އަލިފާނުގެ ހާދިސާތަކުން ރައްކާތެރިވުމުގެ ތަމްރީނު ދިނުމުގެ އެމްއޯޔޫއެއްގައި ސޮއިކޮށްފި
9 ޖެނުއަރީ 2020 | ބުރާސްފަތި 09:12އެމްޕީއެލްގައި ބެހެއްޓޭ ފަޔަރ ސިސްޓަމްތަކާއި އާލާތްތައް އިންސްޕެކްޓު ކުރެވޭނެ
ސޮއިކުރުމުގެ ރަސްމިއްޔާތުގެ ތެރެއިން
އަލިފާނުގެ ހާދިސާތަކުން ރައްކާތެރިވުމުގެ ތަމްރީނު ދިނުމުގެ އެމްއޯޔޫއެއްގައި މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އާއި މޯލްޑިވްސް ޕޯޓްސް ލިމިޓެޑް (އެމްޕީއެލް) އާއި ދެމެދު ސޮއިކޮށްފިއެވެ.
މިއެމްއޯޔޫގެ ދަށުން އެމްއެންޑީއެފުން އެމްޕީއެލްގެ މުވައްޒަފުންނަށް ތަމްރީނު ދިނުމަށް ވަނީ ހަމަޖެހިފައެވެ.
މި އެމްއޯޔޫގައި އެމްއެންޑީއެފްގެ ފަރާތުން ސޮއި ކުރެއްވީ އެމްއެންޑީއެފް ފަޔަރ ރެސްކިއުގެ ކޮމާންޑަންޓު ކާނަލް އަބްދުﷲ އިބްރާހިމް އާއި މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ފަރާތުން ސީއީއޯ ޝާހިދު އަލީއެވެ.
އެމްއޯޔޫއާއި ގުޅޭގޮތުން ވާހަކަދައްކަވަމުން ކާނަލް އަބްދުﷲ އިބްރާހިމް ވިދާޅުވީ ފަޔަރ އެންޑް ރެސްކިއުގެ ފަރާތުން އެމްޕީއެލްގެ މުވައްޒަފުން ތަމްރީނު ކުރުމާއި އެމްޕީއެލްގައި ބެހެއްޓޭ ފަޔަރ ސިސްޓަމްތަކާއި އާލާތްތައް އިންސްޕެކްޓު ކުރެވޭނެ ކަމަށެވެ. އަދި އެމްޕީއެލްއާއި ފަޔަރ އެންޑް ރެސްކިއު އިން ގުޅިގެން އިމަރޖެންސީ ޑްރިލްތައް ވެސް ބޭއްވޭނެ ކަމަށް ކާނަލް ވިދާޅުވިއެވެ.
މި ރަސްމިއްޔާތުގައި ވާހަކަ ދައްކަވަމުން އެމްޕީއެލްގެ ސީއީއޯ ޝާހިދު ވިދާޅުވީ އެމްޕީއެލްއަށް ބޭނުންވާ ރަނގަޅު އާލާތްތައް ހޯދުމުގައި ފަޔަރ އެންޑް ރެސްކިއުގެ އެހީތެރިކަން ލިބިގެންދާނެ ކަމަށެވެ. ހުރިހާ ސައިޓުތަކެއްގައި ފަޔަރ ބްރިގޭޑެއް ތަމްރީނުވެފައި ތިބުމުގެ މުހިއްމުކަން ފާހަގަކުރައްވާ ޝާހިދު ވިދާޅުވީ އަލިފާނުގެ ހާދިސާއަކަށް ތައްޔާރުވެގެން ތިބުމަކީ މުހިއްމު ކަމެއް ކަމަށެވެ.
