ކޮރޯނާވައިރަސް (ކޮވިޑް-19) އާ ގުޅިގެން އިނގިރޭސިވިލާތުން ކަނޑައަޅާފައިވާ ގަވާއިދުތަކާ ޚިލާފަށް މެންޗެސްޓާ ސިޓީގެ ޑިފެންޑަރު ކައިލް ވޯކާ ޕާޓީއެއް ބޭއްވުމުން އޭނާއަށް ފިޔަވަޅު އަޅަން އެ ކްލަބުން ނިންމައިފިއެވެ.
ކޮވިޑް-19 ގެ ސަބަބުން އިންގްލެންޑް ވަނީ ލޮކްޑައުން ކޮށްފައެވެ. އެގައުމުން ކަނޑައަޅާފައިވާ ގަވާއިދުތަކާ ޚިލާފަށް ވޯކާ ޕާޓީއެއް ބޭއްވުމުން، ގިނަ ބަޔެއްގެ ފާޑުކިޔުން އޭނާއަށް ވަނީ އަމާޒުވެފައެވެ. އެއާއެކު ވޯކާ ވަނީ އެކަމަށް މައާފަށްވެސް އެދިފައެވެ.
އެކަމަކު ސިޓީން ނެރުނު ނޫސްބަޔާނެއްގައި ބުނެފައިވަނީ މި ދަނޑިވަޅުގައި ވޯކާގެ ފަރާތުން ފެނިގެންދިޔަ އަމަލަކީ ބަލައިގަނެވޭނެ ކަމެއް ނޫން ކަމަށެވެ. އަދި އާންމު ރައްޔިތުންނަށް ކުޅުންތެރިން ނަމޫނާ ދައްކަން ޖެހޭނެ ކަމަށާއި، އެހެންކަމުން ވޯކާގެ މައްސަލަ ބަލައި އޭނާއަށް ފިޔަވަޅު އަޅާނެ ކަމަށް ވަނީ ބުނެފައެވެ.
ވޯކާއަށް ފިޔަވަޅު އަޅަން ސިޓީން ނިންމިއިރު، މީގެ ކުރިން ހޯމް-އައިސޮލޭޝަން (ކަރަންޓީން) ގަވައިދާ ޚިލާފުވުމުން ޗެލްސީން ވަނީ އެޓީމުގެ މޭސަން މައުންޓަށް ނަސޭހަތްތެރި ވެފައެވެ.
ކޮވިޑް-19 ގެ ސަބަބުން ދުނިޔޭގެ ފުޓްބޯޅަ ހުއްޓުމަކަށް އައިސްފައިވާއިރު، އިނގިރޭސި ޕްރިމިއާ ލީގުގެ މެޗުތައް ވަނީ މުއްދަތެއް ނެތް ގޮތަށް ފަސްކޮށްފައެވެ.
އިންގްލެންޑުން މިހާތަނަށް ކޮރޯނާވައިރަސް (ކޮވިޑް-19) އަށް ޕޮޒިޓިވްވެފައިވަނީ އާސެނަލްގެ ކޯޗު މިކޭލް އާޓެޓާ އާއި، އެސްޓަން ވިލާގެ ގޯލްކީޕަރު ޕެޕޭ ރެއިނާ އަދި ޗެލްސީގެ ފޯވާޑް ކަލުމް ހަޑްސަން-އޮޑޯއި އެވެ. މީގެ ތެރެއިން ކަލުމް ހަޑްސަން-އޮޑޯއި ވަނީ ވައިރަހުން ރަނގަޅުވެފައެވެ.
