2 އަހަރުގެ ކުއްޖާ ރޭޕްކުރި މީހުންނަށް އެންމެ ހަރުކަށި އަދަބު ދިނުމަށް އިދިކޮޅުން ގޮވާލައިފި

ދެނުކުގެ ރަށެއްގައި 2 އަހަރުގެ ކުޑަކުއްޖަކު ރޭޕްކުރި މައްސަލައިގައި އެކަމުގައި ހިމެނޭ މީހުންނަށް އެންމެ ހަރުކަށި އަދަބު ދިނުމަށް އިދިކޮޅުން ގޮވާލައިފިއެވެ.

އިދިކޮޅު ޕީޕީއެމް ޕީއެންސީން ނެރުނު ނޫސްބަޔާނެއްގައި ބުނެފައިވަނީ 2 އަހަރުގެ މައުސޫމް އަންހެން ކުއްޖަކަށް ބަޔަކު ޖިންސީ ގޯނާ ކުރި ކުރުން ޕްރޮގްރެސިވް ކޮންގްރެސް ކޯލިޝަންގެ ފަރާތުން އެންމެ ހަރުކަށި އިބާރާތުން ކުށްވެރި ކުރާ ކަމަށެވެ. އަދި ލިބެމުންދާ މަޢުލޫމާތަށް ބަލާއިރު، މިއަނިޔާވެރި ޢަމަލު ހިންގުމުގައި ބައިވެރިވެފައިވަނީ އެ ތުއްތު ކުއްޖާއަށް ރައްކާތެރިކަމާއި ޙިމާޔަތް ދެންޖެހޭ ފަރާތްތަކުންކަމަށް ވުމަކީ ވަރަށް ހިތާމަވެރިކަމެއްކަމަށް މި ބަޔާނުގައި ބުނެފައިވެއެވެ.

އިދިކޮޅުން ބުނީ މިޢަމަލު ހިންގި ބަޔަކީ އެމީހުންގެ ހިތުގައި އެއްވެސް މިންވަރެއްގެ ކުލުނެއް ނުވަތަ އިންސާނިއްޔަތު ކަމުގެ އެއްވެސް މިންވަރެއް ހުރި ބައެއް ނޫން ކަމުގައި ދެކޭ ކަމަށާއި، މި ނުބައި ނުލަފާ އަމަލު ހިންގާފައިވާ ފަރާތްތައް ހޯދާ އެ ފަރާތްތައް އިންސާފުގެ ކުރިމައްޗަށް ވަގުތުން ގެނެސް އެމީހުންނަށް ޤާނޫނު ތަކުން ކަނޑައެޅިފައިވާ އެންމެ ހަރުކަށި އަދަބު ދިނުމަށް ޕްރޮގްރެސިވް ކޮންގްރެސް ކޯލިޝަންގެ ފަރާތުން ގޮވާލާ ކަމަށެވެ. އަދި މިފަދަ ލާއިންސާނީ އަނިޔާވެރި ޢަމަލުތައް ރާއްޖޭގެ ކަންކޮޅުތަކުގައި އިތުރުވަމުން ދާދިއުމަކީ ޕްރޮގްރެސިވް ކޮންގްރެސް ކޯލިޝަން ވަރަށް ބޮޑަށް ކަންބޮޑުވާ މައްސަލައެއް ކަމަށް ބުނެފައިވެއެވެ.

އިތުރަށް ބަޔާނުގައި ބުނެފައިވަނީ މިފަދަ ލާއިންސާނީ އަނިޔާވެރި ޢަމަލުތައް ރާއްޖޭގެ ކަންކޮޅުތަކުން ހުއްޓުވުމަށްޓަކައި ދައުލަތުގެ މުއްސަސާތަކުން ކުރަންޖެހޭ ކަންކަން ހަރުދަނާކަމާއެކު ކުރުމަށްވެސް ގޮވާލާފައިވެއެވެ.