ފައިނުގެ ގިރާ ސަރަހައްދުގެ ހާލަތު ދެނެގަތުމުގެ މަސައްކަތް ފަށައިފި
14 ޖެނުއަރީ 2020 | އަންގާރަ 03:23މިނިސްޓްރީން ބުނީ ސާރވޭ ކުރުމުގެ މަސައްކަތް އެންވަޔަރަންމަންޓް މިނިސްޓްރީ އާއި އީޕީއޭގެ ޓީމަކުން ހޯމަ ދުވަހު ފަށާފައިވާކަމަށް
ފައިނު ގޮނޑުދޮށް ގިރަމުންދާތީ ގަސްތައް ނުވެއްޓޭނެ ގޮތަށް ވެލިބަސްތާ ޖަހާފައި
ރ. ފައިނުގެ ގިރާ ސަރަހައްދުގެ ހާލަތު ދެނެގަތުމަށް ސާރވޭ ކުރުމުގެ މަސައްކަތް އެންވަޔަރަންމަންޓް މިނިސްޓްރީގެ ޓީމަކުން ފަށައިފިކަަމަށް އެމިނިސްޓްރީން ބުނެފި އެވެ.
މިނިސްޓްރީން ބުނީ ސާރވޭ ކުރުމުގެ މަސައްކަތް އެންވަޔަރަންމަންޓް މިނިސްޓްރީ އާއި އީޕީއޭގެ ޓީމަކުން ހޯމަ ދުވަހު ފަށާފައިވާކަމަށެވެ. އަދި މިދަތުރުގައި ފައިނު ގިރުމުގެ މައްސަލައާއި ބެހޭ ގޮތުން މިނިސްޓްރީގެ ޓީމުން އެރަށު ކައުންސިލާއި މަޝްވަރާކޮށްފައިވާ ކަމަށް މިނިސްޓްރީން ބުނެއެވެ.
ފައިނު ގިރާ ސަރަހައްދު ބަލާ ސާރވޭ ކުރުމަށް މިނިސްޓްރީ އާއި އީޕީއޭގެ ޓީމެއް އެރަށަށް ގޮސްފައިމިވަނީ މިފަހަކުން ފައިނުގެ އުތުރު ސަރަހައްދު ވަރަށް ބޮޑަށް ގިރަން ފަށާ އެކަމުގެ ޝަކުވާ ބޮޑުވެފައިވަނިކޮށެވެ. ފައިނު ގިރަން ފެށުމުން އެސަރަހައްދުގައި ހުރި 200 އަށް ވުރެ ގިނަ އަހަރުވެފައިވާ ގަސްތައްވެސް ވަނީ ވެއްޓެން ކައިރިވެފައެވެ.
މީގެތެރެއިން ބައެއް ގަސްތައް ވަނީ މިހާރުވެސް ވެއްޓިފައެވެ. މިގަސްތަކާއި ރުއްތައް ވެއްޓުން ހުއްޓުވުމަށްޓަކައި އެރަށު ރައްޔިތުން ވަނީ ނިކުމެ އެ ގަސްތަކުގައި ވާ އައްސާފަ އެވެ. އަދި އަނެއްބައި ގަސްތައް ކައިރީގައި ވެލި ބަސްތައް ޖަގާ ގަސްތައް ވެއްޓުނަ ނުދިނުމަށް ރަށު ރައްޔިތުންގެ ފެންވަރުގައި އަންނަނީ މަސައްކަތް ކުރަމުންނެވެ.
މިކަމާއިގުޅޭގޮތުން މީގެކުރިން ރާއްޖެއެމްވީ އާ ވާހަކަ ދެއްކި ފައިނުގެ ރައްޔިތުން ބުނީ އެސަރަހައްދު ގިރަން ފެށީ އިރުވައި މޫސުން ފެށުމާއެކު ކަމަށެވެ. މީގެކުރިންވެސް އެސަރަހައްދު ގިރާ ކަމަށާއި ނަމަވެސް މިއަހަރު މިގިރާ ވަރަށް އެސަރަހައްދު ނުގިރާކަމަށް އެރަށުގެ ރައްޔިތުން ބުންޏެވެ. އެކަމާއި ގުޅިގެން ފައިނުގެ ރައްޔިތުންނާއި ތިމާވެއްޓަށް ލޯބިކުރާ ފަރާތްތަކުން އަންނަނީ މިމައްސަލަ ސަރުކާރުގެ ކަމާބެހޭ ފަރާތްތަކުގެ ސަމާލުކަމަށް ގެނައުމަށް މަސައްކަތްކުރަމުންނެވެ. އެގޮތުން ސޯޝަލް މީޑިޔާގައި މިވާހަކަތައް އެމީހުން އަންނަނީ ދައްކަމުންނެވެ.
