މި އަހަރު ރާއްޖެ ބޮޑީބޯޑިން އިން އިންތިޒާމުކޮށްގެން ބާއްވާ ފުރަތަމަ މުބާރާތް ކަމަށްވާ "އެލައިސް 2019" އަންނަ މަހު ފުވައްމުލަކުގައި ބާއްވާ ގޮތަށް ހަމަޖެހިއްޖެއެވެ.
އަންނަ އެޕްރިލް މަހުގެ ފަސްވަނަ ދުވަހުން ފެށިގެން ހަވަނަ ދުވަހުގެ ނިޔަލަށް ބާއްވާ މި މުބާރާތުގައި ބައިވެރިވެވޭނީ 18 އަހަރުން ދަށުގެ އުމުރުފުރާގެ ކުދިންނަށެވެ.
ރާއްޖެ ބޮޑީބޯޑިންގެ ފަރާތުން ވާހަކަދައްކަމުން މަޝްހޫރު ރާޅާއެޅުންތެރިޔާ އަލީ ހުޝްރުވާން (ކުޑަ އައްޔަ) ބުނީ، މިއީ ޒުވާން ރާޅާއެޅުންތެރިން އުފެއްދުމަށް ރަނގަޅު ފުރުސަތެއް ކަމަށާއި، މި މުބާރާތުގައި ޒުވާން ހުނަރުތައް ފުވައްމުލަކުން ފެނިގެންދާނެ ކަމަށް އުންމީދުކުރާ ކަމަށެވެ.
މުބާރާތް ފެށުމުގެ ކުރިން އޭޕްރީލް 3 ވަނަ ދުވަހާއި، 4 ވަނަ ދުވަހު އަދި ފަސްވަނަ ދުވަހު ފުވައްމުލަކުގައި ރާޅާއަޅާ ކުދިންނަށް ރާޅާއެޅުމަށް ދަސްކޮށްދިނުމުގެ ޕްރޮގްރާމުތަކެއް ކުރިޔަށް ގެންދިޔުމަށް ވަނީ ހަމަޖެހިފައެވެ.
ރާއްޖެ ބޮޑީބޯޑިންގެ ދަށުން މި އަހަރު ފުވައްމުލަކުގެ އިތުރުން ރ. އަތޮޅު ރަސްމާދޫ އަދި ލ. އަތޮޅުގައި "އެލައިސް 2019" ގެ ނަމުގައި މުބާރާތެއް ބޭއްވުމަށް ވަނީ ހަމަޖެހިފައެވެ.
މޯލްޑިވްސް ސާފިން އެސޯސިއޭޝަން އަދި މޯލްޑިވްސް ބޮޑީބޯޑިން އެސޯސިއޭޝަންގެ އެއްބާރުލުމާ އެކު ބާއްވާ "އެލައިސް 2019" ގެ މެއިން ސްޕޮންސަރަކީ ސީ ސްޕޯޓްސްއެވެ.
ސީ ސްޕޯޓްސްގެ އެހީތެރިކަމާ އެކު ރާއްޖެ ބޮޑީބޯޑިންގެ މުބާރާތެއް މިދިޔަ އަހަރު ވެސް ފުވައްމުލަކުގައި ވަނީ ބާއްވާފައެވެ.
