ބައެއް ދާއިރާތަކަށް ދިވެހިން ތަމްރީނުކުރުމަށް ކޯސްތަކެއް ފަށަނީ
ރިސޯޓްތަކުގެ ވަޒީފާތަކަށް ނެރެވޭނެ ގާތްގަޑަކަށް 12 ވަރަކަށް ދާއިރާ ފާހަގަކުރެވިފައިވޭ
އިކޮނޮމިކް މިނިސްޓަރ ފައްޔާރު އިސްމާޢީލް
ރަނގަޅު ޢާމްދަނީ ލިބޭ ވަޒީފާތަކަށް ދިވެހިން ގެންދިޔުމަށްޓަކައި ބޭނުންވާ ހުނަރުގެ ކުޑަ މައްސަލައެއް އުޅޭކަން ފާހަގަކުރޭވޭތީ އެ ދާއިރާތަކަށް ޚާއްޞަކޮށްގެން ދިވެހިން ތަމްރީނުކުރުމުގެ ކޯސްތަކެއް ހިންގުމަށް ހަމަޖެހިފައިވާކަމަށް އިކޮނޮމިކް މިނިސްޓަރ ފައްޔާޒު އިސްމާޢީލް ވިދާޅުވެއްޖެއެވެ.
ހދ. ކުޅުދުއްފުށި ސިޓީގައި އެމްޑީޕީން އިންތިޒާމުކޮށްގެން ކުރިޔަށްގެންދާ "ތިލަދުންމަތި އިރުވައި ކޮންފެރެންސް" ގައި ވާހަކަ ދައްކަވަމުން މިނިސްޓަރ ވިދާޅުވީ މީގެ ބޭނުމަކީ ޚާއްޞަކޮށް ޓޫރިޒަމް އިންޑަސްޓްރީގެ މެދު ފަންތީގެ ވަޒީފާތަކަށް ދިވެހިންނަށް ފުރުޞަތު ހޯދައިދިނުން ކަމަށެވެ. އޭގެ ބޭނުމަކީ އެއީ ރަނގަޅު ޢާމްދަނީ ލިބޭ ވަޒީފާތަކަކަށް ވާތީކަމަށް މިނިސްޓަރ ވިދާޅުވި އެވެ. އެގޮތުން މީގެ ފުރަތަމަ ޕްރޮގުރާމް އުލިގަމުގައި ފެށުމަށް ހަމަޖެހިފައިވާކަމަށް މިނިސްޓަރ ވިދާޅުވި އެވެ.
މިނިސްޓަރ ވިދާޅުވީ ޓްރެއިނިން ދީގެން ރިސޯޓުތަކުގެ ވަޒީފާތަކަށް ނެރެވޭނެ ގާތްގަޑަކަށް 12 ވަރަކަށް ދާއިރާ ފާހަގަކުރެވިފައިވާ ކަމަށެވެ.
މިނިސްޓަރ ވިދާޅުވީ ވަޒީފާތަކަށް ބޭނުންވާ ދިވެހިން ނެރުމަށްޓަކައި ބޭނުންވާ ތަމްރީނުތައް ކުރިޔަށް ގެންދިޔުމުގައި ކައުންސިލްތަކުގެ އެހީ ބޭނުންވާ ކަމަށެވެ. އަދި ތަމްރީނުގައި ބައިވެރިވާ ކުދިންނަށް ލޯނުގެ ފުރުޞަތުތައް ކައުންސިލްތަކުން ހޯދައިދޭން ޖެހިދާނެ ކަމަށާއި، ނަމަވެސް އެއީ މާބޮޑު ޢަދަދުތަކެއް ނޫންކަމަށް މިނިސްޓަރ ވިދާޅުވިއެވެ. މިހާރުވެސް ބައެއް ކައުންސިލްތަކުން އެފަދަ ކާމިޔާބު މަޝްރޫޢުތައް ކުރިޔަށް ގެންދާކަން މިނިސްޓަރ ފާހަގަކުރެއްވި އެވެ.
ހދ އަތޮޅުގެ އާބާދީއަކީ 22،872 މީހުންނެވެ. މީގެތެރެއިން ވަޒީފާއަށްދާ މީހުންގެ ނިޞްބަތަކީ 6985 އެވެ. ވަޒީފާ ހޯދަމުންދާ މީހުންގެ ޢަދަދަކީ ޖުމުލަ އާބާދީގެ 3.6 އިންސައްތަކަމަށް ކޮންފެރެންސްގެ ތެރޭގައި ހާމަކުރި ތަފާސްހިސާބުތަކުން ދައްކައެވެ.
