އަޒްހަރް ޔުނިވަރސިޓީން އަރަބިއްޔާ ސުކޫލަށް ފޮތް ހަދިޔާކޮށްފި

މިޞްރުގެ އަލް އަޒްހަރު ޔުނިވަރސިޓީން މަދަރުސަތުލް ޢަރަބިއްޔާއަށް ދީނީ ޓެކްސްޓް ފޮތް ހަދިޔާކޮށްފިއެވެ.

މިނިސްޓްރީ އޮފް ފޮރިން އެފެއަރޒުގައި ބޭއްވި ރަސްމިއްޔާތެއްގައި މި ފޮތްތައް ޙަވާލުކޮށްދެއްވީ މިޞްރުން ރާއްޖެއަށް ކަނޑައަޅުއްވާފައި ހުންނަވާ މަންދޫބު ހިސް އެކްސެލެންސީ ހުސައިން އަލް ސަހަރީއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ފޮރިން މިނިސްޓަރ ޢަބްދުﷲ ޝާހިދު ވިދާޅުވީ، ދިރާސީ އައު އަހަރާއި ދިމާކޮށް އަޒްހަރު ޔުނިވަރސިޓީން ހަދިޔާކޮށްފައިވާ ފޮތްތައް އެހެން އަހަރުތަކާއި ޚިލާފަށް ވަކިން ޚާއްޞަ ކަމަށެވެ. އެގޮތުން ސަބަބެއްގެ ގޮތުގައި މިނިސްޓަރ ވިދާޅުވީ، ރާއްޖެއާއި މިޞްރާއި ދެމެދު ޑިޕްލޮމެޓިކް ގުޅުން ޤާއިމުކުރުމުގެ ރަންޔޫބީލް ފާހަގަކޮށްފައިވުމެވެ.

މިނިސްޓަރ އިތުރަށް ވިދާޅުވީ، މިޞްރުގެ ސަރުކާރުން ފޯރުކޮށްދޭ ސްކޮލަރޝިޕްތަކާއި، ޓީޗަރުން ފޯރުކޮށްދިނުމުގެ ޕްރޮގުރާމުތަކަށް މިނިސްޓްރީން އަބަދުވެސް ޝުކުރުވެރިވާ ކަމަށެވެ.

އޭގެ އިތުރުން، އަލް އަޒްހަރު ޔުނިވަރސިޓީން ތަޢުލީމު ޙާޞިލުކުރާ ދަރިވަރުންގެ ނަތީޖާ ރަނގަޅުކަން ފާހަގަކުރައްވައި މިނިސްޓަރ ވިދާޅުވީ، އަޒްހަރް ޔުނިވަރސިޓީން ތަޢުލީމު ޙާޞިލުކުރައްވާ ފަރާތްތައް ސަރުކާރުގެ އިސް މަޤާމުތައްވެސް ފުރުއްވާ ކަމަށެވެ.

އަދި މިޞްރުން މި ފޯރުކޮށްދޭ އެހީތެރިކަމަށް ޝުކުރު އަދާ ކުރައްވާ ކަމަށާއި، ކުރިއަށް އޮތް ތަނުގައިވެސް ދެ ޤައުމުގެ ގުޅުން އިތުރަށް ބަދަހި ކުރައްވާނެ ކަމަށް މިނިސްޓަރ ވަނީ ވިދާޅުވެފައެވެ.

މި ރަސްމިއްޔާތުގައި މިނިސްޓަރ އޮފް އެޑިއުކޭޝަން ޑރ ޢާއިޝަތު އަލީއާއި، އެޑިއުކޭޝަން މިނިސްޓްރީގެ އިސް އޮފިޝަލުން ބައިވެރިވެ ވަޑައިގެންފައިވާއިރު، މިނިސްޓަރ ވަނީ މިސްރުގެ ސަރުކާރުންނާއި އަޒްހަރު ޔުނިވަރސިޓީން ތަޢުލީމީ ދާއިރާއިން ފޯރުކޮށްދޭ އެހީތެރިކަމަށް ޝުކުރު އަދާކުރައްވާފައެވެ.