ކުޑަކުދިންނަށް ޖިންސީ ގޯނާކުރާ ހުރިހާ އެންމެން މޮނިޓަރ ނުކުރެވޭ ކަމަށް ފުލުހުން ބުނެފިއެވެ.
ދެ އަހަރުގެ ކުޑަކުއްޖާ އަށް ޖިންސީ ގޯނާކުރި މައްސަލާގައި، ފުލުހުން ހިމެނޭ ގޮތަށް އެކަމުގައި ހިމެނޭ މުހައްސަސާތައް ހޮނިހިރު ދުވަހުގެރޭ ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީ އަށް ވަނީ ހާޒިރުކޮށްފައެވެ.
އެ ކޮމިޓީގައި، ކުޑަކުދިންނާ ބެހިގެން ކުށުގެ ރިކޯޑް އޮންނަ މީހުން މޮނިޓަރ ކުރުމުގެ އެއްވެސް ނިޒާމެއް އޮވޭތޯ އައްޑޫ މީދޫ ދާއިރާގެ މެމްބަރު ރޮޒެއިނާ ސުވާލުކުރެއްވުމުން ސުޕްރިންޓެންޑެންޓް އޮފް ޕޮލިސް ހަސަން ހަމީދު ވިދާޅުވީ، ބައެއް ކޭސްތަކުގައި މޮނިޓަރ ކުރެވިފައި އެބަހުރި ކަމަށެވެ.
އެކަމަކު އެންމެ އެކަށީގެންވާ ނިޒާމެއް ނެތުމުން ކުޑަކުދިންނަށް ޖިންސީ ގޯނާކޮށްގެން ހުރިހާ ކޭސްތަކުގައި އެންމެ ރަނގަޅަށް މޮނިޓަރ ނުކުރެވޭ ކަމަށާއި، އެކަން އިތުރަށް ރަނގަޅުކުރަން ޖެހޭ ކަމަށް ހަސަން ވިދާޅުވިއެވެ.
ކުޑަކުދިންނަށް ޖިންސީ ގޯނާކުރި މައްސަލަތަކުގައި ހިމެނޭ ފަރާތްތަކާއި ދެކޮޅަށް އެކަށީގެންވާ ފިޔަވަޅު ނޭޅޭ މައްސަލައިގައި ގިނަ އާންމުން އަންނަނީ ކަންބޮޑުވުން ފާޅުކުރަމުންނެވެ. ހާއްސަކޮށް މިފަހުން ދެ އަހަރުގެ ތުއްތު ކުއްޖަކު ރޭޕްކުރުމުގެ ތުހުމަތުކުރެވޭ އެކުއްޖާގެ މުނިކާފަގެ މައްޗަށް ކުރިން ހަމަ މިކަހަލަ މައްސަލައެއްގައި ދައުވާކުރަން ފޮނުވި، އެ މައްސަލަ ކުރިއަށް ނުގެންގޮސްފައިވާތީ، އާންމުން އަންނަނީ ސަރުކާރަށާއި މުއައްސަސާތަކަށް ވަރަށް ބޮޑަށް ފާޑުކިޔަމުންނެވެ.
