ޓޮޓެންހަމް ބަލިކޮށް ލިވަރޕޫލަށް އިތުރު ރެކޯޑެއް

އިނގިރޭސި ޕްރިމިއަރ ލީގުގައި ޓޮޓެންހަމް ބަލިކޮށް ލިވަރޕޫލުން އިތުރު ރެކޯޑެއް ހަދައިފިއެވެ.

ޓޮޓެންހަމްގެ ދަނޑުގަ، ކުޅުނު މި މެޗު ލިވަރޕޫލުން ކާމިޔާބުކުރީ 1-0 ގެ ނަތީޖާއަކުންނެވެ.

މެޗު ފަށައިގެން ލިވަރޕޫލުން ޓޮޓެންހަމްގެ ހާފަށް ބާރުބޮޑުކޮށް، ގިނަ ހަމަލާތަކެއް އުފައްދާފައިވެއެވެ. އެގޮތުން މެޗުގެ 23 ވަނަ މިނެޓުގަ، ލިވަރޕޫލްގެ ޑިފެންޑަރ ވެންޑައިކް ފޮނުވާލި ނުރައްކާތެރި ހަމަލާ ޓޮޓެންހަމްގެ ކީޕަރު ވަނީ ހުޝިޔާރުކަމާއިއެކު ދިފާއުކޮށްފައެވެ. އޭގެ ފަހުން މެޗުގެ 35 ވަނަ މިނެޓުގައި ލިވަރޕޫލްގެ ފޯވަރޑް ސަޑިއޯ މާނޭއަށް ވަނީ ލަނޑު ޖަހަން ރަނުގެ ފުރުސަތެއް ލިބި ބޭކާރުވެފައެވެ. އޭގެ ދެމިނެޓު ފަހުން މެޗުގެ 37 ވަނަ މިނެޓުގައި ލިވަރޕޫލުން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ މުހައްމަދު ސަލާހުގެ އެހީތެރިކަމާއިއެކު ރޮބާޓޯ ފިރިމީނިއޯ އެވެ.

މެޗުގެ ފުރަތަމަ ހާފު ނިމިގެން ދިޔައީ 1-0 ގެ ނަތީޖާއަކުން ލިވަރޕޫލް ކުރީގައި އޮވެގެންނެވެ.

މެޗުގެ ދެވަނަ ހާފު ފަށައިގެން ޓޮޓެންހަމުން އެޓީމުގެ ކުޅުން ރަނގަޅުކޮށް ލިވަރޕޫލްގެ ގޯލަށް ވަނީ ނުރައްކާ ކޮށްފައެވެ. އެގޮތުން މެޗުގެ 46 ވަނަ މިނެޓުގައި ޓޮޓެންހަމްގެ ލޫކަސް ވަނީ ނުރައްކާތެރި ހަމަލާއެއް ލިވަރޕޫލްގެ ގޯލަށް ފޮނުވައިލައިފައެވެ. ނަމަވެސް އޭނާ ފޮނުވާލި ބާރު ހަމަލާ، ގޯލާ އަމާޒު ނުވެ ދިޔައީ އަރިމަތީ ދަނޑި ކައިރިން ބޭރަށެވެ. އޭގެ ފަހުން ލިވަރޕޫލްގެ ފިރިމީނިއޯ އަށް ވަނީ ލަނޑު ޖަހާ، ލީޑު ފުޅާ ކުރަން ފުރުސަތެއް ލިބި ބޭކާރުވެފައެވެ.

މި ނަތީޖާއާއެކު ލިވަރޕޫލުން ލީގު ތާވަލުގެ އެއްވަނައިގައި އޮތީ 21 މެޗުން ލިބުނު 61 ޕޮއިންޓާއެކުގައެވެ. ދެވަނައިގައި އޮތް ލެސްޓަރ އަށް 22 މެޗުން ލިބިފައިވަނީ 45 ޕޮއިންޓެވެ. އަދި މި މެޗުން ބަލިވި ޓޮޓެންހަމް ވަނީ ތާވަލުގެ އަށްވަނަ އަށް ވެއްޓިފައެވެ. ޓޮޓެންހަމަށް 22 މެޗުން ލިބިފައިވަނީ 30 ޕޮއިންޓެވެ.