ސިވިލް ސަރވިސްގެ ގަވާއިދަށް އިސްލާހު ގެނައުމަށް ޚިޔާލު ހުށަހެޅުމުގެ ފުރުސަތު ހުޅުވާލައިފި

ދިވެހި ސިވިލް ސަrވިސްގެ ޤަވާއިދަށް އިޞްލާޙު ގެނައުމަށް ޚިޔާލު ހުށަހެޅުމުގެ ފުރުޞަތު ހުޅުވާލައިފި އެވެ.

އެކަމާއި ގުޅިގެން ސިވިލް ސަރވިސް ކޮމިޝަނުން ނެރިފައިވާ ސަރކިއުލަރ އެއްގައި ބުނެފައިވަނީ ސިވިލް ސަރވިސްގެ ޤާނޫނުގެ ދަށުން އެކުލަވާލާ ޢަމަލުކުރަމުންދާ ދިވެހި ސިވިލް ސަރވިސްގެ ޤަވާއިދު 2014 މުރާޖަޢާކޮށް، އެ ޤަވާއިދަށް އިޞްލާޙު ގެނައުމުގެ މަސައްކަތް ކޮމިޝަނުން ކުރަމުންދާކަމަށެވެ. އަދި ދިވެހި ސިވިލް ސަރވިސްގެ ޤަވާއިދަކީ ޢާންމު ރައްޔިތުންނާއި، ސަރުކާރުގެ އިދާރާތަކާއި ސިވިލް ސަރވިސްގެ މުވައްޒަފުންގެ ޙައްޤުތަކާއި، މަޞްލަޙަތުތަކާއި ގުޅުންހުރި މުހިންމު ޤަވާއިދެއްކަމަށް ސިވިލް ސަރވިސް އިން ބުނެއެވެ.

މިޤަވާއިދަށް ގެނެވޭ އިޞްލާޙުތަކަކީ ހުރިހާ ރައްޔިތުން އަދި ޚާއްޞަކޮށް ސިވިލް ސަރވިސްގެ މުވައްޒަފުންގެ ބިނާކުރަނިވި ޚިޔާލާއި މަޝްވަރާއާއެކު ގެނެވޭ އިޞްލާޙުތަކަކަށްވުން މުހިންމު ކަމަށްވެސް ސިވިލް ސަރވިސް އިން ބުނެއެވެ.

އެހެންކަމުން ކުރިޔަށް އޮތް އެއް މަސްދުވަހުގެ ތެރޭގައި ސިވިލް ސަރވިސްގެ ޤަވާއިދަށް ގެންނަން ފެންނަ އިޞްލާޙުތަކާ ގުޅޭ ޚިޔާލުތައް އީމެއިލް ނުވަތަ ސިޓީގެ ޒަރީޢާއިން ކޮމިޝަނަށް ހުށަހެޅުމުގެ ފުރުޞަތު ހުޅުވާލާފައިވާކަމަށެވެ. އީމެއިލް އެޑްރެސް އަކީ admin@csc.gov.mv އެވެ.

ސިވިލް ސަރވިސް ޤަވާއިދަށް އިޞްލާޙު ގެނައުމަށް ނިންމާފައިވާއިރު އެޤަވާއިދަށް އިޞްލާޙު ގެނައުމަށް ބައެއް މުވައްޒަފުންވެސް އެދިފައިވާކަމަށް ސިވިލް ސަރވިސް ކޮމިޝަނުން ބުނެއެވެ.