ގުރައިދޫ ސްކޫލަށް އިތުރު ކްލާސްރޫމްތަކެއް އިތުރުކޮށްދިނުމަށް އެދިއްޖެ
10 ޖެނުއަރީ 2020 | ހުކުރު 07:51ތަރައްގީއަށް ރާއްވަވާފައިވާ މަސައްކަތްތަކާ ބެހޭ ގޮތުން މަޝްވަރާ ކުރެއްވި
ނައިބް ރައީސް ފައިސަލް، ގުރައިދޫ ކައުންސިލް މެމްބަރުންނާއެކު
ކ.ގުރައިދޫ ސްކޫލަށް އިތުރު ކްލާސްރޫމްތަކެއް އިތުރުކުރުމުގެ މަޝްރޫއެއް ކުރިއަށް ގެންދިއުމަށް އެރަށުގެ ކައުންސިލުން އެދިއްޖެއެވެ.
ގުރައިދޫ ކައުންސިލުން ކްލާސްރޫމްތައް އިތުރުކޮށްދިނުމަށް އެދިފައިވަނީ ރައީސުލްޖުމްހޫރިއްޔާގެ ނާއިބު ފައިސަލް ނަސީމްއާއެކު ބުރާސްފަތި ދުވަހު ބޭއްވި ބައްދަލުކުރެއްވުމުގައެވެ.
ރައީސް އޮފީހުގައި ބޭއްވެވި މި ބައްދަލުކުރެއްވުމުގައި، ގުރައިދޫ ކައުންސިލަރުން ވަނީ ރަށުގެ ތަރައްގީއަށް ރާއްވަވާފައިވާ މަސައްކަތްތަކާއި މިހާރު ކުރިއަށްދާ މަސައްކަތްތަކާއި ރަށުގެ ރައްޔިތުންގެ ހުރި ކަންބޮޑުވުންތައް ނައިބް ރައީސް ފައިސަލްއާ ހިއްސާ ކުރައްވާފައެވެ.
ކައުންސިލަރުން ނައިބް ރާއީސްއާ މަޝްވަރާކުރެއްވި ކަންތައްތަކުގެ ތެރެއިން އެންމެ އިސްކަމެއްދީގެން ހައްލުކުރުމަށް އެދޭ ކަމެއްގެ ގޮތުގައި ފާހަގަކުރެއްވީ ކުނި މެނޭޖުކުރުމުގައި މިހާރު ހުރި ދަތިތަކެވެ. އަދި ބިންހިއްކުމުގެ މަޝްރޫއާ އަދި ސްކޫލަށް އިތުރު ކްލާސްރޫމްތަކެއް އިތުރުކުރުމުގެ މަޝްރޫއު ކުރިޔަށްގެންދިއުމަށްށެވެ. އަދި ރައްޔިތުންގެ ފަރާތުން ހުށަހެޅި ބައެއް ޚިޔާލުތައް ކައުންސިލަރުން ނައިބް ރައީސްއާ ހިއްސާކުރައްވައި އެކަންކަމާ ބެހޭގޮތުން މަޝްވަރާކުރެއްވިއެވެ.
މީގެ އިތުރުން ރަށުގެ ތަރައްގީއަށް މުހިންމު އިތުރު ބައެއް ކަންކަމާއި އިޖްތިމާއީ ދުޅަހެޔޮކަމަށް ބޭނުންވާ ބައެއް ކަންތައްތަކާ ބެހޭގޮތުން ވެސް ކައުންސިލަރުން ނައިބް ރައީސްއާ މަޝްވަރާކުރެއްވި ކަމަށް ރައީސް އޮފީހުން ބުނެއެވެ.
މި ބައްދަލުކުރެއްވުމުގައި ނައިބް ރައީސް ފައިސަލް ދެއްކެވި ވާހަކަފުޅުގައި، ލާމަރުކަޒީ ގާނޫނަށް ގެނެސްފައިވާ އިސްލާހާއެކު ކައުންސިލުތައް އިތުރަށް ބާރުވެރި ވެގެންދާއިރު ރަށުގެ މުހިންމު ކަންކަން ނިންމުމުގައި ވީހާވެސް ބޮޑަށް ރައްޔިތުންނާ މަޝްވަރާ ކުރައްވައިގެން ކަންކަން ނިންމެވުމަށް އެދިވަޑައިގެންނެވިއެވެ. އަދި އިޖްތިމާއީ ދުޅަހެޔޮކަމަށް ކައުންސިލުން އިސްނަގައިގެން މަސައްކަތް ކޮށްދެއްވުމަށް ވެސް ނައިބް ރައީސް އެދިވަޑައިގެންނެވިއެވެ.
މިބައްދަލުކުރެއްވުމުގައި ނައިބް ރައީސް ފައިސަލް ވަނީ ގުރައިދޫ ކައުންސިލަރުން ފާހަގަކުރެއްވި ކަންކަން ހައްލުކުރުމުގައި ސަރުކާރުގެ ކަމާބެހޭ ފަރާތްތަކާއެކު މަޝްވަރާކުރައްވައިގެން މަސައްކަތް ކޮށްދެއްވާނެކަމުގައި ވިދާޅުވެފައެވެ.
