ކާނިވާ ސަރަހައްދުގައި އާ ބަސް ސްޓޮޕްތަކެއް ހަދާ އަންނަ މަހު ދަތުރުތައް ފަށަނީ
12 ޖެނުއަރީ 2020 | އާދީއްތަ 18:02އާ ބަސް ސްޓޮޕްތައް ހަދަނީ ހުޅުމާލެ ދިޔުމަށް އިތުރު ދެ ރޫޓް ހެދުމަށް
ކާނިވާ ސަރަހައްދުގައި ބަސް ސްޓޮޕްތަކެއް އަންނަނީ ހަދަމުން
ކާނިވާ ސަރަހައްދުގައި އާ ބަސް ސްޓޮޕްތަކެއް ހަދާ އަންނަ މަހުގެ ތެރޭގައި ދަތުރުތައް ފެށުމުގެ މަސައްކަތް ކުރަމުންދާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނެފިއެވެ.
އެމްޕީއެލްގެ މީޑިޔާ އޮފިޝަލް ރާއްޖެ އެމްވީ އަށް މައުލޫމާތު ދެއްވަމުން ވިދާޅުވީ އާ ބަސް ސްޓޮޕް ތަކެއް ހަދަނީ ހުޅުމާލެއަށް ދިޔުމަށް އިތުރު ދެ ރޫޓް ހެދުމަށްކަމަށެވެ. އެ ބަސް ސްޓޮޕްތައް ހެދުމުގެ މަސައްކަތް ކުރަނީ މާލެ ސިޓީ ކައުންސިލުންކަމަށާއި އަންނަ މަހު މި ބަސް ސްޓޮޕްތަކުން ދަތުރުކުރެވޭނެ ކަމަށް ބެލެވޭ ކަމަށެވެ.
ބަސް ދަތުރު ފެށުމަށް ކާނިވާ ސަރަހައްދު އަންނަނީ ތަރައްގީކުރަމުންނެވެ. އެގޮތުން ބަސް އަނބުރާނެ ޖާގަ ހެދުމަށް، ކުރިން ލައިސަންސް ނަގަން ވެހިކަލް ދުއްވި ބިން ވަނީ ހުސްކޮށްފަ އެވެ.
ކާނިވާ ސަރަހައްދަށް ބަސް ދަތުރުތައް ފެށުމަށް އެންމެ ފުރަތަމަ ނިންމީ މިދިޔަ ރޯދަ މަހުގެ ކުރިންނެވެ.
އެމްޕީއެލްގެ ބަސް ދަތުރުތައް މިހާރު ކުރަމުންދަނީ ހުޅުމާލެއިން ފެށިގެން މާލޭގެ އިންޑަސްޓްރިއަލް ޒޯނުގައި ހަދާފައިވާ ބަސް ޓާމިނަލާއި ބަސް ސްޓޮޕްތަކަށެވެ.
