ކަފާލާތުގެ ދަށުން ދޫކުރުމުގެ އުޞޫލެއް ރާއްޖޭގެ ޢަދުލުގެ ނިޒާމުގެ ތެރެއިން ކަނޑައެޅިފައިނުވާ ކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ އެމްޑީޕީ މެންބަރ އިމްތިޔާޒު(އިންތި) ފަހުމީ ވިދާޅުވެއްޖެ އެވެ.
މެންބަރ އިމްތިޔާޒު މިހެން ވިދާޅުވީ ފަސް އަހަރުގެ ޖަލު ޙުކުމެއް ތަންފީޒުކުރައްވަމުން ގެންދަވާ ކުރީގެ ރައީސް ޢަބްދުﷲ ޔާމީނަށް ބެއިލްގެ ފުުރުޞަތު ނުލިބިގެން އެކަމާ އެމަނިކުފާނު ކަންބޮޑުވުން ފާޅުކުރައްވާފައި ވަނިކޮށެވެ. ރައީސް ޔާމީނުގެ މިކަންބޮޑުވުން ފާޅުކުރައްވާފައިވަނީ ،ޓްވިޓަރ މެދުވެރިކޮށް އެމަނިކުފާނުގެ ވަކީލު އަދި ކުރީގެ ނައިބް ރައީސް ޑރ. މުޙައްމަދު ޖަމީލް އަޙްމަދެވެ.
ޑރ ޖަމީލުގެ ޓްވީޓަށް ރައްދު ދެއްވާ މެންބަރ އިމްތިޔާޒު ކުރެއްވި ޓްވީޓެއްގައި ވަނީ ކޯޓުން ޙުކުމެއް އިއްވާފައިވާ އެއްވެސް މީހަކަށް ރާއްޖޭގައި މިހާތަނަށް ބެއިލް ދީފައިވޭތޯ ސުވާލު އުފައްދަވާފަ އެވެ. އަދި އެކަމުގެ އުޞޫލެއް ރާއްޖޭގައި ކަނޑައަޅާފައި ނުވާކަމަށް ވިދާޅުވެ މެންބަރ އިމްތިޔާޒު ވިދާޅުވީ ވަރަށް ހަރުދަނާ ނިޒާމުތައް ހުންނަ ޤައުމުތަކުގެ ތެރެއިންވެސް ވަރަށް މަދު ޤައުމެއްގައި ނޫނީ ކަފާލާތުގެ ދަށުން ދޫކޮށްނުލާކަމަށެވެ.
ބެއިލް ނުލިބިގެން ރައީސް ޔާމީނު ކަންބޮޑުވުން ފާޅުކުރައްވާފައިވާއިރު، ކަފާލާތުގެ ދަށުން އެމަނިކުފާނު މިނިވަން ކުރުމަށް އެދި ހައިކޯޓަށް ވަނީ ހުށަހަޅާފައެވެ.
އެ މައްސަލަ ހައިކޯޓުން ބަލައިގަނެފައިވާކަން ވަނީ ހާމަކޮށްފައެވެ. އެހެން ނަމަވެސް އެމައްސަލައިގެ ޝަރީޢަތުގެ އަޑުއެހުމެއް ބާއްވާނެ ދުވަހެއް އަދި މިހާތަނަށް ހާމަކޮށްފައެއް ނުވެއެވެ.
ރައީސް ޔާމީނުގެ މައްޗަށް މަނީ ލޯންޑަރ ކުރުމުގެ ކުށް ސާބިތުވެ، ފަސް އަހަރަށް ޖަލަށްލުމާއެކު، ފަސް މިލިއަން ޑޮލަރުން ޖޫރިމަނާ ކުރުމަށްވެސް ޙުކުމް ކޮށްފައި ވަނީ ހުސްވި އަހަރުގެ ނޮވެމްބަރު މަހުގެ 28 ވަނަ ދުވަހު އެވެ. ޔާމީނުގެ މައްޗަށް ސާބިތުވެފައިވަނީ، އެމްއެމްޕީއާރްސީގެ ފައިސާ އަމިއްލަ ކުންފުންޏެއް ކަމުގައިވާ އެސްއޯއެފް މެދުވެރިކޮށް ލޯންޑަރކުރުމުގެ ކުށެވެ.
