ކުދި އަދި ބޮޑެތި ރައްރަށުގެ ފަރަގު ނައްތާލައި 21 ރަށެއްގައި ފުޓުސަލް ދަނޑު އަޅަން ނިންމާފައިވާ ކަމަށް އެކްޓިން ޔޫތު މިނިސްޓަރ އަލީ ވަހީދު ވިދާޅު ވެއްޖެއެވެ.
އެކްޓިން ޔޫތު މިނިސްޓަރ އަލީ ވަހީދު ބުރާސްފަތި ދުވަހު ނޫސްވެރިންނަށް ދިން ޕްރެސް ކޮންފަރެންސެއްގައި ވިދާޅުވެފައި ވަނީ ތަފާތު ކުރުން ނައްތާލައި، ކުދި އަދި ބޮޑެތި ރައްރަށުގެ ފަރަގު ނައްތާލުމަށް ސަރުކާރުން ކުރާ މަސައްކަތުގެ ތެރެއިން މީގެ ކުރިން ފުޓުސަލް ދަނޑު އަޅާފައި ނުވާ 21 ރަށެއްގައި ޗައިނާ ސަރުކާރުގެ އެހީގެ ދަށުން ފުޓުސަލް ދަނޑު އެޅުމަށް ރައީސް ސޯލިހް ހުއްދަ ދެއްވާފައިވާ ކަމަށެވެ.
ޔޫތު މިނިސްޓްރީގައި ދެއްވި ޕްރެސް ކޮންފަރެންސްގައި މިނިސްޓަރ އަލީ ވަހީދު ވިދާޅުވީ، ހުކުރު ދުވަހުގެ ވަގުތެއްގައި ދަނޑުތައް އެޅުމަށް ބޭނުންވާ ސާމާނުތައް ރަށްރަށަށް ފޮނުވައި ވީހާ ވެސް އަވަހަކަށް މަސައްކަތް ފަށިގެން ދާނެ ކަމަށް މިނިސްޓަރު ވިދާޅުވި އެވެ.
ދަނޑުތައް އެޅުމަށް ރަށްތައް ކަނޑައަޅާފައި ވަނީ ސްޕޯޓްސް އޮޑިޓަށް ބެލުމަށް ފަހު، އެއްވެސް ވަސީލަތެއް ނެތް ރަށްތަކުގައި ކަމަށާއި، ދަނޑުތައް އެޅުމަށް ފަހު މެއިންޓެއިންކޮށް ރަނގަޅަށް ބެލެހެއްޓުމަށްޓަކައި އެންމެ ބޮޑަށް ވިސްނަނީ ވިޔަފާރި މޮޑެލަށް ހިންގަން ކަމަށް މިނިސްޓަރ އަލީ ވަހީދު ވިދާޅުވިއެވެ.
ފުޓުސަލް ދަނޑު އެޅުމަށް ނިންމާފައިވާ ރައްތަކަކީ ހއ. މޮޅަދޫ، ހދ. ފިނޭ، ހދ. ހިރިމަރަދޫ، ށ. ނޫމަރާ، ނ. ހެބަނދޫ، ނ. ފޮއްދޫ، ނ. މަގޫދޫ، ރ. އަނގޮޅިތީމު، ރ. ފައިނު، ބ. ދޮންފަނު، ބ. ކިހާދޫ، ބ. ފުޅަދޫ، ބ. ފެހެންދޫ، އދ. މަންދޫ، މ. ރަތްމަންދޫ، މ. ވޭވަށް، ތ. ބުރުނި، ތ. ވަންދޫ، ލ. މުންޑޫ، ވ. ތިނަދޫގެ އިތުރުން ދ. ރިނބުދޫގައެވެ.
މީގެ އިތުރުން ކުރީ ސަރުކާރުން އަޅަން ރާވައި މަސައްކަތް ނުފެށި ހުރި ދަނޑުތަކުގެ ޕްރޮޖެކްޓްތަކާ ބެހޭގޮތުން އެފްއޭއެމްއާ މަޝްވަރާކޮށް އެކަން ވީހާ ވެސް އަވަހަކަށް ފެށޭތޯ މަސައްކަތްކުރައްވާނެ ކަމަށް މިނިސްޓަރ ވިދާޅުވި އެވެ. އަދި މާފަންނު ވެލި ދަނޑުގައި އިތުރު ޓާފް ދަނޑެއް އަޅަން ފީފާ އިން ދީފައިވާ ޕްރޮޖެކްޓް ކުރިއަށް ގެންދިއުމަށް އެފްއޭއެމްއާ އެކު އަންނަ ހަފުތާގައި މަޝްވަރާ ކުރައްވާނެ ކަމަށް ވެސް މިނިސްޓަރގެ ވާހަކަފުޅުގައިވިދާޅުވި އެވެ.
