ސްރީލަންކާގެ ސައިފަތް ދަނޑުވެރިންނަށް ދުވާލަކު އެންމެ މަދުވެގެން ދޭންޖެހޭ އުޖޫރައަކީ 1،000 (އެއްހާސް) ރުޕީސްކަމަށް ރައީސް ގޯޓާބެ ރާޖަޕަކްސަ ހަމަޖައްސައިފިއެވެ.

ދަނޑުވެރިކަމުގެ މަސައްކަތް ކުރާ މީހުންގެ މުސާރަ އެއްހާސް ރުޕީސްއަށް ބޮޑުކުރައްވާނެކަމަށް ރިޔާސީ އިންތިހާބުގެ ކެމްޕޭނުގައި ގޯޓާބެ ވަނީ ވައުދުވެވަޑައިގެންފައެވެ. އެހެންކަމުން މި ހިނގާ އަހަރުގެ މާޗް މަހުގެ އެކަކުން ފެށިގެން ދަނޑުވެރިންނަށް އެންމެ މަދުވެގެން ދުވާލެއްގެ މައްޗަށް އެއްްހާސް ރުޕީސް ދޭން ޖެހޭނެއެވެ.

ސައިފަތް ދަނޑުވެރިންނަށް ދުވާލެއްގެ މައްޗަށް ލިބޭ އުޖުރާ ބޮޑު ކުރުމަށް ދަނޑުވެރިން ދަނީ ހުއްޓުމެއް ނެތި އަޑު އުފުލަމުންނެވެ. ޓްރޭޑް ޔޫނިއަންއާ ދަނޑވެރިންނާ ދެމެދު މި މައްސަލައިގެ އެއްބަސްވުމަކަށް މިހާތަނަށް އާދެވިފައެއް ނުވެއެވެ.

ދަނޑުވެރިންގެ އުޖޫރައަކީ 1000 ރުޕީސްކަމަށް ކަނޑައަޅާފައިވާއިރު، ހުސްވި އަހަރުގެ އޮކްޓޫބަރު މަހު ލަންކާގެ އެކި ހިސާބުތަކުގައި ސައިފަތް ދަނޑުވެރިކަން ކުރާ ފަރާތްތަކުން ވަނީ މުޒާހަރާތަކެއް ކޮށްފައެވެ.

އެ މައްސަލާގައި ބައެއް ދަނޑުވެރިން ވަނީ ބަނޑުހައި ހޫނުކަމުގެ ހަޅުތާލުތަކެއްވެސް ކޮށްފައެވެ. މިހާރު އާއްމުގޮތެއްގައި ދަނޑުވެރިއަކަށް މުސާރަ އަށް ލިބެނީ 500 (ފަސް ސަތޭކަ) ރުޕީސް އެވެ. އިތުރު އިނާޔަތްތަކާއި ހާޒިރީއަށާއި، ބިންނަ ސައިފަތުގެ ބަރުދަނަށް ބަލާފައި ދުވާލެއްގެ މައްޗަށް ލިބެނީ 800 (އަށް ސަތޭކަ) އާއި 900 (ނުވަ ސަތޭކަ) ރުޕީސްއެވެ.

ޕްލާންޓަސް އެސޯސިއޭޝަން އޮފް ސިލޯނުް މީގެކުރިން ބުނެފައިވަނީ، ބައިނަލްއަގްވާމީ މާރުކޭޓުގެ ހާލަތުގެ ސަބަބުން ދަނޑުވެރިން ޑިމާންޑުކުރާ އަދަދެއް ނުދެވޭނެ ކަމަށެވެ. އޭގެބަދަލުގައި އެމީހުން ހުށައެޅީ ދަނޑުވެރިން ތަމްސީލު ކުރާ ފަރާތްތަކަށް، މުސާރައަށް 100 ރުޕީސް އިތުރު ކުރުމަށެވެ.