މި ތަންތަނަށް ދިޔަ ހިމަބިހި ވެކްސިން ނުޖަހާ ފަރާތްތަށް ސަމާލުވޭ!
21 ދުވަހުގެ ތެރޭގައި ހުންއައުމާއެކު ހަމުގައި ބިހިނަގައިފިނަމަ، ލަސް ނުކޮށް، ސިއްހީ ފަރުވާ ހޯދުދުމަށް އިލްތިމާސްކޮށްފައިވޭ
ހުޅުމާލެ ސެންޓްރަލް ޕާރކު
މިއަހަރުގެ ޖެނުއަރީމަހުގެ 1 ވަނަ ދުވަހުން 9 ވަނަ ދުވަހުގެ ހަވީރުގެ ވަގުތުތަކުގައި ހުޅުމާލޭ ސެންޓްރަލް ޕާރކަށާއި، އެ ޞަރަޙައްދުގެ ކެފޭތައް މަތީގައިވާ ތަންތަނަށް އެވަގުތު ތަކުގައި ދިޔަ ފަރާތްތަކުގެ ތެރެއިން ދެޑޯޒް މީސްލްސް ވެކްސިން (ހިމަބިހި) ފުރިހަމަ ނުކުރާ ފަރާތްތަކުން ސަމާލުކަން ދިނުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސްކޮށްފިއެވެ.
ދާދި ފަހުން މާލެ ޞަރަޙައްދުގައި ދިރިއުޅޭ އުމުރުން 3 އަހަރުގެ ކުއްޖަކު ހިމަބިހި ޖެހިފައިވާ ކަމަށް ޝައްކުކުރެވުމާއި ގުޅިގެން ކުރި ޓެސްޓް ތަކުން ޕޮޒިޓިވް ވެފައިވާއިރު އެކަމާ ގުޅިގެން އެޗްޕީއޭ އިން ނެރުނު ބަޔާނެއްގައި ބުނެފައިވަނީ ބަލިފެތުރުމުގެ ފުރުޞަތު އޮތް މުއްދަތުގައި ކުއްޖާ ޒިޔާރަތްކުރި ތަންތަނަށް ބަލާއިރު، ބަލި ފެތުރުމުގެ ފުރުޞަތު އޮތީ ވަގުތު ތަކުގައި ދިޔަ ފަރާތްތަކުގެ ތެރެއިން ވެކްސިންގެ ދެޑޯޒް ފުރިހަމަ ނުކުރާ ފަރާތްތަކަށް ކަމަށެވެ.
އެތަންތަނަކީ:
އެޗްޕީއޭގެ ބަޔާނުގައި ވާ ގޮތުން 21 ދުވަހުގެ ތެރޭގައި ހުންއައުމާއެކު ހަމުގައި ބިހި ނަގައިފިނަމަ، ލަސް ނުކޮށް، ޞިއްޙީ ފަރުވާ ހޯދުމަށާއި ޞިއްޙީ ފަރުވާ ހޯއްދެވުމަށް، މާލޭގައި ނަމަ އައި.ޖީ.އެމް.އެޗް ގެ އިމަރޖެންސީ ޓްރިއާޖަށް ވަޑައިގަތުމަށް އިލްތިމާސްކޮށްފައިވެއެވެ. އަދި ހުޅުމާލޭގައި ނަމަ 1417އިން ހުޅުމާލޭ ހޮސްޕިޓަލަށް ގުޅުމަށާއި، އަތޮޅުތެރޭގައި ނަމަ އެރަށެއްގެ ހޮސްޕިޓަލް ނުވަތަ ހެލްތު ސެންޓަރަށް ވަޑައިގެން، އަލާމާތްތަކުގެ މަޢުލޫމާތު ކައުންޓަރަށް ދެއްވުމަށް ބަޔާނުގައި ވެއެވެ.
ރާއްޖެއިން ހިމަބިހި ނައްތާލެވިފައިވާ ކަމަށް 2017 ވަނަ އަހަރު ކަނޑައެޅިފައިވީ ނަމަވެސް، ރާއްޖެއަކީ މީސްލްސް ފަދަ ބަލިތައް އުޅޭ ޤައުމުތަކުން ވަރަށް ގިނަ މީހުން ޒިޔާރަތްކުރާ ޤައުމެއްކަމަށްވެފައި، ރާއްޖޭގެ މީހުންވެސް މިފަދަ ބަލިތައް އުޅޭ ޤައުމުތަކަށް ޒިޔާރަތްކުރަމުންދާތީ، ރާއްޖެއަށް މިފަދަ ބައްޔެއް އައުމުގެ ފުރުޞަތު ބޮޑު ކަމަށް ވެއެވެ. 2017 ގައްޔާއި 2018ގައިވެސް ރާއްޖެއިން ބޭރުން ދެ ދިވެހިންނަށް ހިމަބިހި ޖެހިފައިވާއިރު، ރާއްޖޭގައި މިފަދަ ބައްޔެއް ފެތުރުން ހުއްޓުވުމަށް އެޅޭނެ އެންމެ މުހިއްމު ފިޔަވަޅަކީ ރާއްޖޭގައި އުޅޭ ހުރިހާ އެންމެންވެސް މީސްލްސް ވެކްސިން ގެ ދެޑޯޒް ފުރިހަމަކުރުން ކަމަށް އެޗްޕީއޭއިން ބުނެފައިވެއެވެ.
މީސްލްސް ހިމެނޭ ވެކްސިންތަކުގެ ތެރެއިން (މީސްލްސް ވެކްސިން، އެމް.އާރް. ވެކްސިން އަދި އެމް.އެމް.އާރް.ވެކްސިން) ދެޑޯޒް ފުރިހަމަކޮށްފައިވާ ފަރާތްތަކުން ބައްޔަށް ހުށަހެޅުނު ކަމުގައިވިޔަސް، ބަލި ޖެހުމަކީ ނާދިރު ކަމެއް ކަމަށް ބަޔާނުގައި ވެއެވެ. އެހެންކަމުން، އެފަދަ ބަލިތަކުން ރައްކާތެރި ވުމަށްޓަކައި، ވެކްސިން ޖަހަން އޮންނަ މުއްދަތުގައި ވެކްސިންގެ ޑޯޒުތައް ފުރިހަމަ ކުރުމަށް ސަމާލުކަން ދިނުމަށް އެޗްޕީއޭ އިން ވަނީ ބުނެފައެވެ. އަދި އެއްވެސް ސަބަބަކާ ހުރެ ވެކްސިންގެ ޑޯޒެއް ދޭން އޮންނަ މުއްދަތުގައި ނުދެވިއްޖެނަމަ، ވީ އެންމެ އަވަހަކަށް ވެކްސިން ދިނުމަށް ސަމާލުކަންދެއްވުމަށް ބުނެފައިވެއެވެ.
