމަށާއި، މި މުބާރާތުގައި ޒުވާން ހުނަރުތައް ފުވައްމުލަކުން ފެނިގެންދިޔަ ކަމަށެވެ.

މީގެ އިތުރުން ކުޑަ އައްޔަ ވަނީ މި މުބާރާތް ކާމިޔާބުކަމާ އެކު ބޭއްވުމަށް އެހީތެރިވެދިން ސީ ސްޕޯޓްސް އަދި ފުވައްމުލަކު ސިޓީ ކައުންސިލަށް ޝުކުރު އަދާކޮށްފައެވެ.

މޯލްޑިވްސް ސާފިން އެސޯސިއޭޝަން އަދި މޯލްޑިވްސް ބޮޑީބޯޑިން އެސޯސިއޭޝަންގެ އެއްބާރުލުމާ އެކު ބޭއްވި "އެލައިސް 2019"ގެ މެއިން ސްޕޮންސަރަކީ ސީ ސްޕޯޓްސްއެވެ.

ސީ ސްޕޯޓްސްގެ އެހީތެރިކަމާ އެކު ރާއްޖެ ބޮޑީބޯޑިންގެ މުބާރާތެއް މިދިޔަ އަހަރު ވެސް ފުވައްމުލަކުގައި ވަނީ ބާއްވާފައެވެ.

މި އަހަރު ރާއްޖެ ބޮޑީބޯޑިންގެ ފަރާތުން ލ. އަތޮޅު އަދި ރ. އަތޮޅުގައި ވެސް މުބާރާތެއް ބޭއްވުމަށް ވަނީ ނިންމާފައެވެ.