ހައިކޯޓުގެ އިސްފަނޑިޔާރު ޝުޖާއުގެ މައްސަލައެއް ބެލުމަށް ތަހުގީގު ކޮމެެޓީއެއް އެކުލަވާލައިފި
16 ޖެނުއަރީ 2020 | ބުރާސްފަތި 10:53ޝުޖާއުއަކީ ރައީސް ޔާމީނާއި ޕީޕީއެމްގެ ހަރަކާތްތަކުގައި އުޅުއްވާ ބޭފުޅެއްކަމަށްވޭ
ހައިކޯޓުގެ އިސްފަނޑިޔާރު ޝުޖާއު އުސްމާނު
ހައިކޯޓުގެ އިސްފަނޑިޔާރު ޝުޖާއު އުސްމާނުގެ ސުލޫކީ މައްސަލައެއް ބަލަން ނިންމައި، އެމައްސަލަ ބެލުމަށް ތަހުގީގު ކޮމެޓީއެއް އެކުލަވާލައިފި އެވެ.
ބުރާސްފަތި ދުވަހު ޖުޑީޝަލް ސަރވިސް ކޮމިޝަން (ޖޭއެސްސީ)އިން ނެރެފައިވާ ބަޔާނެއްގައި ބުނެފައިވަނީ، އެކޮމިޝަނަށް ހުށަހެޅޭ މައްސަލަ މެލުމާމެދު ގޮތެއް ނިންމައި، ކޮމެޓީއިން ބެލުމަށްފަހު، ބުދަ ދުވަހު ބޭއްވުނު ޖޭއެސްސީގެ ބައްދަލުވުމަށް ތާވަލް ކުރެވުނު މައްސަލަތަކުގެ ތެރެއިން، އެކޮމެޓީން ބަލައިގަތުމަށް ނިންމާފައިވާ މައްސަލަތަކަށް ތަހުގީގު ކޮމެޓީއެއް އެކުލަވާލެވުނު ކަމަށެވެ.
ޖޭއެސްސީގެ އެ ތަހުގީގު ކޮމެޓީން ހައިކޯޓުގެ އިސްފަނޑިޔާރު ޝުޖާއު އުސްމާނުގެ އިތުރުން، ގއ. މާމެންދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް އަހުމަދު ޝުކޫރުގެ މައްސަލައެއް ހިމެނޭއިރު، ފެމިލީ ކޯޓުގެ ގާޒީ އަބްދުﷲ އަދީބުގެ މައްސަލައެއްވެސް ހިމެނެއެވެ. އެމައްސަލަތަކުގެ ތަފްސީލެއް ޖޭއެސްސީން ހާމައެއް ނުކުރެ އެވެ.
ހައި ކޯޓުގެ އިސް ފަނޑިޔާރަކަށް ޝުޖާއު އުސްމާން ހަމަޖައްސަން ޖުޑީޝަލް ސާވިސް ކޮމިޝަން (ޖޭއެސްސީ)އިން ނިންމާފައިވަނީ ކުރީގެ ރައީސް އަބްދުﷲ ޔާމީންގެ ވެރިކަމުގަ 15 އޮގަސްޓް 2018 ގަ އެވެ.
ހައި ކޯޓުގެ އިސް ފަނޑިޔާރަކަށް ޝުޖާއު ހަމަޖެއްސީ އެ ކޯޓުގެ އިސް ފަނޑިޔާރަކަށް ހުންނެވި އަބްދުﷲ ދީދީ ސުޕްރީމް ކޯޓުގެ ފަނޑިޔާރުކަމަށް އައްޔަން ކުރެއްވުމުންނެވެ. ނަމަވެސް އަބްދުﷲ ދީދީ ވެސް މިހާރު ވަނީ ސުޕްރީމް ކޯޓުގެ ފަނޑިޔާރުކަމުގެ މަގާމުން ވަކިކުރައްވާފަ އެވެ.
ފަނޑިޔާރު ޝުޖާއު އާއި ކުރީގެ ފަނޑިޔާރު އަބްދުﷲ ދީދީއަކީ ރައީސް ޔާމީނާއި، އަމަނިކުފާނު ނިސްބަތްވެވަޑައިގަންނަވާ ޕާޓީ ކަމުގައިވާ ޕީޕީއެމްގެ ހަރަކާތްތަކުގައި އުޅުއްވާކަމުގެ ތުހުމަތު ކުރެވޭ ދެ ބޭފުޅުންނެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ ސަރުކާރުންނާއި މިހާރު ހިނގަމުންދާ 19 ވަނަ ރައްޔިތުންގެ މަޖިލީހުން ގެންދަނީ ޖުޑީޝަރީ އިސްލާހު ކުރުމުގެ މަސައްކަތް ކުރަމުންނެވެ. އެގޮތުން ޖޭއެސްސީގެ ގާނޫނަށް ބޮޑެތި އިސްލާހުތަކެއް ގެނެސްފައި ވެއެވެ.
