ވަޢުދު ފުއްދުމަކީ އެމްޑީޕީއަށް ޚާއްސަ ސިފައެއް: ހަސަން ލަތީފު

ވަޢުދު ފުއްދުމަކީ އެމްޑީޕީއަށް ޚާއްސަ ސިފައެއް ކަމަށް އެމްޑީޕީގެ ޗެއަރޕާސަން އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރ ހަސަން ލަތީފު ވިދާޅުވެއްޖެ އެވެ.

ކުރިއަށް އޮތް ލޯކަލް ކައުންސިލް އިންތިޚާބަށް ކެމްޕެއިނަށް އެމްޑީޕީން ތިލަދުންމައްޗަށް ކުރާ ދަތުރުގައި، ހއ. ދިއްދޫގައި އޮތް ޖަލްސާގައި ވާހަކަފުޅުދައްކަވަމުން ހަސަން ލަތީފު ވަނީ އެވިދާޅުވާ ވިދާޅުވުމުގެ ސަބަބުތައް ދެއްވާފަ އެވެ. އެގޮތުން ހަސަން ލަތީފު ވިދާޅުވީ އެމްޑީޕީން ވައުދުވާނީ ގިނަ ދިރާސާތަކަކާއި ގިނަ މަސައްކަތްތަކެއް ކުރުމަށްފަހު ކަމަށެވެ. އެކަން ދިއްދޫ ރައްޔިތުންނާއި ރާއްޖޭގެ ރައްޔިތުންނަށް އޮޅިފައި ނޯންނާނެ ކަމަށްވެސް ހަސަން ލަތީފު ވިދާޅުވި އެވެ.

ހަސަން ލަތީފު ވިދާޅުވީ އެމްޑީޕީން ރަށްރަށަށް އައިސް ރައްޔިތުން ކައިރިން ބޭނުންވާ ކަންތައްތަކަކީ ކޮބައިކަން އޮޅުން ފިލުވާކަމަށާއި ވައުދުވަނީ އެކަންކަން ބެލުމަށްފަހު ކަމަށެވެ. އަދި އެވައުދުތައް ހިމަނައިގެން މެނިފެސްޓޯ އެއް ހަދައިގެން ، ކެންޑިޑޭޓްވެސް ގޮވައިގެން އައިސް އެމްޑީޕީން މިބުނަނީ އެކެންޑިޑޭޓް ހޮވައިދީފިނަމަ އެވައުދާ އެއްގޮތަށް މެނިފެސްޓޯގައި ހުރި ކަންކަންކޮށްދޭނެ ކަމަށް އެމްޑީޕީން ބުނަމުން އަންނަކަމަށެވެ.

އެގޮތުގެ މަތިން ރިޔާސީ އިންތިޚާބުގައި އެގޮތަށް ކަންކަން ކޮށްގެން ރައްޔިތުން އެމްޑީޕީން ނެރުނު ކެންޑިޑޭޓަށް ވޯޓުދީ އެކެންޑިޑޭޓް ހޮވިކަމަށް ހަސަން ލަތީފު ވިދާޅުވި އެވެ. އެއަށްފަހު ރައްޔިތުންގެ މަޖިލީހުގެ އިންތިޚާބުގައި އަނެއްކާވެސް އެމްޑީޕީން ރައްޔިތުން ކައިރީ ބުނި ވާހަކައަކީ ރައީސުލްޖުމްހޫރިއްޔާ ތަންފީޒުކުރައްވާނެ ސިޔާސަތުތައް ކަނޑައެޅުމަށްޓަކައި ހަދަން ޖެހޭ ޤާނޫނުތައް ހެދުމުގެ ބާރު ރައްޔިތުން އެމްޑީޕީއަށް ދިނުމަށްކަމަށެވެ. އެކަންވެސް ރައްޔިތުން ކޮށްދެއްވި ކަމަށާއި މިހާރު ނިކުމެ މިތިބީ ކައުންސިލް އިންތިޚާބަށް ކަމަށާއި މިބުރު ވަށާޖެހެނީ ކައުންސިލް އިންތިޚާބު އެމްޑީޕީއަށް ކާމިޔާބު ކުރެވިގެންކަމަށް ހަސަން ލަތީފު ވިދާޅުވި އެވެ.

މިބުރު ވަށާޖެހިގެންދަނީ ރިޔާސީ އިންތިޚާބުން މަޖިލީހުގެ އިންތިޚާބުން އަދި ކައުންސިލް އިންތިޚާބުން ގޮސް ޕާޓީއަށް މެޖޯރިޓީ ލިބި އަދި ޤާނޫނުގައިވާ ގޮތުގެ މަތިން އެލިބިފައިވާ ބާރުތަކާއި އެކީގައި އެކަންކަން ތަންފީޒުކުރެވެން ފެށީމަ ކަމަށް ހަސަން ލަތީފު ވިދާޅުވި އެވެ. މިކަން އެމްޑީޕީގެ ކެންޑިޑޭޓުން ކާމިޔާބުކުރުމަށްޓަކައި މިމަސައްކަތުގައި އެމްޑީޕީގެ މެމްބަރުންގެ ބައިވެރިވުން ބޭނުންވާ ކަމަށް ހަސަން ލަތީފު ވިދާޅުވި އެވެ.

މީގެއިތުރުން ހަސަން ލަތީފުގެ ވާހަކަފުޅުގައި ވަނީ ކައުންސިލް އިންތިޚާބާއި ދިމާކޮށް އިދިކޮޅު ޕާޓީތަކުން ދައްކަމުން ގެންދާ ވާހަކަތަކަށްވެސް ރައްދު ދެއްވާފަ އެވެ. އެގޮތުން ލާމަރުކަޒީ އުސޫލުން ކަންކަން ކުރުމުގެ ވާހަކަ އިދިކޮޅު ފަރާތްތަކަށް ނުދެއްކޭނެ ކަމަށާއި އެކަން ކުރުމަށް އެފަރާތްތަކަށް ލިބުނު ފުރުސަތުގައި ކުރެއްވީ އެހެން ކަންކަން ކަމަށް ހަސަން ލަތީފު ވިދާޅުވި އެވެ.

މީގެއިތުރުން ހަސަން ލަތީފު ވިދާޅުވީ އެމްޑީޕީއަށް ހުރިހާ ގޮނޑިއަކަށް ކުރިމަތިލާނެ ކެންޑިޑޭޓުން ވާނެ ކަމަށެވެ. އެމްޑީޕީން މިކުރަނީ އެޕާޓީ އަބަދުވެސް ދަންނަ މަސައްކަތެއްކަމަށެވެ. އެމްޑީޕީއަށް މިއިންތިޚާބު ކާމިޔާބުކުރެއްވިޖެ ނަމަ ލިބިދީފައި ހުރި ބާރުތަކާއެކީގައި ރާއްޖެ ތަރައްގީވެގެންދާނެ ކަމަށް ހަސަން ލަތީފު ވިދާޅުވި އެވެ.