ރޮނާލްޑޯގެ އެހީތެރިކަމާ އެކު ޗިލީގައި ކުޑަކުދިންގެ ހޮސްޕިޓަލެއް އަޅަނީ

ރެއާލް މެޑްރިޑްއަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯގެ އެހީތެރިކަމާ އެކު ޗިލީގެ ވެރިރަށް ސެންޓިއާގޯގައި ކުޑަކުދިންގެ ހޮސްޕިޓަލެށް އެޅުމަށް ނިންމައިފިއެވެ.

މި ހޮސްޕިޓަލް އެޅުމަށް ރޮނާލްޑޯ ނިންމާފައި ވަނީ އިޓަލީގެ ވިޔަފާރިވެރިއެއް ކަމަށްވާ އަލެސަންދްރޯ ޕްރޯޓޯއާ ގުޅިގެންނެވެ.

ރޮނާލްޑޯގެ ވިޔަފާރިތައް ބަލަހައްޓާ ނިއުޔޯކްގެ ލޯ ފާމެއް ކަމަށްވާ ބްރަފްމަން އެސޯސިއޭޓްސް އިން ނެރުނު ބަޔާނެއްގައި ބުނެފައި ވަނީ ޗިލީގެ ސެންޓިއާގޯގައި އެޅުމަށް ހަމަޖައްސާފައިވާ މި ހޮސްޕިޓަލްގެ އަމަލީ މަސައްކަތް 2020 ވަނަ އަހަރު ފެށޭނެ ކަމަށެވެ. އަދި އޭނާއަކީ ދުނިޔޭގެ އެންމެ މޮޅު ކުޅުންތެރިޔާގެ ގޮތުގައި ގިނަ ބަޔަކު ދެކޭ ކުޅުންތެރިޔާ ކަމަށާއި އެހެންކަމުން ރޮނާލްޑޯއާ އެކު މަސައްކަތް ފެށުމަށް އަލެސަންދްރޯ އެދިފައިވާ ކަމަށެވެ.

ސެންޓިއާގޯގައި އެޅިގެންދާ މި ހޮސްޕިޓަލަކީ ދިގު މުއްދަތަކަށް ރޮނާލްޑޯ ކުރިޔަށް ގެންދިޔުމަށް ނިންމާފައިވާ ޕްރޮޖެކްޓެކެވެ. އެގޮތުން މި ޕްރޮޖެކްޓްގެ ދަށުން ދެކުނު އެމެރިކާގެ އެކި ގައުމުތަކުގައި އެކި ފެންވަރުގެ ތަފާތު ހޮސްޕިޓަލް އަޅާނެ ކަމަށް ބްރަފްމަން އެސޯސިއޭޓްސް އިން ބުނެއެވެ.

ރޮނާލްޑޯއަކީ ކުޑަކުދިންގެ ހައްގުގައި ގިނަ މަސައްކަތްކުރާ ކުޅިވަރު ސަހްސިއްޔަތެކެވެ. ހަތަރު ކުދިންގެ ބައްޕައެއްގެ ހައިސިއްޔަތުން އޭނާ ވަނީ މިހާތަނަށް އެތަކެއް މިލިއަން ޑޮލަރެއް ކުޑަކުދިންގެ ހައްގުގައި ހޭދަކޮށްފައެވެ. އޭނާއަކީ ޔުނިސެފް އާއި ވޯލްޑް ވިޝަންގެ އިތުރުން ސޭވް ދަ ޗިލްޑްރެން ފަދަ ޖަމްއިއްޔާގެ އެމްބެސަޑަރެކެވެ. މިފަދަ ޖަމްއިއްޔާތަކުގެ އެމްބެސެޑަރެއްގެ ހައިސިއްޔަތުން އޭނާ އަންނަނީ އެކި ޗެރިޓީ އިވެންޓްތަކުގައި ބައިވެރިވަމުންނެވެ.

ރޮނާލްޑޯ ދަނޑު މަތީގައި ކުރާ މަސައްކަތާ އެއްވަރަށް އޭނާއަކީ ދަނޑުން ބޭރުގައި ވެސް މަސައްކަތްކުރާ ކުޅުންތެރިއެކެވެ. އޭނާ ދަނޑުން ބޭރުގައި ކުރާ މަސައްކަތުގެ ބޮޑު ބައެއް ބިނާވެފައި ވަނީ އިންސާނީ އެހީތެރިކަން ފޯރުކޮށްދިނުމާއި ޗެރިޓީގެ ހަރަކާތްތަކަށެވެ.

މަޝްހޫރު ކުޅިވަރު ވެބްސައިޓް "ބްލީޗާ ރިޕޯޓް" އިން 2016 ވަނަ އަހަރު އާންމުކުރި ދުނިޔޭގެ އެންމެ ޗެރިޓަބަލް އެތުލީޓް ނުވަތަ އެންމެ ގިނައިން ހޭދަކުރާ އެތުލީޓްގެ މަގާމަށް ހޮވިފައި ވަނީ ވެސް ރޮނާލްޑޯއެވެ. އެގޮތުން މިދިޔަ ސީޒަނުގެ ޗެމްޕިއަންސް ލީގު ރެއާލްއިން ހޯދުމާ އެކު ލިބުނު 600،000 (ހަ ލައްކަ) ޔޫރޯގެ ބޯނަސް ވެސް އޭނާ ހަދިޔާކުރީ ޗެރިޓީއަކަށެވެ. ހަމައެހެންމެ އުމުރުން 10 އަހަރުގެ ކުއްޖެގެ ސިކުޑީގެ ސާޖަރީ ހެދުމަށް އޭނާ ވަނީ 83،000 (އައްޑިހަ ތިން ހާސް) ޑޮލަރު ހަދިޔާކޮށްފަވެ. އަދި 2011 ވަނަ އަހަރު އެންމެ ގިނަ ލަނޑު ޖަހައިގެން އޭނާއަށް ލިބުނު ރަން ބޫޓު ވިއްކާލުމަށް ފަހު ލިބުނު ފައިސާ ވެސް އޭނާ ހަދިޔާކުރީ ޗެރިޓީއަށެވެ.

ރޮނާލްޑޯއަށް ސަޕޯޓުކުރާ މީހުންގެ އަދަދު އިތުރުވާ މައިގަނޑު އެއް ސަބަބަކީ މިއީ ކަމަށް ގިނަ ބަޔަކު ގަބޫލްކުރެއެވެ. ގިނަ ބަޔަކު އޭނާ ސިފަކުރަނީ ކުޑަކުދިން ދެކެ އިންތިހާ އަށް ލޯބިވާ މީހެއްގެ ގޮތުގައެވެ. އެގޮތުން ދަނޑުމައްޗަށް އަރާއިރު އޭނާއެކު އަރާ ކުޑަކުދިންނާ ހީސަމާސާކޮށް ހަދާ މަންޒަރަކީ މީގެ ކުރިން ވެސް ގިނަ ބައެއް ތައުރީފް އޭނާ އަށް ލިބިގެން ގޮސްފައިވާ ކަމެކެވެ.