ބުރިޖް ކައިރިން ކާރެއް ކޮންޓްރޯލް ނުވެ އެކްސިޑެންޓެއް ހިނގައިފި
މި އެކްސިޑެންޓުގައި އެއްވެސް މީހަކަށް އަނިޔާ ނުވޭ
ކޮންޓްރޯލުން ނައްޓައިގެން ޕާކްތެރެއަށް ވެއްޓުނު ކާރު
ބާރު ސްޕީޑުގައި ބުރިޖަށް އަރަންދިޔަ ކާރެއް ކޮންޓްރޯލް ނުވެގެން ގޮސް އެކްސިޑެންޓެއް ވެއްޖެއެވެ.
މި އެކްސިޑެންޓް ހިނގާފައިވަނީ ރޭ މެންދަމުގެ ވަގުތެއްގައެވެ. ހުދުކުލައިގެ ކާރު އެކްސިޑެންޓް ވެފައިވަނީ މާލެކޮޅުން ބުރިޖަށް އަރަން ދިޔަ ބާރުމިނުގައި ކޮންޓްރޯލް ނުވެގެން ގޮސް ބުރިޖަށް އަރަން އޮންނަ ދިމާލުން ޕާކް ތެރެއަށް ވެއްޓިގެންނެވެ.
މި އެކްސިޑެންޓުގައި އެއްވެސް މީހަކަށް އަނިޔާވެފައެއް ނުވާއިރު ލޮނުޒިޔާރާތްކޮޅުގައި މާލެ ސިޓީ ކައުންސިލުން ތަރައްގީކުރަމުން އަންނަ "ޖަޒީރާ ޕާކް" ގެ ފެންސް ވަނީ ހަލާކުވެފައެވެ. މި ހާދިސާގައި ކާރަށް ވަނީ އެކިވަރުގެ ގެއްލުންތައް ލިބިފައެވެ.
މިހާތަނަށް މި އެކްސިޑެންޓާއި ގުޅިގެން ފުލުހުން އެއްޗެއް ބުނެފައި ނުވާ އިރު، އެކްސިޑެންޓް ހިނގި ސަރަހައްދުގައި ފުލުހުން ހަރަކާތްތެރިވެފައިވެއެވެ.
ދާދި ފަހުން ބުރިޖުން ފައިބާ ދިމާލުގައި ވެސް ކާރުތަކެއް މުޑިއަރައިގެން ބޮޑު އެކްސިޑެންޓެއް ވަނީ ހިނގާފައެވެ. އެ އެކްސިޑެންޓުގައި އެއްވެސް މީހަކަށް އަނިޔާ ނުވާ އިރު އުޅަނދުތަކަށް ބޮޑެތި ގެއްލުންތަކެއް ވަނީ ވެފައެވެ.
