އެކަން މިހާރުން މިހާރަށް މަޖިލީހުގެ ތެރެއިން ހުއްޓުވަންޖެހޭ ކަމަށް ދެކެވަޑައިގަންނަވާކަމަށް ވިދާޅުވި
ރައްޔިތުންގެ މަޖިލީހުގެ މަކުނުދޫ ދާއިރާގެ މެންބަރު މުހައްމަދު ރާއީ
ސަރުކާރުން 65 އަހަރުން މަތީގެ މީހުންނަށްދޭ 5000 ރުފިޔާގެ އެލަވަންސް ޖިންސީ އަނިޔާގެ މައްސަލަތަށް ސާބިތުވެފައިވާ އުމުރުން ދުވަސްވީ މީހުނަށް ދެވިގެން ނުވާނެކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ މެންބަރު މުހައްމަދު ރާއީ ވިދާޅުވެއްޖެ އެވެ.
އުމުރުން ދެ އަހަރުގެ ކުޑަ ކުއްޖަކަށް ޖިންސީ އަނިޔާކުރި މައްސަލަ ދިރާސާކުރުމަށް ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީން އާދިއްތަ ދުވަހު ބޭއްވި ބައްދަލުވުމުގައި ކުޑަކުދިންނަށް ޖިންސީ އަނިޔާކުރާ މީހުންގެ ތެރޭގައި އުމުރުން ދުވަސްވީ މީހުން ހިމެނޭކަން ފާހަގަކުރައްވާ މެމްބަރ ރާޢީ ވަނީ އުމުރުން ދުވަސްވީ މީހުންގެ ތެރެއިން މިފަދަ މައްސަލަތައް ސާބިތުވެފައިވާ މީހުންނަށް ދޭ އެލަވަންސް ކަނޑާލުމަށް މަޖިލީހުގެ ތެރެއިން އެކަން ކުރުމުގެ މުހިންމު ކަމުގެ މައްޗަށް ވާހަކަދައްކަވާފަ އެވެ. އަދި ރާޢީ ވިދާޅުވީ އެފަދަ މީހުންނަށް އެލަވަންސް ދެވިގެން ނުވާނެ ކަމަށާއި އެކަން މިހާރުން މިހާރަށް މަޖިލީހުގެ ތެރެއިން ހުއްޓުވަންޖެހޭކަމަށް ދެކެވަޑައިގަންނަވާ ކަމަށެވެ.
މެމްބަރު ރައީ ވިދާޅުވީ މުޖުތަމައުއަށް އެ މީހުންނަކީ ކޮބައިކަން ހާމަކަން ބޮޑު ގޮތެއްގައި އެނގެންޖެހޭކަމަށެވެ. އަދި އެ މައުލޫމާތަކީ ސިއްރުކުރެވިގެންވާނެ މައުލޫމާތެއް ނޫންކަމަށާއި، ހުކުމް ތަންފީޒްކޮށް މުޖުތަމައުއަށް ނެރުނަސް އެފަދަ މީހުންގެ މައުލޫމާތު އެނގެންޖެހޭނެކަމަށް ރައީ ވިދާޅުވި އެވެ.
