ކާރު އުފައްދާ ކުންފުންޏެއް ކަމަށްވާ 'ޓޮޔޯޓާ' އިން ސިޓީއެއް ހެދުމުގެ މަސައްކަތް ފަށައިފިއެވެ.

ސިޓީގެ ޕްރޮޓޯޓައިޕް ހަދަމުންދާއިރު، މި ސިޓީ އެޅުމަށް އެކުންފުނިން ގަސްދުކޮށްފައިވަނީ ޖަޕާނުގެ މައުންޓް ފޫޖީގެ ބޭސްގައެވެ.

175 އޭކަރުގެ މިސިޓީ ޓޮޔޯޓާއިން ޑިޒައިން ކުރަމުންދާއިރު މި ސިޓީ އިމާރާތް ކުރުމުގެ އަމަލީ މަސައްކަތް ފެށޭނެ ކަމަށް ލަފާކުރެވެނީ 2021 ވަނަ އަހަރެވެ. ބޭރުގެ މީޑީއާތަކުން ރިޕޯޓު ކުރާ ގޮތުގައި މި ސިޓީ ވެގެންދާނީ މީހުންނަށް ދިރިއުޅެވޭނެ ލެބޯރެޓްރީއަކަށެވެ.

އެގޮތުން 2000 މީހުންގެ އާބާދީއަކަށް އެ ސިޓީގައި އުޅެވޭނެ ކަމަށް އެ ކުންފުނިން ބުނެފައިވެއެވެ. އަދި ސިޓީގައި ދިރިއުޅޭނެ ސައިންޓިސްޓުންނާއި އިންޖިނިއަރުންނާއި ދިރާސާ ކުރާ ފަރާތްތަކުން، މި ލެބޯރެޓްރީތަކުގައި ޓެކްނޮލޮޖީ ކުރިއެރުވުމަށް މަސައްކަތް ކުރާނެ ކަމަށް ވެސް އެ ކުންފުނިން ބުނެފައިވެއެވެ.

އެގޮތުން ރޮބޮޓިކްސް، ސްމާޓް ފޯން އަދި އާޓިފިޝަލް އިންޓެލިޖެންސް ކުރިއެރުވުމުގެ މަސައްކަތް ކުރެވޭނެއެވެ. މި ސިޓީގައި ކުރިއަށް ގެންދާ މަޝްރޫއުތަކުގައި ބައިވެރިވުމަށް ސައިންޓިސްޓުންނާއި ދިރާސާ ކުރާ ފަރާތްތަކަށް ދުނިޔޭގެ އެކި ކަންކޮޅުތަކުން ދައުވަތު ދެވޭނެ ކަމަށް އެކުންފުނިން ބުނެއެވެ.