ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބުގެ އިތުރުން ލޯކަލް ކައުންސިލް އިންތިހާބު އެކީގައި ބާއްވަން ފެނިވަޑައިގަންނަވާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެއެވެ.

އެމްޑީޕީގެ ތިލަދުންމަތީ ދަތުރުގައި ހދ. ނޮޅިވަރަމްއަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވާ ވާހަކަފުޅުދައްކަވަމުން ރައީސް ސޯލިހް ވިދާޅުވީ މި ސަރުކާރުން ބައެއް ކަންތައްތައް ކުރިއަށް ގެންދިއުމަށް ލަސްވެފައި ހުރެދާނެ ކަމަށާއި އޭގެ އެންމެ ބޮޑު އެއް ސަބަބަކީ އިންތިހާބުތައް ވަކިވަކިން އޮތުން ކަމަށެވެ. އަދި އެ ތިން އިންތިހާބު އެއް ދުވަހެއްގައި, އެއްވަގުތެއްގައި ބޭއްވުމުގެ މަސައްކަތްކޮށް، ހުރިހާ އިންތިހާބެއް އެކީގައި ބޭއްވިއްޖެނަމަ ޤައުމުގެ ތަރައްޤީއަށް އިތުރު ހަލުވިކަމެއް ލިބިގެންދާނެކަމަށް އެމަނިކުފާނު ވިދާޅުވިއެވެ.

ރައީސް ވިދާޅުވީ ރިޔާސީ އިންތިހާބާއި މަޖިލިސް އިންތިހާބުގައިވެސް ރައްޔިތުން ސާފުކޮށް މެޖޯރިޓީ ދިނީ އެމްޑީޕީއަށް ކަމަށާއި، އެކަމުން ސާފުކޮށްގެން އެނގި ގެންދިޔައީ އެމްޑީޕީގެ ސިޔާސުތައް ރައްޔިތުން ބަލައިގަތްކަމާއި އެ ސިޔާސުތަކަށް އިތުބާރު ކުރިކަން ކަމަށެވެ. މި އަންނަ ލޯކަލް ކައުންސިލް އިންތިހާބުގައިވެސް ރައްޔިތުން ކުރިން ނިންމި ނިންމުމާއި އިދިކޮޅަށް ނިންމުން ނިންމައިފިނަމަ ރާއްޖޭގެ ތަރައްޤީއަށްޓަކައި ފަށާފައިވާ ހުރި މަސައްކަތްތަކަށް ހުރަސްތަކެއް އެޅިގެންދާނެ ކަމަށް ރައީސް ފާހަގަކުރެއްވިއެވެ.

ރައީސް އިތުރަށް ވިދާޅުވީ ވާދަވެރި ބަޔަކު އޮށްޓަރެއް ނެތް، ހަޤީޤަތެއް ނެތް ވާހަކަތަކެއް ދައްކަމުންދާ ކަމަށާއި އެ ވާހަކަތަކަށް ރައްޔިތުން އަޑު ނޭހުމަށް އެދިވަޑައިގަންނަވާ ކަމަށެވެ. ވޭތުވެދިޔަ ތާނގައި ރަށްރަށުގައި ތަރައްޤީއަށް ވަރަށް ބޮޑަށް ފަސްޖެހިފައިވާކަން ފާހަގަކުރައްވާ ރައީސް ސޯލިހް ވިދާޅުވީ ބާރުތައް އެއްކޮށް، ތަރައްޤީ އެއްތަން ކުރުމުގެ ސަބަބުން ކުރަންޖެހިފައި ހުރި ކަންތައްތައް ވަރަށް ގިނަ ކަމަށެވެ.

ނޮޅިވަރަމަށް ބޭނުންވެފައި ހުރި ކަންތައްތައް ހުރިކަން ފާހަގަކުރައްވާ ރައީސް ސާލިހް ވިދާޅުވީ އެ ރަށު ސުކޫލަށް ބޭނުންވާ ފަސް ކުލާސްރޫމާއި މަލްޓިޕާޕަސް ހޯލް އެޅުމަށް 5.6 މިލިއަން ރުފިޔާ ބަޖެޓުގައި ހިމާނާފައިވާނެ ކަމަށެވެ. އަދި އެ ރަށުގައި ފެނުގެ ނިޒާމު މިއަހަރު ޤާއިމުކުރެވިގެންދާނެ ކަމަށް ވެސް އެމަނިކުފާނު ވިދާޅުވިއެވެ.