ކަޅުވަކަރު މިސްކިތް ބުދަ ދުވަހު ރާވާ ނިމޭނެ

ދިރާގު ހެޑް އޮފީސް ކުރިން ހުރި ތަނުގައި ރާވަމުންދާ ކަޅުވަކަރު މިސްކިތް ރޭވުމުގެ ހުރިހާ މަސައްކަތެއް ބުދަ ދުވަހު ނިންމާލެވޭނެ ކަމަށް ހެރިޓޭޖް މިނިސްޓްރީން ބުނެފިއެވެ.

ކަޅުވަކަރު މިސްކިތުގެ އެންމެ ފަހުގެ މައުލޫމާތު މީޑިއާއަށް ދެއްވަމުން ހެރިޓޭޖް މިނިސްޓްރީގެ ސްޓޭޓް މިނިސްޓަރ މުހައްމަދު ތޯރިގު ވިދާޅުވީ ކަޅުވަކަރު މިސްކިތް ރޭވުމުގެ ހުރިހާ މަސައްކަތެއް ނިމިފައިވާ ކަމަށާއި، މިސްކިތް ހިޔާކޮށް ރޭވުމުގެ މަސައްކަތް ނިމި، މިހާރު ނުނިމި ހުރީ ތިނބި އެޅުމުގެ މަސައްކަތް ކަމަށެވެ. އަދި ތިނބި އެޅުމުން ރޭވުމުގެ ހުރިހާ މަސައްކަތެއް ނިމޭނެ ކަމަށް ތޯރިގު ވިދާޅުވިއެވެ.

ތޯރިގު ވިދާޅުވީ އިތުރަށް ވަޅު ބެހެއްޓުމުގެ މަސައްކަތް ކުރަން ޖެހޭ ކަމަށާއި، ވަޅު ބެހެއްޓޭނީ މިސްކިތް ހިޔާކުރަން ހަދާފައި ހުރި ހަރުގެ ނަގައިގެން ކަމަށެވެ.

ތޯރިގު ވިދާޅުވީ މިސްކިތް ސަލްޓަންޕާކުގެ އިރު ދެކުނު ކަންމަތީގައި ހުރި އިރު އެތަނުން ނެގިއިރުގައި ވެސް ވަރަށް ބައިވަރު ގެއްލުންތަކެއް ލިބިފައި އެބަހުރި ކަމަށެވެ. އެގޮތުން ބައެއް ގާތަކުގެ ބައިތައް މަދުކަމަށާއި އެތަންތަނަށް ގާ ހޯދައިގެން ގަލުން އެބައި ފިލްކުރަމުން ދާ ކަމަށެވެ.

ތޯރިގު ވިދާޅުވީ މިސްކިތުގެ އެއްވެސް ލަކުޑިއަކަށް އިސްކުރެއް އަދި މޮހޮރެއް ވެސް ޖަހާފައި ނުހުންނާނެ ކަމަށެވެ. އަދި މިސްކިތް ރާވާ ލަކުޑިއަށް މިހާރު ޖަހާފައި ހުންނާނީ ކުރެދިން އިލި ހެދުމަށްފަހު އިލި ކަމަށް ވެސް ތޯރިގު ވިދާޅުވިއެވެ.

ތޯރިގު ވިދާޅުވީ ރަސްމީކޮށް މިސްކިތް ހުޅުވަން ތާރީހެއް ޖެހޭނީ ކަނޑައަޅަން ކަމަށާއި، މިސްކިތުގެ ރޭވުމާއި ހިޔާކުރުމުގެ ހުރިހާ މަސައްކަތެއް ބުދަ ދުވަހަށް ނިމެނޭ ކަމަށެވެ. އަދި ބުދަ ދުވަހު ތިނބި އަޅާ ނިމުމުން އޭގެ އަނެއް ދުވަހު ހަރުގެ ރޫޅާފައި ވަޅު ބެހެއްޓުމުގެ މަސައްކަތް ފެށޭނެ ކަމަށް ތޯރިގު ވިދާޅުވިއެވެ. މީގެ އިތުރުން ލޭންޑްސްކޭޕިން އާއި މިސްކިތް ހުރި ސަރަހައްދު ތައްޔާރުކުރުމުގެ މަސައްކަތް ވަރަށް އަވަހަށް ފަށާނެކަމަށް ތޯރިގު ވިދާޅުވިއެވެ.