ޖިންސީ ގޯނާގެ މައްސަލަތަކުގައި އަވަހަށް ޝަރީއަތް ނިންމައި ނިޒާމު ހިނގާކަން އިހުސާސްވާންޖެހޭ: ޕީޖީ
ޖިންސީ ގޯނާ ކޮށްފައިވަނީ ބައްޕަ، ކާފަ އަދި މުނި ކާފަ
ޕްރޮސެކިއުޓަރ ޖެނެރަލް ހުސައިން ޝަމީމް
ކުޑަކުދިންނަށް ޖިންސީ ގޯނާ ކުރާ މައްސަލަތަކުގައި އަވަހަށް ޝަރީއަތް ނިމުމަކީ މުހިއްމު ކަމެއް ކަމަށާއި، އެ ނިޒާމު ފުރިހަމައަށް ހިނގާކަން އިހުސާސްވާން ޖެހޭކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ދެކުނުގެ ރަށެއްގައި އާއިލާ މީހުންތަކެއް ވެގެން ދެ އަހަރުގެ ކުޑަކުއްޖަކު ރޭޕްކުރި މައްސަލާގައި 2 މީހަކު ހައްޔަރުކޮށްފައިވާއިރު، އެކަމާ ގުޅޭގޮތުން ޝަމީމް ކުރެއްވި ޓްވީޓެއްގައި ވިދާޅުވީ، ކުޑަކުދިންނަށް ޖިންސީ ގޯނާ ކުރާކަމަށް ތުހުމަތުކުރެވޭ މީހުންގެ މައްސަލަތައް އަވަހަށް ތަޙުޤީޤުކޮށް ދައުވާ ކުރުމަކީ މުހިއްމުކަމެއް ކަމަށެވެ. އަދި އެފަދަ މައްސަލަތައް އަވަސް ކުރުމާ ގުޅޭގޮތުން ފުލުހުންނާއި ޕީޖީ އޮފީސް ގުޅިގެން މަސައްކަތް ކުރަމުންދާކަމަށްވެސް ޝަމީމްގެ ޓްވީޓުގައި ބަޔާންކޮށްފައިވެއެވެ.
ޝަމީމް އިތުރަށް ވިދާޅުވީ، އެފަދަ މައްސަލަތަކުގައި އަވަހަށް ޝަރީއަތް ނިމުމަކީވެސް މުހިއްމު ކަމެއް ކަމަށާއި، ނިޒާމު ފުރިހަމައަށް ހިނގާކަން އިހުސާސްވާން ޖެހޭ ކަމަށެވެ.
ޝަމީމް އެހެން ވިދާޅުވެފައިވާއިރު، އެ މައްސަލައިގައި ކުޑަ ކުއްޖާއަށް ޖިންސީ އަނިޔާ ކުރިކަމުގެ ތުހުމަތުގައި ހައްޔަރުކޮށްފައިވާ އެ ކުއްޖާގެ ކާފައަކީ މީގެ ކުރިންވެސް އެފަދަ މައްސަލައެއްގައި ހައްޔަރުކޮށްފައިވާ ފަރާތެކެވެ. ނަމަވެސް އޭނާގެ ޝަރީއަތް މިއަދާޖެހެންދެންވެސް އޮތީ މަޑުޖެހިފައެވެ.
މިފަދަ މައްސަލަތަކުގައި ނިޒާމު ހިނގާކަން އިހުސާސްވާން ޖެހޭނެކަމަށް ޝަމީމް ވިދާޅުވެފައިވާއިރު، އެކަމާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ޝަމީމް ވިދާޅުވީ، އެ މައްސަލައިގައި ޝަރީއަތް ކުރިއަށްގޮސް އޭނާއަށް ޙައްޤު އަދަބު ދެވުނު ނަމަ މިހިސާބަށް ކަންކަން ނުދާނެ ކަމަށެވެ. އަދި އެފަދަ މައްސަލަތަކުގައި ތުހުމަތު ކުރެވޭ ފަރާތްތަކާއި ދެކޮޅަށް ހެކި ހޯދަން އެހައި އުނދަގޫއިރު، ހެކި ލިބުމުންވެސް ޝަރީއަތްތައް އެތައް ދުވަހަކަށް ދިގުދެމިގެންދާ ކަމުގެ ކަންބޮޑުވުން ޝަމީމް ފާޅުކުރެއްވިއެވެ.
މައުލޫމާތު ލިބިފައިވާގޮތުގައި އެ ކުއްޖާއަށް ޖިންސީ ގޯނާކޮށްފައިވަނީ އެކުއްޖާގެ ބައްޕައާއި، ކާފަ އަދި މުނިކާފައެވެ. އަދި އެކުއްޖާއަށް ޖިންސީ ގޯނާކޮށްފައިވަނީ އެކުއްޖާގެ މަންމަ ޑްރަގް ރިހިބިލެޓޭޝަންގެ ކަމެއްގައި މާލެ އައިސް ހުއްޓާއެވެ. އެ ކުއްޖާގެ މަންމަ އާއި ބައްޕައަކީ، މަސްތުވާތަކެތީގެ ވަބާގައި ޖެހިފައިވާ ދެ މީހުން ކަމަށް މައުލޫމާތުލިބިފައިވެއެވެ.
ޤާނޫނުގައި ބަޔާންކޮށްފައިވާގޮތުގައި އާއިލާގެ ކުޑަކުއްޖަކަށް ޖިންސީ ގޯނާކޮށްފިކަން ސާބިތުވެއްޖެނަމަ އެ މީހެއްގެ މައްޗަށް 20 އަހަރާއި، 25 އަހަރު ދުވަހުގެ ޖަލު ހުކުމެއް އަންނާނެ އެވެ.
