ސަރުކާރު ނުވެއްޓި އޮންނަނީ ކޯލިޝަންގެ ސަބަބުން ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފް ވިދާޅުވެއްޖެއެވެ.
ޕީއެންސީގެ ނައިބު ރައީސް އާދަމް ޝަރީފް މިހެން ވިދާޅުވެފައި މިވަނީ އެމްޑީޕީ މެންބަރުންނަށް ޙައްޤު މިންވަރު ނުލިބިގެން އުޅެނީ ކޯލިޝަންގެ ސަބަބުން ކަމަށް އެ ޕާޓީގެ ރައީސް މުޙައްމަދު ނަޝީދު ވިދާޅުވެފައި ވަނިކޮށެވެ.
ނަޝީދު ދެއްކެވި ވާހަކައިގެ އާޓިކަލްއެއް ޓްވީޓަރގައި ޙިއްޞާ ކުރައްވާ އާދަމް ޝަރީފް ކުރެއްވި ޓްވީޓެއްގައި ވިދާޅުވީ، ރައްޔިތުންނަށް ޙައްޤު މިންވަރު ކަނޑައެޅިއިރުވެސް ކޯލިޝަން އޮތް ކަމަށެވެ.
އަދި ވެރިކަމަށް ސަރުކާރު އައީވެސް ކޯލިޝަނަކުން ކަން ފާހަގަކުރައްވައި އާދަމް ޝަރީފް ވިދާޅުވީ، ސަރުކާރު ނުވެއްޓި އޮންނަނީ ކޯލިޝަންގެ ސަބަބުން ކަމަށާއި، ސަރުކާރަށް ޚިދުމަތް ނުދެވެނީ ސަރުކާރު ''ސްލޯ'' ވެފައި، ސަރުކާރު ހިންގުމުގައި އިޚުލާސްތެރި ކަމެއް ނެތުމުން ކަމަށެވެ.
އެމްޑީޕީން ތިލަދުން މައްޗަށް ކުރާ ދަތުރުގެ ތެރެއިން ހއ. އިހަވަންދޫގައި ބޭއްވި ޖަލްސާއެއްގައި ވާހަކަ ދައްކަވަމުން ރައީސް ނަޝީދު ވިދާޅުވީ، އެމްޑީޕީ ވެރިކަމުގައި އޮވެ، އެމްޑީޕީ މެންބަރުންނަށް ހިތްހަމަޖެހުން ނުލިބިގެން އުޅެނީ އެމަނިކުފާނުގެ ނަޒަރުގައި ކޯލިޝަނާ ހެދިގެން ކަމަށެވެ.
ރައީސް ނަޝީދު މިހެން ވިދާޅުވީ ނަމަވެސް، ކޯލިޝަން ރޫޅާލުމުގެ ވިސްނުމެއް ގެންގުޅުއްވާ ކަމަށް ވިދާޅުވެފައެއް ނުވެއެވެ. މި ސަރުކާރު ހިންގާ ކޯލިޝަނުގައި އެމްޑީޕީގެ އިތުރުން، ދެން ހިމެނެނީ ޖުމްހޫރީ ޕާޓީ، އެމްއާރްއެމް އަދި އަދާލަތު ޕާޓީއެވެ.
