ޕާކިސްތާނުގެ މިސްކިތަކަށް ދިން ބޮމުގެ ހަމަލާއެއްގައި ފުލުހުންގެ އިސް އޮފިސަރަކާއި، އާންމުންގެ 8 މީހަކު މަރުވެއްޖެއެވެ.
ހުކުރު ދުވަހު ދިން މި ހަމަލާއާއި ގުޅޭގޮތުން އެ ޤައުމުގެ ފުލުހުން ބުނީ، ހަމަލާދީފައިވަނީ އެ ޤައުމުގެ ހުޅަނގު ދެކުނުގެ ސަރަޙައްދަކަށް ކަމަށާއި، ހަމަލާދީފައިވަނީ މިސްކިތުގައި މީހުން ނަމާދަށް ތިބި ވަގުތެއްގައި ކަމަށެވެ.
މި ހަމަލާގެ ސަބަބުން މިސްކިތުގެ އިމާމުވެސް މަރުވެފައިވާއިރު، 20 މީހަކަށް ވަނީ އެކިވަރުގެ އަނިޔާތައް ލިބިފައެވެ. އަދި އޭގެ ތެރެއިން ބައެއް މީހުންގެ ހާލު ސީރިއަސްކަމަށް ރިޕޯޓްތައް ބުނެއެވެ.
ޕާކިސްތާނުގެ މީޑިއާ ރިޕޯޓްތައް ބުނާގޮތުން މި ހަމަލާއަކީ މަރުވި ފުލުސް އޮފިސަރަށް އަމާޒުކޮށް ދިން ހަމަލާއެކެވެ. ނަމަވެސް އެކަން ފުލުހުން ދަނީ އިތުރަށް ތަޙުޤީޤު ކުރަމުންނެވެ.
މި ހަމަލާއާއި ގުޅިގެން މަރުވި މީހުންގެ އަދަދު އަދިވެސް އިތުރުވެދާނެ ކަމަށް ބެލެވޭކަމަށް އެ ޤައުމުގެ ކަމާބެހޭ ފަރާތްތަކުން ބުނެފައިވާއިރު، ހަމަލާގެ ޒިންމާ އަދި އެއްވެސް ފަރާތަކުން އުފުލާފައެއް ނުވެއެވެ.
ޕާކިސްތާނުގެ ބޮޑުވަޒީރު އިމްރާން ޙާން ވަނީ މި ހަމަލާ ހަރުކަށި އިބާރާތުން ކުށްވެރި ކުރައްވާފައެވެ.
