ބަޅިނދުގެ ޝޫޓިން ފަށައިފި
19 ޖެނުއަރީ 2020 | އާދީއްތަ 03:59ފިލްމުގެ މަސައްކަތް ދެމަސް ދުވަސްތެރޭ ނިންމާލެވޭނެ
ބަޅިނދުގެ ކާސްޓުން
ރާއްޖޭގެ އެންމެ ކާމިޔާބު އެއް ޕްރޮޑަކްޝަން ހައުސް ކަމަށްވާ ޑާކްރެއިން އެންޓަޓައިންމެންޓް (ޑީއާރްއީ) ގެ ''ބަޅިނދު''ގެ ޝޫޓިން ފަށައިފިއެވެ.
ބަޅިނދު މި ފިލްމަކީ ބިރުވެރި ހާދިސާއެއްގެ މައްޗަށް ބިނާކޮށް ހަދާ ފިލްމެކެވެ. ފިލްމުގެ ކާސްޓުންގެ ތެރޭގައި މައިގަނޑު ގޮތެއްގައި ހިމެނެނީ ޓިކްޓޮކްގެ ތަރިންނެވެ. ފިލްމުގެ ކާސްޓުންގެ ތެރޭގައި، އާޝާ، ޝެރާ، ޖުމައްޔަލް އަދި ސޭންޑީގެ އިތުރުން ޖުމާލް ހިމެނޭއެވެ.
ފިލްމުގެ މަންޒަރުތައް ނަގަން ހަމަޖެހިފައިވަނީ މާލޭގެ އިތުރުން ހުޅުމާލޭގައެވެ. ފިލްމާއި ބެހޭ ގޮތުން ރާއްޖެ.އެމްވީއާ ވާހަކަ ދައްކަމުން ޑާކްރެއިންގެ ޕްރޮޑިއުސަރ މުހައްމަދު އަލީ (މޮގާ) ބުނީ، ކުރިން ނިންމާފައި އޮތީ ''ނޮވެންބަރ''އާ އެކު ބަޅިނދުގެ ޝޫޓިން ފެށުމަށް ކަމަށެވެ.
އެކަމަކު ދެ ފިލްމު އެއްކޮށް ޝޫޓް ކުރުމަކީ އެހާ ފަސޭހަކަމަކަށް ނުވާތީވެ މި ފިލްމުގެ ޝޫޓިން ފަސްކުރީ ކަމަށެވެ. މޮގާ ބުނީ، އެ ފިލްމުގެ މަސައްކަތް ދެ މަސް ދުވަހުގެ ތެރޭގައި ނިންމާލެވޭނެ ކަމަށެވެ.
ހޫދް އިބްރާޙިމް ލިޔެ އަޙްމަދު ސިނާން ޑައިރެކްޓް ކޮށްފައިވާ މި ފިލްމުގެ ގިނަ ކާސްޓުންތަކެއް ހިމެނެއެވެ. ބަޅިނދު މި ފިލްމަކީ ޑާކްރެއިންގެ 14 ވަނަ ފިލްމެވެ.
