ނައިގަރގެ އަސްކަރީ ބޭސްއަކަށް ދިން ހަމަލާއެއްގައި 89 މަރު!
13 ޖެނުއަރީ 2020 | ހޯމަ 08:03ޑިސެމްބަރު މަހު ނައިގަރގެ އަސްކަރީ ބާރުތަކާއި ދެކޮޅަށް އައިއެސްއައިއެލް އާއި ގުޅުން ހުރި ގްރޫޕަކުން ކުރި ރެއިޑެއްގައި 71 ސިފައިން މަރުވެފައިވޭ
ނައިގަރގެ އަސްކަރިއްޔާގެ މެމްބަރެއް
ނައިގަރގެ އަސްކަރީ ބޭސްއަކަށް ދިން ހަމަލާއެއްގައި 89 މީހުން މަރުވެއްޖެއެވެ.
ބުރާސްފަތި ދުވަހު ދިން މި ހަމަލާގައި 89 ސިފައިން މަރުވިއިރު, ޑިސެމްބަރު މަހު ނައިގަރގެ އަސްކަރީ ބާރުތަކާއި ދެކޮޅަށް އައިއެސްއައިއެލް އާއި ގުޅުން ހުރި ގްރޫޕަކުން ކުރި ރެއިޑެއްގައި 71 ސިފައިން މަރުވެފައިވެއެވެ.
ހަތަރު ސެކުއިރިޓީ އޮފިސަރުންނާއި ހަވާލާދީ ރޮއިޓަރޒްގައި ރިޕޯޓުކޮށްފައިވާގޮތުން މަރުވި 89 ސިފައިންގެ ހަށިގަނޑުތައް ނައިގަރގެ ވެރިރަށް ނިއާމޭގައި ހޮނިހިރު ދުވަހު ވަނީ ވަޅުލާފައެވެ.
ހަމަލާދިން ދުވަހު، މަރުވި މީހުންގެ ހަށިގަނޑުތައް މާގިނައިރުތަކެއް ނުވެ، ވަޅުލުމާއި ގުޅިގެން މަރުވި ސިފައިންގެ އަދަދު އެއަށް ވުރެ ވެސް މަތިވާނެ ކަމަށް ޚަބަރުތަކުން ބުނެއެވެ. އެގޮތުން މަރުވި މީހުންގެ އަދަދު ކަށަވަރުކުރުމަށް ފަހު އެ އަދަދު ގައުމީ ސެކިއުރިޓީ ކައުންސިލްގެ ބައްދަލުވުމަކަށްފަހު ހާމަކުރައްވާނެ ކަމަށް އެ ގައުމުގެ ޑިފެންސް މިނިސްޓަރ އިސޯފޫ ކަޓަމްބޭ ވިދާޅުވެފައިވެއެވެ.
89 މީހުން މަރުވި މި ހަމަލާގެ ޒިންމާ އެއްވެސް ފަރާތަކުން ނަގާފައިނުވާއިރު މި ހަމަލާތަކުން ދިފާއުވުމަށް މުޅުން އާ ގްރޫޕެއް އުފެއްދުމަށް ހަމަޖެހިފައިވާކަމަށް ކަޓަމްބޭ ވަނީ ވިދާޅުވެފައެވެ. ހަމަލާދީފައިވަނީ ސެކިއުރިޓީ ބާރުތައް ކުޑަ ސަރަހައްދަކަށް ކަމަށް އަލްޖަޒީރާގައި ރިޕޯޓުކޮށްފައިވެއެވެ.
ފާއިތުވި އަހަރު ނައިގަރއަށް ދެމުންދާ ހަމަލާތައް ވަނީ އިތުރުވެފައިއެވެ. މިހެން ދިން ހަމަލާތަކުގައި ޖުމްލަ 400 މީހަކު މަރުވެފައިވެއެވެ. އާމްޑް ކޮންފްލިކްޓް ލޮކޭޝަން އަދި އިވެންޓު ޑޭޓާ ޕްރޮޖެކްޓު އޯރގަނައިޒޭޝަން އަކުން ހަދާފައިވާ ދިރާސާއަކުން ދައްކާގޮތުގައި 400 މީހަކު މަރުވެފައިވާއިރު އަލްގައިދާ އަދި އައިއެސްއައިއެލް ފަދަ ހަނގުރާމަވެރި ޖަމާއަތްތަކުން ދޭ ހަމަލާތަކުން ދިފާއު ވުމަށް ވަނީ ނާކާމިޔާބުވެފައެވެ.
