ހުއިފިލަނޑާގެ 2 ބާވަތެއްގެ ވިޔަފާރި ކުރުމާގުޅޭ ޚާއްސަ ވޯކްޝޮޕެއް ފަށަނީ
ރިޕޯޓް ތައްޔާރު ކުރާނެ ގޮތް މި ވޯކްޝޮޕްގެ ދަށުން ކިޔާދެވޭނެ
މެރިން ރިސާރޗް ސެންޓަރު ހިންގެވުމާއި ހަވާލުވެ ހުންނެވި ޝާފިޔާ ނައީމް
ހުއިފިލަނޑާގެ 2 ބާވަތެއްގެ ވިޔަފާރި ކުރުމާގުޅޭ ޚާއްސަ ވޯކްޝޮޕެއް ފެށުމަށް ތައްޔާރުވެއްޖެއެވެ.
އެކަމާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން މޯލްޑިވްސް މެރިން ރިސާރޗް ސެންޓަރު ހިންގެވުމާއި ހަވާލުވެ ހުންނެވި ޝާފިޔާ ނައީމް ވިދާޅުވީ، ދުނިޔޭގައި ނެތިގެން ހިނގައިދާނެކަމުގެ ބިރުހީވެފައިވާ ބާވަތްތަކުގެ ބައިނަލްއަޤުވާމީ ވިޔަފާރި ކޮންޓްރޯލް ކުރުމަށް ސައިޓްސް ކިޔާ މުއާހަދާއެއްގައި ރާއްޖެއިން ބައިވެރިވެފައިވާ ކަމަށާއި، މި ވޯކްޝޮޕަކީ އޭގެ ދަށުން ހިންގޭ ހަރަކާތެއް ކަމަށެވެ. އެގޮތުން ހުއިފިލަނޑާގެ ބައިނަލްއަޤުވާމީ ވިޔަފާރި ކުރުމުގެ ކުރިން ފުރިހަމަ ކުރަންޖެހޭ ކަންކަން ފުރިހަމަކޮށް، ތައްޔާރު ކުރަންޖެހޭ ރިޕޯޓް ތައްޔާރު ކުރާނެ ގޮތް މި ވޯކްޝޮޕްގެ ދަށުން ކިޔާދެވޭނެ ކަމަށް އޭނާ ވިދާޅުވިއެވެ.
މި ބާވަތްތައް ސައިޓްސްގެ ހިމާޔަތް ކުރެވިފައިވާ ހުއިފިލަނޑާގެ ބާވަތްތަކުގެ ލިސްޓުގައި ހިމެނުމުން، މި ބާވަތްތަކުން ބައިނަލްއަގްވާމީ ފެންވަރެއްގައި ކުރާ ވިޔަފާރިއަކީ ދެމެހެއްޓެނިވި ވިޔަފާރިކައަށް ވެ، ސަރަހައްދީ އަދި ގައުމީ ފެންވަރުގައި ވެސް މި ބާވަތްތަކުގެ އާބާދީ ބެލެހެއްޓޭނެ ކަމަށް މެރިން ރިސާޗް ސެންޓަރުން މައުލޫމާތު ދެއެވެ.
ހުއިފިލަނޑާގެ ބާވަތްތަކުގެ އިތުރުންވެސް ރާއްޖެއިން ވަނީ ސައިޓްސްގެ ލިސްޓުގައި މިޔަރުގެ ދެ ބާވަތަކާއި މަޑީގެ ބާވަތެއް ކާމިޔާބުކަމާއި އެކު ހިމަނާފައެވެ. އެގޮތުން 2016 ވަނަ އަހަރު ރާއްޖެއިން އިސް ނަގައިގެން ލިސްޓުގައި ހިމަނާފައިވަނީ ސިލްކީ ޝަރކް (އައިނު މިޔަރު) އާއި ތްރެޝަރ ޝަރކް (ކަނޑި މިޔަރު) އަދި މޮބިއުލާ ރޭ އެވެ.
