ސްޕެނިޝް ސުޕަރ ކަޕް ސައުދީގައި ބާއްވަނީ ފައިސާއަށް: ވަލްވޭޑޭ

ސްޕެނިޝް ސުޕަރ ކަޕްގެ ފޯމެޓް ބަދަލުކޮށް ސައުދީގައި މުބާރާތް ބާއްވަނީ ފައިސާއަށް ކަމަށް ބާސެލޯނާގެ ކޯޗު އާނެސްޓޯ ވަލްވޭޑޭ ބުނެފިއެވެ.

އާންމުކޮށް އޮގަސްޓް މަހުގައި ބާއްވާ މި މުބާރާތުގައި ކުރިން ކުޅެނީ ސްޕެނިޝް ލީގުގެ ޗެމްޕިއަނުންނާއި. ސްޕެނިޝް ކަޕް (ކޮޕްޑެލްރޭ) ގެ ޗެމްޕިއަން ޓީމެވެ. ނަމަވެސް ސްޕެއިންގެ ފުޓުބޯޅަ ފެޑެރޭޝަނުން ވަނީ މި މުބާރާތުގެ ފޯމެޓަށް ބަދަލުގެނެސް ލީގުގެ ދެވަނަ އަދި ތިންވަނަ ޓީމަށް މި މުބާރާތުގެ ފުރުސަތުދީ މުބާރާތް ގައުމުން ބޭރުގައި ބޭއްވުމަށް ނިންމާފައެވެ.

ސްޕެއިނުގެ ފުޓުބޯޅަ ފެޑެރޭޝަނުން ސައުދީގައި ސުޕަރ ކަޕް ތިން އަހަރު ބާއްވަން ނިންމީ 120 މިލިއަން ޔޫރޯގެ އެއްބަސްވުމެއްގެ ދަށުންނެވެ. ސްޕެއިނުން ބޭރަށް މި މުބާރާތް ބާއްވާތީ ގިނަ ކްލަބުތަކުން ވަނީ އެކަމާއި ހިތްހަމަ ނުޖެހުންފާޅުކޮށްފައެވެ.

ބާސާގެ ކޯޗު ވަލްވޭޑޭ ބުނީ ކުރިން އޮތް ގޮތުންނަމަ ސުޕަރ ކަޕްގެ ޖާގަ ލިބެނީ ކާމިޔާބު ހޯދާ ޓީމުތަކަށް ކަމަށާއި، ނަމަވެސް އާ ފޯމެޓްގެ ދަށުން އިތުރު ޓީމުތަކަށް ވެސް ޖާގަ ލިބޭ ކަމަށެވެ. އޭނާ އަށް ރަނގަޅީ ފޯމެޓް ކުރިން އޮތް ގޮތް ކަމަށް ވަލްވޭޑޭ ބުންޏެވެ. މީގެ އިތުރުން ވަލްވޭޑޭ ބުނީ ފުޓުބޯޅައިގަ، މިހާރު ބަލަނީ ފައިސާއަށް ކަމަށާއި، މި މުބާރާތް ސްޕެއިނުން ބޭރަށް ބަދަލުކުރި އެއްސަބަބަކީ ފައިސާ ކަމަށްވެސް ވަލްވޭޑޭ ބުންޏެވެ. އަދި މި ފޯމެޓްގައި ކުޅެގެން މި މުބާރާތުގެ އަސްލު މަގްސަދު ހާސިލު ނުވާނޭ ކަމަށްވެސް ވަލްވޭޑޭ ބުންޏެވެ.

މި މުބާރާތުގައި ބާސެލޯނާ ވާދަކުރަނީ ސްޕެނިޝް ލީގުގެ ޗެމްޕިއަނުންގެ ހައިސިއްޔަތުންނެވެ. އަދި ވެލެންސިއާ ވާދަކުރަނީ ކޮޕަޑެލްރޭގެ ޗެމްޕިއަނުންގެ ހައިސިއްޔަތުންނެވެ. އެތްލެޓިކޯ މެޑްރިޑާއި، ރެއާލް މެޑްރިޑުން މި މުބާރާތުގައި ވާދަކުރަނީ ލީގުގެ ދެވަނަ އަދި ތިންވަނަ ޓީމުގެ ހައިސިއްޔަތުންނެވެ.