ދިރާގު ދިވެހި ޕްރިމިއާ ލީގުގައި އީގަލްސް ބަލިކޮށް ޓީސީ ސްޕޯޓްސް ކްލަބުން ދެވަނަ ބުރުގައި އީގަލްސް އަތުންވި ބަލީގެ ބަދަލު ހިފައިފިއެވެ.

ގައުމީ ފުޓުބޯޅަ ދަނޑުގައި ކުޅުނު މި މެޗު ޓީސީއިން ކާމިޔާބުކުރީ 1-0 ގެ ނަތީޖާއަކުންނެވެ.

މި މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މި މެޗުގެ ފުރަތަމަ ހާފުގައި ދެޓީމަށް ވެސް ވަނީ ލަނޑު ޖެހުމަށް ރަނގަޅު ފުރުސަތުތަކެއްލިބި ބޭކާރުވެފައެވެ. އެގޮތުން މެޗުގެ ފުރަތަމަ ހާފުގައި ޓީސީގެ އިތުބާރު ފޯވާޑް އަލީ އަޝްފާގް (ދަގަނޑޭ) އަށް ލަނޑު ޖެހުމަށް ރަނުގެ ފުރުސަތެއްލިބި ބޭކާރުވިއިރު، އީގަލްސްގެ އަހުމަދު ރިޒްވާން (ރިޒޭ) އަށް ވެސް ވަނީ ލަނޑު ޖެހުމަށް ރަނުގެ ފުރުސަތެއްލިބި ބޭކާރުވެފައެވެ.

މެޗުގެ ފުރަތަމަ ހާފު ނިމިގެންދިޔައީ 0-0 ގެ ނަތީޖާއަކުންނެވެ.

މެޗުގެ ދެވަނަ ހާފު ފަށައިގެން ޓީސީއިން އެޓީމުގެ ކުޅުން ރަނގަޅުކޮށް މޮޅު އެޓޭކިންގ ގޭމެއް ކުޅުނުއިރު މި ހާފުގައި ޓީސީއިން ވަނީ ފުލުފުލުގައި އީގަލްސްގެ ގޯލަށް ހަމަލާތައް ފޮނުވައިލައިފައެވެ. ނަމަވެސް މެޗުގެ 74 ވަނަ މިނެޓުގައި އީގަލްސްގެ ރިހާމް އަބްދުލް ޣަނީ (ބޮބީ) އަށް ވަނީ ލަނޑު ޖަހަން ރަނުގެ ފުރުސަތެއްލިބި ބޭކާރުވެފައެވެ. އޭނާ ހުސްކޮށް ހުރެ އޭރިޔާ ތެރެއިން ފޮނުވައިލި ބޯޅަ ޓީސީގެ ކީޕަރު ވަނީ ހުށިޔާރު ކަމާއިއެކު ދިފާއުކޮށްފައެވެ. އޭގެ ފަހުން މެޗުގެ 75 ވަނަ މިނެޓުގައި ޓީސީގެ އިޝާން އިބްރާހީމް (ސައްޓު) އަށް ވަނީ ރަނުގެ

ފުރުސަތެއްލިބި ބޭކާރުވެފައެވެ. އޭނާ ފޮނުވައިލި ބޯޅަ އީގަލްސްގެ ކީޕަރު ވަނީ ހުށިޔާރު ކަމާއިއެކު ދިފާއުކޮށްފައެވެ. މެޗުގެ ހަމައެކަނި ލަނޑު މެޗުގެ 77 ވަނަ މިނެޓުގައި ޓީސީއަށް ކާމިޔާބުކޮށްދިނީ އިސްމާއިލް އީސަ (މެސީ) އެވެ. މި ލަނޑަށްފަހު ވެސް ޓީސީއަށް ވަނީ ލަނޑު ޖަހަން ފުރުސަތުތަކެއްލިބި ބޭކާރުވެފައެވެ.

މެޗަށްފަހު ވާހަކަދައްކަމުން އީގަލްސްގެ ކޯޗު މުހައްމަދު ޝިޔާޒް (މޯހަން) ބުނީ މި މެޗުން ޓީސީއަށް ލިބިގެންދިޔައީ ހައްގު މޮޅެއް ކަމަށާއި މި މެޗުގައި ޓީސީގެ ކުޅުން ތަފާތު ކަމަށެވެ. އަދި މި ބައްޔާއިއެކު އީގަލްސްއިން ލީގުގެ ދެވަނައިގައި އޮންނަން ކުރަންޖެހޭ މަސައްކަތް އިތުރުވެގެން ދާނެ ކަމަށްވެސް އޭނާ ބުންޏެވެ.

ޓީސީގެ ކޯޗު މުހައްމަދު ޝާޒްލީ ބުނީ މި މެޗުން މޮޅުވުމުން އެކަމާއި ހިތްހަމަ ޖެހިފައި ހުރި ކަމަށާއި ކުރިޔަށް ހުރި މެޗުގައި ޓީސީގެ ފަރާތުން ތަފާތު ފެންނާނެ ކަމަށެވެ.