ތިލަދުންމައްޗަށް ކުރާ ދަތުރުގައި 300 އަށްވުރެ ގިނަ މެންބަރުން ބައިވެރިވާނެ: އެމްޑީޕީ
11 ޖެނުއަރީ 2020 | ހޮނިހިރު 10:59ތައްޔާރުވުމަށް ގިނަ މަސައްކަތްތަކެއް ކުރޭ
އެމްޑީޕީގެ މެމްބަރުންތަކެއް
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ތިލަދުންމައްޗަށް ކުރާ ދަތުރުގައި 300 އަށްވުރެ ގިނަ މެންބަރުން ބައިވެރިވާނެ ކަމަށް އެޕާޓީން ބުނެފިއެވެ.
ރާއްޖެޓީވީއަށް އެމްޑީޕީގެ ނައިބް ރައީސް އަދި ރައީސް އޮފީހުގެ މިނިސްޓަރު މުހައްމަދު ޝިފާޒު ވިދާޅުވީ "އެޖެންޑާ 19 ރަށަށް" މިކުރާ ދަތުރަށް ތައްޔާރުވުމަށް ގިނަ މަސައްކަތްތަކެއް ކުރާ ކަމަށެވެ.
އެގޮތުން ހޮނިހިރު ދުވަހު ހަވީރު 16:30ގައި އެމްޑީޕީގެ ހަރުގޭގައި މިކަމަށް ޚާއްޞަކޮށް ސައިވެސް އޮންނާނެ ކަމަށާއި، މިސައިގަ ވީހާ ވެސް ގިނަ މީހުން ބައިވެރިވުމަށް މިނިސްޓަރު ޝިފާޒު އެދުނެއެވެ. އަދި މިސައިގަ މިދަތުރާ ބެހޭ ގޮތުން ގިނަ މަޢުލޫމާތުތައް ފޯރުކޮށްދީ، ފާސްތައް ދޫކުރާނެ ކަމަށެވެ.
ތިލަދުންމަތީ ދަތުރުގައި ގިނަ ބަޔަކު ބައިވެރިވާކަން ފާހަގަކުރައްވައި މިނިސްޓަރު ޝިފާޒު ވިދާޅުވީ 350 މެންބަރުން ބައިވެރިވާނެ ކަމަށާއި، ތިލަދުންމަތިން ވެސް ގިނަ ބަޔަކު މިޙަރަކާތްތަކާއި ގުޅޭނެ ކަމަށެވެ. މިނިސްޓަރު ޝިފާޒު ވިދާޅުވީ މިދަތުރުގައި ހއ. އަދި ހދ އިން 10 ވަރަކަށް ރަށް ކަވަރު ކުރެވޭނެ ކަމަށެވެ.
މީގެ އިތުރުން މިނިސްޓަރު ޝިފާޒު ވިދާޅުވީ ހދ. ކުޅުދުއްފުށީގައި ބޭއްވޭ އިރުވައި ކޮންފަރެންސްގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ އިތުރުން ކުރީގެ ރައީސް އަދި ރައްޔިތުން މަޖިލީހުގެ ރައީސް މުޙައްމަދު ނަޝީދު ވެސް ބައިވެރިވެވަޑައިގަންނަވާ ކަމަށެވެ. އެއަތޮޅުގެ ހުރިހާ ރަށަކުން މީހުން ބައިވެރިވާއިރު، އިޤްތިޞާދުގައި ޙަރަކާތްތެރިވާ މީހުން ވެސް ކޮންފަރެންސްގައި ބައިވެރިވާނެ ކަމަށް މިނިސްޓަރު ޝިފާޒު ވިދާޅުވިއެވެ. އަދި މިކޮންފަރެންސްގައި މުހިންމު ނިންމުންތަކެއް ނިންމާ ލާމަރުކަޒީ ނިޒާމަށް މިއައި ބަދަލާ އެކީގައި ޙަރަކާތްތެރިވާނެ ގޮތްތައް ކަނޑައެޅިގެންދާނެ ކަމަށް ވެސް މިނިސްޓަރު ޝިފާޒު ވިދާޅުވިއެވެ.
ލޯކަލް ކައުންސިލް އިންތިޚާބަށް އަލިއަޅުއްވާލައްވާ މިނިސްޓަރު ޝިފާޒު ވިދާޅުވީ އިންތިޚާބު ކާމިޔާބު ކުރެވޭނެ ކަމުގެ އުންމީދު ވަރަށް ބޮޑު ކަމަށާއި، ތިލަދުންމައްޗަށް ކުރެވޭ މިދަތުރަކީ ފެށުން ކަމަށެވެ. އަދި ކުރިއަށް އޮތްތާގައި ރާއްޖޭގެ އެހެން އަތޮޅުތަކަށް ދަތުރުތައް ކުރާނެ ކަމަށް މިނިސްޓަރު ޝިފާޒު ވިދާޅުވިއެވެ.
