ރާއްޖޭގެ ކަނޑުތަކާއި ގުޅޭ ދިރާސާ ފަށައިފި
ދިރާސާކުރުމުގެ ރޮނގުން ހަރަކާތްތެރިވާ ބައެއް ޖަމްޢިއްޔާތަކުން ބައިވެރިވޭ
ރިސާޗްގެ ބައިވެރިންނާއި އެކު ފިޝަރީޒް މިނިސްޓަރު ޒަހާ ވަހީދު ފޮޓޯ އަކަށް ހުއްޓިލައިގެން
މޯލްޑިވްސް މެރިން ރިސާރޗް އިންސްޓިޓިއުޓާއި, ބްލޫ ޕްރޮސްޕެރިޓީ ކޯލިޝަން ގުޅިގެން ރާއްޖޭގެ ކަނޑުތަކާއި ގުޅޭ ދިރާސާތަކެއް ފަށައިފިއެވެ.
ސިލްސިލާ އެކްސްޕެޑިޝަންއެއްގެ ގޮތުގައި ކުރިޔަށްގެންދިއުމަށް ހަމަޖެހިފައިވާ މި ދިރާސާގެ. ފުރަތަމަ ދަތުރު ފެށީ ބުރާސްފަތި ދުވަހުއެވެ. މި ދިރާސާ ދަތުރު ފަށްޓަވައި ދެއްވީ، މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ، ޒަހާ ވަހީދެވެ. މިނިސްޓަރ ވަނީ އެކްސްޕެޑިޝަން ކުރިއަށްދާ ކާޑޭ ޑިއެމް ބޯޓަށް ޒިޔާރަތްކުރައްވައި ދަތުރުގެ ބައިވެރިންނާއި ބައްދަލުކުރައްވާފައެވެ.
ދިވެހިރާއްޖެއިން ބްލޫ ޕްރޮސްޕެރިޓީ ކޯލިޝަނުގަ، ބައިވެރިވީ މިދިޔަ އަހަރު ބޭއްވި އ.ދ. ގެ 74 ވަނަ އާންމު ބައްދަލުވުމުގެ ހަވާސާގައި ދިވެހި ސަރުކާރާއި އެ ކޯލިޝަނާއި ދެމެދު ސޮއިކުރެވުނު އެއްބަސްވުމެއްގެ ދަށުންނެވެ.
ސަރުކާރާއި، ބްލޫ ޕްރޮސްޕެރިޓީ ކޯލިޝަނާއި ދެމެދު ސޮއިކުރި އެއްބަސްވުމުގެ ދަށުން، ރާއްޖޭގައި ނޫ އިޤްތިޞާދެއް ބިނާކޮށް ކުރިއެރުވުމަށް އެހީވެ މި ސިޔާސަތަށް ބޭނުންވާ މެރިން ސްޕެޝަލް ޕްލޭންއެއް އެކުލަވާލެވިގެން ދާނެއެވެ.
މި ޚާއްޞަ ޕްލޭން ވެގެންދާނީ ރާއްޖޭގައި ތިމާވެއްޓާއި ރަށްޓެހި، ތަރައްޤީގެ ނޫ ސިޔާސަތުތަކެއް އެކުލަވާލުމަށް މުހިންމު ދައުރެއް އަދާކުރާނެ ޕްލޭނަކަށް ކަމަށް ފިޝަރީޒް މިނިސްޓްރީން ބުންޏެވެ.
އެކްސްޕެޑިޝަން ތަކުގައި، އެ ކޯލިޝަންގައި ބައިވެރިވާ ސައިންވެރިންނާއި، އެމްއެމްއާރއައިގެ މުވައްޒަފުންގެ އިތުރުން ރާއްޖޭގައި ތިމާވެއްޓާއި، ކަނޑުތަކުގެ ދިރާސާކުރުމުގެ ރޮނގުން ޙަރަކާތްތެރިވާ ބައެއް ޖަމްޢިއްޔާތަކުން ބައިވެރިވާނެއެވެ.
26 ދުވަހުގެ މުއްދަތަށް ކުރިއަށްދާ މި އެކްސްޕެޑިޝަންގައި، ރާއްޖޭ ހުރިހާ އަތޮޅެއް ތަމްސީލުވާގޮތަށް ފުޅާ ދާއިރާއެއްގައި ސާރވޭތަކެއް ކުރެވިގެންދާނެއެވެ.
އޭގެ އިތުރުންވެސް މި ކޯލިޝަންގެ ދަށުން އިތުރު އެކްސްޕެޑިޝަންތައް ރޭވިގެން، ރާއްޖޭގެ ދެކުނުން، ފުން ކަނޑުތަކާއި ތިލަފަރު ފަޅުތަކުން މުހިންމު މަޢުލޫމާތުތައް ނެގުމަށް އެކި ދުވަސްވަރު އެކި ޙަރަކާތްތައް ހިންގާނެ ކަމަށް ފިޝަރީޒް މިނިސްްޓްރީން ބުންޏެވެ.
މި މަޢުލޫމާތުގެ އަލީގައި އެކުލަވާލާ މެރިން ސްޕެޝަލް ޕްލޭން، ރާއްޖޭގައި ނޫ އިޤްތިޞާދެއް ދެމެހެއްޓުމަށް ބޭނުންވާ ސިޔާސަތުތައް ކަނޑައެޅުމަށް ވަރަށް ބޮޑަށް އެހީތެރިވާނެ ކަމަށް ފިޝަރީޒް މިނިސްޓްރީން މަޢުލޫމާތުދެއެވެ.
ބްލޫ ޕްރޮސްޕަރިޓީ ކޯލިޝަނަކީ ޔުނިވަރސިޓީތަކާއި، ފައުންޑޭޝަންތަކާއި އެހެން ޖަމްޢިއްޔާތައް ގުޅިގެން، އެއްބާރުލުންދޭ ޤައުމުތަކާއެކު މެރިން ސްޕެޝަލް ޕްލޭންތައް އެކުލަވާލުމަށާއި، ސައިންޓިފިކް ދިރާސާތަކުގެ އަލީގައި މުހިންމު މާޙައުލުތައް ޙިމާޔަތްކުރުމާއެކު ދެމެހެއްޓެނިވި ގޮތެއްގައި ކަނޑުތަކުގެ މާޙައުލަށް ބަރޯސާވާ އިޤްތިޞާދީ މަސައްކަތްތައް ކުރި އެރުވުމަށް މަސައްކަތްކުރާ ޖަމްޢިއްޔާއެކެވެ.
މި ކޯލިޝަންގެ ބައިވެރިންގެ ތެރޭގައި ވެއިޓް އިންސްޓިޓިއުޓާއި، ވެއިޓް ފައުންޑޭޝަނާއި، ސްކްރިޕްސް އިންޓިޓިއުޓް އޮފް އޯޝަނޯގްރަފީއާއި، ނެކްޓަން ޑީޕް އޯޝަން އެކްސްޕްލޮރޭޝަނާއި، ނެޝަނަލް ޖިއޯގްރަފިކް ގެ ޕްރިސްޓީން ސީސް ގެ އިތުރުންވެސް މި ދާއިރާއިން މަސައްކަތްކުރާ ތަފާތު ޖަމާޢަތްތައް ހިމެނެއެވެ.
