ދެ ރައީސުން އެކުގައި ކުޅުދުއްފުށި ސިޓީއަށް!

ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙާއި މޯލްޑިވިއަން ޑިމޮކްރެޓިކް ޕާޓީ އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެކުގައި ކުޅުދުއްފުށީ ސިޓީއަށް ވަޑައިގެންފިއެވެ.

ކުރިއަށް އޮތް ލޯކަލް ކައުންސިލް އިންތިޚާބަށް އެމްޑީޕީން ކެމްޕޭން ކުރުމުގެގޮތުން ހިންގާ ހަރަކާތްތަކުގައި ބައިވެރިވެ ވަޑައިގަތުމަށް ދެރައީސުން އެކުގައި ކުޅުދުއްފުށީ ސިޓީއަށް ވަޑައިގެންނެވީ އަންގާރަ ދުވަހުގެރޭ 9:30 ގައި ކުޅުދުއްފުށީ "ސީކުއީން" ބޯޓުގައެވެ.

ދެ ރައީސުންނަށް ކުޅުއްދުއްފުށީ ސިޓީން ވަނީ ގިނަ އަދަދެއްގެ ރައްޔިތުން ނުކުމެ ހޫނު މަރުހަބާއެއް ދަންނަވާފައެވެ.

ކުޅުދުއްފުށީގައި ބުދަ ދުވަހު ހެނދުނު 9:00 ގައި ފަށާ "އިރުވައި ކޮންފަރެންސް"ގައި ރައީސް ސާލިހާއި ރައީސް ނަޝީދު ބައިވެރިވެ ވަޑައިގަތުމަށް ވަނީ ހަމަޖެހިފައެވެ. އަދި އެއަށްފަހު ބުދަ ދުވަހު ހަވީރު އެރަށުގައި އެމްޑީޕީގެ ޓީމްތަކުން ދޮރުން ދޮރަށް ކެމްޕޭން ހަރަކާތެއް ބޭއްވުމަށް ވަނީ ހަމަޖެހިފައެވެ.

ކުޅުދުއްފުށީގައި ބާއްވާ ކެމްޕޭން ބޮޑު ޖަލްސާ ބޭއްވުމަށް ހަމަޖެހިފައިވަނީ ބުދަ ދުވަހުގެރޭ 9:00 ގައެވެ.

އެމްޑީޕީގެ ޓީމުން ކުޅުދުއްފުށީ ސިޓީން ފުރުން ހަމަޖެހިފައިވަނީ ބުދަ ދުވަހުވަހުގެރޭ 0:00 ގައެވެ.

އެމްޑީޕީން ތިލަދުންމައްޗަށް ކުރަމުންމިދާ ކެމެޕޭން ދަތުރުގައި ބައިވެރިވަޑައިގެން އެމްޑީޕީގެ ޓީމާއިއެކު ރައީސް ސާލިހު ވަނީ އަންގާރަ ދުވަހު ހދ. ވައިކަރަދޫ އަދި ނޮޅިވަރަމަށް ޒިޔާރަތްކުރައްވާފައެވެ.

ކުޅުދުއްފުޓަކީ ރައީސް ސާލިހުގެ ސަރުކާރުގައި ސިޓީއެއްގެ ދަރަޖަދިން ފުރަތަމަ ރަށެވެ. ކުޅުދުއްފުއްޓަކީ ސިޓީއެއް ކަމުގައި ރައީސް ސާލިހު ކަނޑައެޅުއްވީ މިހިނގާ ޖެނުއަރީ މަހުގެ އެއްވަނަ ދުވަހު އެވެ.